Isaias 40:31 | «Li buchʼutik spatoj yoʼontonik ta stojolal Jeovae ta stsatsubik yan velta»

«Pe li buchʼutik spatoj yoʼontonik ta stojolal Jeovae ta stsatsubik yan velta. Toyol ta xvilik jech kʼuchaʼal li aguilaetike. Ta x˗anilajik, pe muʼyuk ta xkʼunibik; ta xanavik, pe muʼyuk ta xlubik» (Isaias 40:31, Xchʼul Kʼop Dios sventa Achʼ Balumil).

«Pero li bochʼotic jaʼ spatoj yoʼntonic o ta stojol Mucʼul Diose ch˗achʼub lec stsatsalic, ta xlichʼan lec xiqʼuic jech chac cʼu chaʼal xic. Lec xuʼ yuʼun ch˗anilajic, mu xlubic. Lec xuʼ yuʼun chanovic, mu xʼechʼ yoʼntonic o» (Isaias 40:31, Xchʼul Cʼop Jtotic Dios, ta skʼop Chenalhó).

Li kʼusi skʼan xal Isaias 40:31

Li Jeovaea jamal chalbe yajtuneltak ti chakʼbe stsatsalik sventa xkuch yuʼunik kʼusiuk vokolil tsnuptanike.

«Li buchʼutik spatoj yoʼontonik ta stojolal Jeovae ta stsatsubik yan velta». Li Diose chakʼbe stsatsal li buchʼu spatoj yoʼonton ta stojolal ti xuʼ yuʼun xkoltaate (Proverbios 3:5, 6). Jtos ti kʼu yelan tspas taje, jaʼ ti chakʼbe li xchʼul espiritu o li yipe (Lukas 11:13).

«Toyol ta xvilik jech kʼuchaʼal li aguilaetike». Sventa toyol xvilik li aguilaetik xchiʼuk ti xlichʼan lek xikʼike, tsmalaik li xkʼixnal balumil ti térmicas sbie. Kʼalal mi la sta li xkʼixnal balumil taje, chlichʼan li xikʼe xchiʼuk xjoyet muyel sventa toyoluk xvile. Jaʼ jech tspas kʼalal mi la sta li yan xkʼixnal balumile. Taje jaʼ chkoltaat sventa jal xvil xchiʼuk ti mu masuk xlub ti bu to kʼalal tskʼan chkʼote. Li skʼelobil ta sventa li aguilae jaʼ tskoltautik ta yaʼibel smelolal ti ep tajek kʼuxi xuʼ skoltautik li xchʼul espiritu Diose.

«Ta x˗anilajik, pe muʼyuk ta xkʼunibik». Li vokoliletik ta jnuptantike xuʼ xijkʼunib yuʼun xchiʼuk ti muʼyuk xa lek chkaʼi jbatik yuʼune. Pe sventa xkuch kuʼuntike, jaʼ chakʼbutik sjuʼel li Diose. Li Diose chakʼ kipaltik sventa jaʼuk jpastik li kʼusi leke, mu ventauk mi vokol li kʼusi ta jnuptantike. Xi laj yal li jtakbol Pablo ti tsots la snuptan svokoltake: «Oy jtsatsal sventa jpas skotol ta skoj li buchʼu chakʼbun juʼele» (Filipenses 4:13).

Stsʼak loʼil ta Isaias 40:31

Li Diose laj yalbe j˗alkʼop Isaias ti akʼo stsʼiba li kʼusi chal ta Isaias 40:31 ti leʼ xa van ta 2,700 jabil kʼalal muʼyuk toʼox talem li Kristoe. Li kʼusi laj yichʼ tsʼibael taje tspatbe yoʼonton skotol li yajtuneltak Diose. Yikʼaluk van laj yichʼ tsʼibael sventa spatbe yoʼonton li Judaetik ti chukbil batik ta Babilonia 70 jabile. Kʼalal sut ta slumalike, laj yakʼik venta ti kʼot ta pasel li kʼusi la stsʼiba li j˗alkʼop Isaiase (Isaias 40:1˗3). Li ta sjabilal 537 kʼalal muʼyuk toʼox talem li Kristoe, li Diose laj yakʼbe stsatsal li Judaetik sventa xbatik ta Jerusalen ti lokʼik tal ta Babiloniae, yuʼun nat tajek xanavikb xchiʼuk oy kʼusitik la snuptanik (Isaias 40:29).