Juan 3:16 | «Toj ep la xcʼuxubin scotol cristianoetic ta banamil li Diose»

«Yuʼun skʼanoj tajek krixchanoetik li Diose, jaʼ yuʼun laj yakʼ li jun noʼox Xnichʼon sventa mu xichʼ lajesel li buchʼu chakʼ xchʼunel yoʼonton ta stojolale, moʼoj, yuʼun jaʼ sventa tsta-o xkuxlejal sbatel osil» (Juan 3:16, Xchʼul Kʼop Dios sventa Achʼ Balumil).

«Yuʼun toj ep la xcʼuxubin scotol cristianoetic ta banamil li Diose, jech laj yacʼ li jun noʼox Xnichʼon oye, yuʼun jech mu chʼayeluc chbat li bochʼotic ta xchʼunic ti jaʼ Jcoltavanej yuʼunique; jaʼ ta xcuxiic o sbatel osil» (Juan 3:16, Xchʼul Cʼop Jtotic Dios ta skʼop Chenalhó).

Li kʼusi skʼan xal Juan 3:16

Li Diose tskʼan ti xijkuxi sbatel osile yuʼun skʼanojutik tajek. Jaʼ yuʼun, la stak tal ta balumil li Xnichʼone, li Jesukristoe. Ep kʼusitik la spas kʼalal ay ta balumile. Jtos ti kʼusi la spase jaʼ ti la yakʼ ta ojtikinel li Stote, ti jaʼ Sdiose (1 Pedro 1:3). Jech xtok, laj yakʼ xkuxlejal ta jtojolaltik sventa jtatik kuxlejal sbatel osil. Pe sventa jtatik li kuxlejal taje, skʼan xkakʼ xchʼunel koʼontontik ta stojolal.

Li Diose laj yakʼ li «jun noʼox Xnichʼon»a ta skoj ti skʼanojutike. ¿Kʼu yuʼun chal Vivlia ti «jun noʼox Xnichʼon oye»? Yuʼun jaʼ stuk Dios la spas (Kolosenses 1:17). «Jaʼ baʼyel laj yichʼ pasel ta skotol li kʼusitike» (Kolosenses 1:15). Skotol li yan k’usitik laj yich’ pasel ti te tsakal sk’oplal li anjeletike, ja’ ta stojolal Jesus ti laj yich’ pasel skotole. Akʼo mi skʼanoj tajek Xnichʼon li Jeovae,b ta sjunul yoʼonton la stak tal ta balumil sventa «tal tunuk xchiʼuk tal yakʼ xkuxlejal kʼuchaʼal pojelal sventa tspoj epal krixchanoetik» (Mateo 20:28). Kʼalal laj yil svokol xchiʼuk cham ta jtojolaltik li Jesukristoe, ja jech la spojutik lokʼel li ta mulil xchiʼuk ta lajelale, ti jaʼ laj yakʼ jkuchintik li Adane, li baʼyel vinike (Romanos 5:8, 12).

Ti chkakʼ xchʼunel koʼontontik ta stojolal li Jesuse maʼuk noʼox bal ti jchʼuntik ti oye o ti jnaʼojtik li kʼusi la spas ta jtojolaltike, moʼoj, yuʼun te chvinaj ti oy xchʼunel koʼontontik kʼalal ta jchʼunbetik li smantaltake xchiʼuk kʼalal ta jchanbetik li stalelale (Mateo 7:24-27; 1 Pedro 2:21). Xi chal li Vivliae: «Tsta xkuxlejal sbatel osil li buchʼu chakʼ xchʼunel yoʼonton ta stojolal li Nichʼonile; pe li buchʼu mu xchʼunbe smantal li Nichʼonile muʼyuk bu tsta li kuxlejale» (Juan 3:36).

Stsʼak loʼil ta Juan 3:16

Liʼe jaʼ li kʼusi laj yal Jesus kʼalal yakal chchiʼin ta loʼil li Nikodemoe, ti jaʼ jun jbabe ta relijion yuʼun judaetike (Juan 3:1, 2). Te laj yalbe skʼoplal sventa Ajvalilal yuʼun Diosc li Jesuse xchiʼuk ti skʼan xvokʼ ta achʼ li jun krixchanoe (Juan 3:3). Laj yalbe skʼoplal xtok ti kʼu yelan chchame: «Chichʼ jokʼanel ek [jaʼ xkaltik, chich’ jokʼanel ta jtel teʼ] li Xnichʼon Krixchano sventa sta xkuxlejal sbatel osil li buchʼu chakʼ xchʼunel yoʼonton ta stojolale» (Juan 3:14, 15). Vaʼun, laj yalbe skʼoplal ti jaʼ koliyal ti skʼanojutik tajek Dios ti xuʼ jtatik li kuxlejal taje. Kʼalal chlaj xa ox yoʼonton ta loʼil li Jesuse, te laj yal ti tsots skʼoplal skʼan xkakʼ ta ilel xchʼunel koʼontontik xchiʼuk ti jaʼuk jpastik li kʼusitik lek chil Dios sventa jtatik li kuxlejal taje (Juan 3:17-21).