2 Korintios 12:9 | «Xuʼ noʼox avuʼun ta sventa li coltael chacacʼbote»

«Lek xa-o li slekil yutsil koʼonton ta atojolale; yuʼun kʼalal kʼunoxuke, lek xa tsʼakal ch˗abtej ta atojolalik li juʼele» (2 Korintios 12:9, Xchʼul Kʼop Dios sventa Achʼ Balumil).

«Xuʼ noʼox avuʼun ta sventa li coltael chacacʼbote. Ta sventa ti muʼyuc tsotsote, jaʼ jech xuʼ chbat vinajuc o lec li jvuʼele» (2 Korintios 12:9, Xchʼul Cʼop Jtotic Dios, ta skʼop Chenalhó).

Li kʼusi skʼan xal 2 Korintios 12:9

Li Diose laj yalbe li jtakbol Pablo ti ch˗akʼbat sjuʼel sventa xkuch batel yuʼun li prevaetike xchiʼuk li kʼusi tsots tsnuptane.

«Lek xa-o li slekil yutsil koʼonton ta atojolale». Li kʼusi chal liʼe, jaʼ jech takʼbat s˗orasion li Pabloe, xuʼ van xi chichʼ jelubtasel xtoke «li slekil yutsil koʼontone jaʼ li kʼusi chtun avuʼune». Taje, jaʼ koltaat˗o Pablo sventa xuʼ stsal batel yuʼun li kʼusi tsnuptane. Kʼalal chal «li slekil yutsil koʼonton» o «li koltael chkakʼbot» xiʼe, chakʼ ta ilel ti ta slekil yoʼonton ta xakʼbutik Dios li slekil yoʼontone akʼo mi muʼyuk kʼusi jpasojtik sventa jtatik˗o. Li kartaetik la stsʼiba Pabloe te chakʼ ta ilel ti la stabe sbalil li slekil yutsil yoʼonton Diose. Akʼo mi la skontrain toʼox yajtuneltak Dios li Pabloe, pe akʼbat yipal sventa xuʼ xjel xchiʼuk ti skolta li yan krixchanoetik sventa xuʼ xkʼotik ta yajtsʼaklomtak Kristoe (1 Korintios 15:9, 10; 1 Timoteo 1:12-14). Jaʼ yuʼun, li Pabloe snaʼoj lek ti xuʼ xkoltaat yuʼun Dios sventa stsal yuʼun kʼusiuk noʼox ti yakal tsnuptan ta xkuxlejale.

«Yuʼun kʼalal kʼunoxuke, lek xa tsʼakal ch˗abtej ta atojolalik li juʼele». Li Kajvaltik Jeovaea la svulesbe ta sjol li jtakbol Pablo ti mas to chkiltik kʼu yelan ch˗abtej li sjuʼel Dios ta stojolal li jmulavil krixchanoetik xchiʼuk ti kʼunike (2 Korintios 4: 7;12 :8). Kʼalal snaʼoj ti oy noʼox spajeb li kʼusi spas yuʼun li jun yajtsʼaklom Kristoe xchiʼuk ti tskʼanbe koltael li Jeovae, chakʼ ti akʼo abtejuk ta stojolal li sjuʼel Diose (Efesios 3:16, Filipenses 4:13). Vaʼun, jaʼ jech chvinaj ti ch˗abtej li sjuʼel Dios ta stojolal li krixchano ti kʼun noʼoxe.

Stsʼak loʼil ta 2 Korintios 12:9

Li ta sjabilaltik 55 kʼalal talem xa ox Jesuse, li Pabloe la stsʼibabe batel karta ti akʼbat snaʼ yuʼun Dios sventa li yajtsʼaklomtak Kristo ta Korintoe. Li ta skartae te laj yalbe skʼoplal viniketik ti jchanubtasvanejetik ta alel ti slabanik li jtakbole, xuʼ van ta skoj ti kʼu yelan xvinaje o ti kʼu yelan chkʼopoje. Jaʼ yuʼun, li ta slajebal skartae laj yalbe skʼoplal ti jaʼ tʼujbil yuʼun Dios sventa xuʼ xkʼot ta jtakbole (2 Korintios 10:7-10; 11:5, 6, 13; 12:11).

Sventa xakʼ ta ilel ti jaʼ tʼujbil yuʼun Diose, li Pabloe laj yalbe skʼoplal ti jaʼ koltabil yuʼun Dios sventa spas batel li yabtele xchiʼuk ti xkuch yuʼun li epal prevaetik tsnuptane, yuʼun mu xuʼ yuʼun ta yipal stuk (2 Korintios 6:4; 11:23-27; 12:12). Li ta kapitulo 12 te chalbe skʼoplal ti oy jun ‹chʼix ta sbekʼtale›. Li chʼix taje xuʼ van jaʼ jun vokolil ta sbekʼtal o ti kʼu yelan chaʼi sbae, pe ti mu kʼusi xut sventa slokʼese (2 Korintios 12:7). Akʼo mi muʼyuk chalbe skʼoplal Pablo kʼusi ti svokole, pe jamal ta xal ti jaʼ chkoltaat yuʼun Dios sventa xuʼ xkuch batel yuʼune.

Li yajtsʼaklomtak Kristo avie, ta snuptanik vokoliletik xchiʼuk chichʼik kontrainel. Pe chpatbat yoʼontonik ti xuʼ xkoltaatik˗o li sjuʼel Diose xchiʼuk ti muʼyuk junuk preva ti xuʼ stsalatik˗oe. Jech kʼuchaʼal li jtakbol Pabloe xuʼ xi xal ta sjunul yoʼontonike: «Yuʼun jaʼo tsotsun kʼalal kʼunune» (2 Korintios 12:10).

Sventa xavaʼibe smelolal kʼusi chal li Xchibal sventa Korintiose, kʼelo li video liʼe.