Mateo 6:34 | «Mu me xavul avoʼontonik ta sventa li yokʼomale»

«Mu me xavul avoʼontonik ta sventa li yokʼomale, yuʼun oy kʼusi chakʼ vul oʼonton xtok li ta yokʼomale. Yuʼun xuʼ noʼox ti kʼu yepal vokolil yichʼoj tal jujun kʼakʼale» (Mateo 6:34, Xchʼul Kʼop Dios sventa Achʼ Balumil).

«Mu me xcʼopoj avoʼonic ta sventa li ocʼobe yuʼun mu xanaʼic li cʼusi chcʼot ta pasele. Ti cʼu sba avocolic jujun cʼacʼale, taʼlouc o me. Mu me xa saʼic más -xi li Jesuse» (Mateo 6:34, Ach’ Testamento, ta skʼop San Andrés).

Li kʼusi skʼan xal Mateo 6:34

Li kʼusi la skʼan laj yal Jesuse jaʼ ti mu jvul tajek koʼontontik ta sventa li vokoliletik chtal ta yokʼomale. Jaʼ mas lek ti jnopbetik skʼoplal li vokoletik ta jnuptantik jujun kʼakʼale.

Li Jesuse maʼuk la skʼan laj yal ti mu stakʼ jnopbetik skʼoplal ti kʼusi ta jpastik ta yokʼomal o ta mas tsʼakale (Proverbios 21:5). Li kʼusi tskʼan chakʼ ta aʼiele jaʼ ti mu jvul tajek koʼontontik ta sventa li kʼusi xuʼ jnuptantike. Li vul oʼonton taje muʼyuk xa xijmuyubaj yuʼun xchiʼuk mu xa xkakʼ ta koʼontontik li kʼusi ta jpastike. Muʼyuk chchapan jvokoltik mi la jvul koʼontontik ta sventa li yokʼomale. Jech xtok, bakʼintike muʼyuk chkʼot ta pasel li kʼusi ta jvul-o koʼontontike, mi kʼot ta pasele mu toj tsotsuk tajek jech kʼuchaʼal jnopojtik toʼoxe.

Stsʼak loʼil ta Mateo 6:34

Li kʼusi laj yal Jesuse te tsakal skʼoplal li ta Mantaletik ta Vits ti te ta jtatik li ta kapitulo 5 kʼalal ta 7 ta Mateoe. Li ta vits taje te laj yalbe skʼoplal Jesus ti mi laj vul tajek koʼontontike, maʼuk ti xijmuyubaj xa tajeke mi jaʼuk ti chnatub yuʼun li jkuxlejaltike (Mateo 6:27). Jech xtok, mi ta jpasbetik li yabtel Diose, mu persauk jvul tajek koʼontontik ta sventa li kʼusi chtal ta yokʼomale. Li Diose chchabi li chonbolometike xchiʼuk li tsʼiʼleletike. ¿Mi jaʼ xa van muʼyuk chchabi li buchʼutik ch-ichʼat ta mukʼe? (Mateo 6:25, 26, 28-33).