Isaias 26:3 | «Mucʼul Dios, voʼot ta aventa lec jun yoʼnton chaʼyic li bochʼotic jaʼ noʼox laj yacʼ yoʼntonic ta atojole»

«Voʼot chachabi li buchʼutik jaʼ noʼox te tsaʼik koltael ta atojolale; chavakʼbe˗o jun oʼontonal, yuʼun jaʼ noʼox ta atojolal la spat yoʼontonik» (Isaias 26:3, Xchʼul Kʼop Dios sventa Achʼ Balumil).

«Mucʼul Dios, voʼot ta aventa lec jun yoʼnton chaʼyic li bochʼotic jaʼ noʼox laj yacʼ yoʼntonic ta atojole, yuʼun jaʼ noʼox chchʼunic ti voʼot chacoltaique» (Isaias 26:3, Xchʼul Cʼop Jtotic Dios, ta skʼop Chenalhó).

Li kʼusi skʼan xal Isaias 26:3

Li kʼusi chal li j˗alkʼop Isaias liʼe, chakʼ ta ilel ti oy ta yoʼonton Dios tskolta li buchʼu tspat yoʼontonik ta stojole. ¿Kʼuxi chut? Jaʼ kʼalal tskolta xchiʼuk ti junuk noʼox yoʼontonike.

«Voʼot chachabi li buchʼutik jaʼ noʼox te tsaʼik koltael ta atojolale». Li ta versikulo liʼe jaʼ chalbe skʼoplal li buchʼutik spatoj yoʼontonik ta stojolal Jeovae.a Li buchʼutik spatoj yoʼontonik ta stojolal Diose snaʼojik ti jaʼ noʼox xuʼ xkoltaatik yuʼune. Jech kʼuchaʼal liʼe, kʼalal oy kʼusi tsots skʼoplal tsnop tspasike, maʼuk noʼox tspat yoʼonton ta stojolal stukik, yuʼun skotol ora tstsakik ta venta kʼusi tsnop li Diose (Proverbios 3:5, 6). Sventa snaʼik li kʼusi tsnop Diose, chchanik li Vivliae xchiʼuk tsnopbeik skʼoplal li kʼusi la xchanike (Salmo 1:2; 119:15). Jech xtok, kʼalal oy kʼusi tsots tsnuptanike, tskʼanbeik koltael li Diose xchiʼuk tspasik orasion ta sjunul yoʼontonik sventa xuʼ xkoltaatik (Salmo 37:5; 55:22). Kʼalal jech tspasike, chakʼik ta ilel ti spatoj yoʼontonik ta stojolal li Diose xchiʼuk ta x˗akʼbatik jun oʼontonal.

«Chavakʼbe˗o jun oʼontonal». Li ta tsʼibetik ta orijinale chib to velta chvinaj li jpʼel kʼop ta ebreo sventa «jun oʼontonale». Taje jaʼ sventa xakʼ ta ilel ti lek tajek tsʼakal li jun oʼontonal chakʼ li Diose. Jaʼ yuʼun, oy xi chichʼ jelubtasele «te oy˗o li jun oʼontonale», «mero jun oʼontonal» o «batsʼi lekil jun oʼontonal». Jaʼ xkaltik, li buchʼutik spatoj yoʼontonik ta stojolal Jeovae, jech˗o batsʼi jun yoʼontonik, akʼo mi oy kʼusi tsnuptanik (Salmo 112:7; 119:165). Taje jaʼ ta skoj ti lek tajek xil sbaik xchiʼuk li Jeovae xchiʼuk ti chakʼik persa sventa jaʼuk spasik li kʼusi lek chil Diose (Proverbios 3:32; Isaias 48:18).

Li yajtuneltak Dios ti jun noʼox yoʼontonike, maʼuk skʼan xal ti muʼyuk xa chil˗o svokolik ta skoj ti chtunik ta stojolal Diose o ti muʼyuk xa tsvul˗o yoʼontonike (1 Samuel 1:6, 7; Job 6:1, 2; Salmo 31:9). Li kʼusi skʼan xale, jaʼ ti chkoltaatik yuʼun Dios sventa xuʼ stsal yuʼun li kʼusi tsnuptanike (Isaias 41:10, 13). Jech xtok, chtakʼbatik li s˗orasionike, vaʼun ch˗akʼbat spʼijilik, yipalik xchiʼuk chpatbat yoʼontonik (Salmo 94:19; Proverbios 2:6; Isaias 40:29). Jech oxal, ta skoj taje xuʼ jun noʼox yoʼontonik, akʼo mi tsots kʼusi yakal tsnuptanik (Filipenses 4:6,  7).

Stsʼak loʼil ta Isaias 26:3

Leʼ xa van ta 2,800 jabil kuxi li j˗alkʼop Isaias. Ti bu sventainoj Juda li vaʼ orae muʼyuk xa ox tukʼ chtunik ta stojolal Jeova li krixchanoetike. Ta skoj ti muʼyuk la sutes yoʼontonike, li Jeovae laj yakʼ permiso xichʼ lajesel Jerusalen ti jaʼ li kapital yuʼunike. Laj ta sjabilal 607 kʼalal muʼyuk toʼox talem li Jesuse.

Kʼalal skʼan toʼox sien jabil xichʼ lajesel li Jerusalene, li j˗alkʼop Isaiase la stsʼiba jun kʼejintabil albil kʼop sventa yichʼobil ta mukʼ Jeova ti te ta jtatik li ta kapitulo 26 (Isaias 26:1-6). Li ta kʼejoj taje, te chalbe skʼoplal ti ta mas jelavele chichʼ chaʼmeltsanel jun jteklum li ta yosilal Judae, ti jaʼ van skʼoplal li Jerusalene.

Li Jerusalene laj yichʼ chaʼmeltsanel ta sjabilal 537 kʼalal muʼyuk toʼox talem li Jesuse. Kʼalal laj yichʼ chaʼmeltsanele, li judaetik ti tukʼ yakʼoj sbaike xchiʼuk ti sut batel ta slumalike, xi laj yalike: «Oy kuʼuntik jun jteklum ti lek tsotse» (Isaias 26:1). Pe taje maʼuk ta skoj ti lek joybil o ti lek mukʼ smuroaltak li jteklume, yuʼun jaʼ ta skoj ti jaʼ chabibilik xchiʼuk ti kʼelbilik yuʼun li Jeovae (Isaias 26:2).

Jaʼ jech li avi eke, li buchʼutik spatoj yoʼontonik ta stojolal Jeovae chabibil chaʼi sbaik, yuʼun jaʼ kʼotem ta «Mukʼta Ton» xchiʼuk jaʼ kʼotem ta snakʼobbailik li Jeovae (Isaias 26:4).

Sventa xavaʼibe smelolal kʼusi chal li slivroal Isaiase, kʼelo li video liʼe.