LI KʼUSITIK TSJAKʼ KEREM TSEBETIKE
¿Mi chopol van li espiritismoe?
¿Kʼusi chanop?
¿Mi oy van kʼusi chopol mi ta jkʼeltik oroskopo, chijtajin xchiʼuk tabla ouija o ti oy kʼusi chbat jakʼbetik junuk jtʼunolajele?
¿Mi jaʼ noʼox van jecheʼ loʼil li kʼusitik chalbe skʼoplal ti tskontrain sba li kʼusi lek xchiʼuk kʼusi chopole o mi melel van?
Ta jkʼelbetik skʼoplal kʼu yuʼun toj ep buchʼutik lek chilik li espiritismoe xchiʼuk kʼu yuʼun skʼan xachabi aba.
¿Kʼu yuʼun toj lek chilik?
Toj ep chalbeik skʼoplal espiritismo li ta chʼayob oʼontonal o elovajele. Chalbeik skʼoplal ta pelikulaetik, videojuegoetik xchiʼuk ta livroetik. Ta skoj taje, epal kerem tsebetik toj lek chilik li skʼelbel skʼoplal kʼanaletike (astrología), pukujetik, vampiroetik xchiʼuk j-akʼchameletik (brujas). ¿Kʼu yuʼun toj lek chilik?
Tskʼan tsnaʼik mi oy ta melel li anjeletike xchiʼuk li pukujetike.
Tsvul yoʼontonik ta sventa li kʼusi chkʼot ta pasel ta jelavele.
Tskʼan tskʼoponik li buchʼu chamem yuʼunike.
Junantik taje maʼuk ti yuʼun chopolike. Jech kʼuchaʼal liʼe, stalel onoʼox ti ta jkʼan ta jnaʼtik li kʼusi chkʼot ta pasel ta jelavele o ti ta jnaʼtik li buchʼutik chamem kuʼuntike.
¿Kʼu yuʼun skʼan xachabi aba?
Li Vivliae chpʼijubtasvan lek ta sventa li espiritismoe xchiʼuk ta sventa li kʼusitik te nitil skʼoplale. Yuʼun xi chale:
«Mu me oyuc bochʼo [...] xachanic tʼunul jech chac cʼu chaʼal tspasique, xchiʼuc mu me xanopic ti xuʼ avuʼunic snaʼel cʼusi chcʼot ta pasel ta tsʼacale, xchiʼuc mu me xachanic acʼchamel. Mu me xachanic tuchʼ ora. Mu me cʼusi xbat avaqʼuic ta tʼunel ta stojol li jtʼunuletique, xchiʼuc li bochʼotic snaʼic scʼopanel chʼulelale, xchiʼuc mu me cʼusi xajaqʼuic ta stojol li bochʼotic chamenic xae. Yuʼun li bochʼotic jech tspasique, ilinem ta stojolic li Mucʼul Diose» (Deuteronomio 18:10-12).
¿Kʼu yuʼun jpʼel skʼoplal chal Vivlia ti chopol li espiritismoe?
Yuʼun mi jtikʼoj jbatik li ta espiritismoe, yakal xa ta jkoltatik li pukujetike. Li Vivliae chal ti oy anjeletik ti lik svalopatinik li Diose, vaʼun kʼatajik ta yajkontratak Dios (Génesis 6:2; Judas 6). Yoʼ sloʼla krixchanoetik li pukujetike, ta stunesik li jkʼelkʼanaletike xchiʼuk li jtʼunolajeletike o li buchʼutik tskʼopon animaetik ta alele. Mi ta jpastik li kʼusitik taje, jaʼ me chkamigointik li yajkontratak Diose.
Li espiritismoe chakʼ jchʼuntik ti oy buchʼutik xuʼ la snaʼik li kʼusi chkʼot ta pasel ta jelavele. Pe jaʼ noʼox stuk Dios ti xi chale: «Vuʼun noʼox jtuc xuʼ chcal li cʼusi chcʼot ta pasel ta tsʼacale; epal jabil toʼox scʼan xcʼot ta pasel ti cʼalal chcale» (Isaías 46:10; Santiago 4:13,14).
Li espiritismoe chakʼ jchʼuntik ti xuʼ la skʼopon buchʼutik kuxulik li animaetike. Pe xi chal li Vivliae: «Li bochʼotic chamenic xae mu xa cʼusi snaʼic o [...]. Ta yavil animaetique, muʼyuc xa abtel, muʼyuc cʼusi stacʼ pasel, muʼyuc xa cʼusi jnaʼtic, muʼyuc xa bijubtasel» (Eclesiastés 9:5, 10).
Jaʼ yuʼun, li stestigotak Jeovae ta spʼajik skotol li kʼusitik te nitil skʼoplal xchiʼuk espiritismoe. Muʼyuk ta xchʼay-o yoʼontonik li kʼusitik te tsakal skʼoplal xchiʼuk sombietik, vampiroetik o yan kʼusitik ti mu stakʼ nabel skʼoplale. Xi chal jun tseb ti María sbi ta sventa li kʼusitik taje: «Mi tsakal jutuk skʼoplal espiritismoe, muʼyuk ta jkʼel».a
Jech kʼuchaʼal chloʼlavanik li buchʼutik toj chopolik ti mu skʼan xakʼ sbaik ta ojtikinele, li pukujetik eke tskʼan tsloʼlaikot sventa xanop ti jaʼ yakal chachiʼin ta loʼil yilel li animaetike.
Li kʼusi xuʼ xapase
Pʼajo skotol li chʼayob oʼontonal xchiʼuk li kʼusitik te snitojbe sba skʼoplal xchiʼuk li espiritismoe, vaʼun jaʼ jech sak-o ajol avoʼonton ta stojolal li Jeovae (Echos 24:16).
Chʼayo batel skotol li kʼusitik te snitojbe sba skʼoplal xchiʼuk espiritismoe. Kʼelo kʼusi chal Echos 19:19 xchiʼuk 20, akʼo venta kʼusi la spasik li yajtsʼaklomtak Kristo ta baʼyel sigloe.
Vuleso ta ajol liʼe: mi la apʼaj skotol li chʼayob oʼontonal xchiʼuk li kʼusitik te snitojbe sba skʼoplal xchiʼuk li espiritismoe, jaʼ jech chavakʼ aba ta stojolal li Jeovae. Vaʼun xmuyubaj tajek avuʼun (Proverbios 27:11)
a Taje maʼuk skʼan xal ti te tsakal skʼoplal xchiʼuk espiritismo skotol li kuentoetik o loʼiletik ti toj labalik sbae. Akʼo mi jech, li yajtsʼaklomtak Kristoe ta stunes lek sjol yoʼontonik ti lek chanubtasbil ta Vivliae, vaʼun ta spʼajik li chʼayob oʼontonal xchiʼuk yan kʼusitik ti te snitojbe sba skʼoplal xchiʼuk espiritismoe (2 Korintios 6:17; Evreos 5:14).