TEKSTOETIK TI CHAPBIL SMELOLALE
Salmo 23:4 | «Akʼo mi te chixanav li ta stenlejaltik ti ikʼ tajeke»
«Akʼo mi te chixanav li ta stenlejaltik ti ikʼ tajeke, muʼyuk kʼusi ta jxiʼta, yuʼun te achiʼinojun; jaʼ tspat koʼonton li anamteʼ xchiʼuk alukaxteʼe» (Salmo 23:4, Xchʼul Kʼop Dios sventa Achʼ Balumil).
«Acʼo me chixanov ta yolon pimil toyolal teʼtic, muʼyuc cʼusi ta jxiʼbe, yuʼun te achiʼinojun. Jaʼ jpatoj coʼnton yuʼun li anamteʼe xchiʼuc li xlucaxteʼile» (Salmo 23:4, Xchʼul Cʼop Jtotic Dios, ta skʼop Chenalhó).
Li kʼusi skʼan xal Salmo 23:4a
Li Diose tskʼel xchiʼuk chchabi li yajtuneltake, mas to kʼalal chil svokolike. Tskoʼoltas ta jun jchabichij ti tskʼel xchijtak sventa chakʼ ta ilel ti kʼu yelan chchabi yajtuneltak li Jeovae.b Li yajtuneltak Diose mu stukuk chaʼi sbaik kʼalal tsots tajek kʼusi tsnuptanike, ti xkoʼolaj ta stenlejaltik ti ikʼ tajek jech kʼuchaʼal chal li versikuloe xchiʼuk ti xibal sba xchamike. Jun yoʼonton chaʼi sbaik, xkoʼolaj ti te oy ta xokon chaʼiik li Jeovae.
Ta voʼnee, li jchabichijetike tstunesik jun vachʼ sventa tsibtasik li jtiʼvanej chonbolometike, vaʼun jech chchabi li xchijike. Jech xtok, tstunes jun snamteʼ ti lukluk sniʼ sventa tsbeiltas li xchijike xchiʼuk sventa smakik ta be mi oy kʼusi xibal sba chilik ti bu chbatike. Jaʼ jech li Jeova eke xkoʼolaj ta jun lekil jchabichij ti chchabi xchiʼuk tsbeiltas li yajtuneltake, jech xtok chchabi kʼalal chil svokolike ti xkoʼolaj ta ikʼal osil oyike.
Ta stunes Vivlia sventa tsbeiltas xchiʼuk sventa tspatbe yoʼontonik (Romanos 15:4).
Chchikintabe li s˗orasionike xchiʼuk tskolta sventa junuk yoʼontonik (Filipenses 4:6, 7).
Tstijbe yoʼonton yan yajtuneltak yoʼ spatbe yoʼontonik (Ebreos 10:24, 25).
Chalbe ti oy kʼusi lek tstaik ta jelavel kʼalal mi la slajesbe skʼoplal skotol li kʼusi chakʼ vokolile (Salmo 37:29; Apokalipsis 21:3˗5).
Stsʼak loʼil ta Salmo 23:4
Li Salmo 23 jaʼ la stsʼiba David, ta skeremale jaʼ toʼox jun jchabichij xchiʼuk ta tsʼakale kʼot ta ajvalil yuʼun li jteklum ta Israel ta voʼnee (1 Samuel 17:34, 35; 2 Samuel 7:8). Ta slikeb li salmoe tskoʼoltas ta jun Jchabichij li Jeovae, yuʼun tsbeiltas, tsmakʼlin xchiʼuk tspatbe yoʼonton li yajtuneltake, jech kʼuchaʼal tspas li jun jchabichije (Salmo 23:1˗3).
Sventa chakʼ ta ilel David kʼu yelan chchabivan li Diose, li ta Salmo 23:4 jaʼ xa lik skʼopon stuk li Jeovae, maʼuk xa laj yalbe skʼoplal kʼuchaʼal jun jchabichij. Taje chakʼ ta ilel ti lek tajek xil sba xchiʼuk li Jeovae. Li Davide snaʼoj lek ti muʼyuk chʼaybil ta oʼontonal yuʼun li Diose xchiʼuk ti x˗ojtikinbat lek li svokoltake. Jaʼ yuʼun, li Davide muʼyuk ta xiʼ.
Li ta yan chib versikuloetik chtal ta tsʼakal li ta Salmo 23 tsjel ti kʼu yelan tskoʼoltase: li ta versikulo 5 xchiʼuk 6 maʼuk xa chalbe skʼoplal li jchabichije, jaʼ xa chalbe skʼoplal jun yajval na ti chkʼot yajvulaʼale. Jech kʼuchaʼal jun krixchano ti lek xchʼamvan ta snae, jaʼ jech li Jeova eke lek la xchʼam li Davide. Mi junuk yajkontra David xuʼ smak ta be Jeova sventa xchabiate. Kʼalal la stsutses sloʼil li Davide, laj yal ti spatoj yoʼonton ti chkʼanat˗o yuʼun li Jeovae xchiʼuk ti lek kʼusi tspasbat ta sjunul xkuxlejale.
Li ta Salmo 23 chal ti kʼu yelan ta slekil yoʼonton chchabi yajtuneltak li Jeovae (1 Pedro 2:25).
a Ta junantik Vivliae, li salmo liʼe jaʼ numero 22. Ta skotole oy 150 salmoetik. Ta junantik Vivliae ti kʼu yelan chcholik talel li numero ta salmoe jaʼ tstsakik ta venta li stsʼib jmasoretaetik ta ebreoe. Li yantike jaʼ tstsakik ta venta ti kʼu yelan chcholik talel ta Septuaginta griegae. Taje jaʼ jlik Vivlia ti laj yichʼ jelubtasel ta ebreo ti kʼot ta tsutsel li ta xchibal siglo kʼalal muʼyuk toʼox talem Kristoe.
b Li ta Vivliae ep ta velta chalbe skʼoplal Dios —ti jaʼ Jeova sbie— ti xkoʼolaj ta jun Jchabichij xchiʼuk ti tskoʼoltas ta chijetik li yajtuneltak ti chtun yuʼunik li chabiel yuʼune (Salmo 100:3; Isaias 40:10, 11; Jeremias 31:10; Esekiel 34:11˗16).