Laj yich’ koltael ermanoetik ta 2022: Chkak’kutik ta ilel ti jk’anoj jbakutike

Li Vivliae yaloj xa ono’ox ti yantik tstsatsaj batel pask’op, nikeletik xchi’uk «kʼusitik toj xibal sba» li ta jk’ak’aliltike (Lukas 21:10,11). Li kabteltik chlik ta septiembre ta 2021 kʼalal ta agosto ta 2022 jamal vinaj ti yakal chk’ot ta pasel li k’usi chal li Vivliae. Yu’un ta smiyonal no’ox xkrixchanoetik laj yil svokolik ta skoj li pask’op ta Ucraniae xchi’uk ja’tik to no’ox ch-ech xtok li chamel COVID-19. Jech xtok, ep buch’utik laj yil svokolik ta skoj li nikel, nojelal ta vo’ xchi’uk yan k’usitike, jech k’ucha’al li nikel ech’ ta Haití xchi’uk li tsatsal ik’alo’ ech’ ta Centroamérica, Filipinas xchi’uk ta suresteal Áfricae. ¿K’u yelan koltavanik li stestigotak Jeovae?

Li ta septiembre ta 2021 kʼalal ta agosto ta 2022, li j-organisasiontike oy k’usitik la xchapan sventa skolta li buch’utik laj yil svokolike, te van 200 ta koj vokoliletik koltavanik. Ja’ yu’un, te van 12 miyon dolara laj ku’untik. Jk’eltik avil k’uxi laj yich’ tunesel li matanal tak’in sventa xich’ koltael li buch’utik laj yil svokolik ta cha’tos vokolile.

Ech’ nikel ta Haití

Li ta 14 yu’un agosto ta 2021 ech’ jun tsatsal nikel ta sural Haití ti 7.2 stsatsale. Cham cha’vo’ kermanatik xchi’uk jun ermano. Toj ep laj yat yo’ontonik li buch’utik laj yil svokolik ta nikele. Jun stestigo Jeova ti Stephane sbie xi chale: «Toj ep tajek buch’utik cham li ta jteklume, yu’un jalij chib u ti oy no’ox buch’utik tsmukike». Yan stestigo Jeova ti Éliézer sbie xi chale: «Ep stestigotak Jeovae mu’yuk kom snaik, sk’u’ik, xonobik xchi’uk li k’usitik jtunel yu’unike. Jech xtok, ta skoj ti jujulikel to chnik li balumile, oy jayibuk u ti ta xi’el to oyik li krixchanoetike».

Li j-organisasiontike ta nil no’ox lik koltavanuk, li Betel ta Haitie laj yak’ 53 tonelada ve’liletik, laj yak’ karpanaetik, lonaetik, kolchonetik xchi’uk xk’ixnaobil selularetik ti ta k’ak’al ch-abteje. Jech xtok, mas ta 100 naetik ti la stuk’ulanik xchi’uk ti la xcha’va’anike. Laj yich’ tunesel mas ta 1 miyon dolar sventa xich’ pasel li abtelal taje.

Li kermanotaktike tstojik tajek ta vokol, xi chal Lorette: «K’alal ech’ li nikele, laj li jnakutike xchi’uk li jp’olmalkutike xchi’uk mu’yuk xa k’usi jlajeskutik, pe li s-organisasion Jeovae la skoltaunkutik, yu’un ta yorail no’ox laj yak’bunkutik li k’usi chtun ku’unkutike». Xi chal Micheline: «Li vu’un xchi’uk li cha’vo’ kalabtake nakalunkutik ta jun bik’it na ti anil lom ta nikele. Li k’usi no’ox xu’ jpas laj ka’ie ja’ ti jk’opon li Jeovae, va’un la stunes s-organisasion li Jeova sventa stak’bun li j-orasione. Koliyal ti la skoltaunkutik li ermanoetike, avie oy xa jun kuni nakutik ti mas xa xkuch yu’une. Li Jeovae ep k’usitik spasoj ta jtojolal. Ja’ yu’un, jujun k’ak’al ta jk’an chkak’be yil ti ta jtoj ta vokole».

K’alal ta j-abteletik laj yilik li koltael laj kak’tike. Li jun j-abtel ta jteklum L’Asile xi chale: «Ta jk’an chkalboxuk ti toj lek ti ta anil no’ox chtal koltavananike. ¡Pe ma’uk no’ox! Yu’un skotol ora chatsakik ta venta li j-abteletike. Lek tajek chkil ti ma’uk batem ta avo’ontonik li tak’ine, yu’un ja’ chak’an chakoltaik li krixchanoetike, xvinaj ti ak’anoj abaike».

Ech’ tsatsal ik’alo ta Malaui xchi’uk ta Mozanbique ti Ana sbie

Li ta 24 yu’un enero ta 2022, li tsatsal ik’alo’ Anae k’ot ta Mozambique, ta mas ts’akale k’ot ta Malaui. Tsots tajek yak’ vo’ xchi’uk tsots tajek ech’ ik’ ti te van 100 kilometro ta ora chanave. Bat yu’un lus, la slomes bak’ojetik xchi’uk ep buch’utik nojik ta vo’.

Mas ta 30 mil stestigotak Jeova laj yil svokolik ta skoj li tsatsal ik’alo’ ech’ ta Malaui xchi’uk Mozambiquee. Jun ermano ti Charles sbi ti tskolta li ermanoetike xi chale: «K’alal laj kil ti oy svokol li ermanoetike xchi’uk ti mu’yuk xa k’usi x-ayan yu’unike, laj kat tajek ko’onton xchi’uk muyuk xa k’usi stak’ jpas laj ka’i». Jech xtok, ak’o mi sk’ejoj jutuk yuni ve’elik xchi’uk ak’o mi oy k’usi sts’unojik, pe laj skotol ta vo’ xchi’uk lomanuk li snaike. Oy jun ermano cham yajnil xchi’uk cha’vo stsebatak, yu’un valk’uj li lancha bu tik’ajtike va’un jik’avik.

Toj ech’ xa no’ox tsots ech’ li ik’alo’e. Li uts’ alalil Sengeredo ti te nakal ta Nchalo, Malaui, oy k’usi tsots ya’iik bak’ te van ta la 1 ta sob, ch-och xa vo’ ta snaik ¡yu’un k’ejav chib to yok’ uk’um! Li ermanoe la snop ti ja’ lek ti xlok’ik ech’el xchi’uk li yuts’ yalale. Lek ti jech k’ot ta nopel yu’unike, yu’un mu ta sjaliluke ech’ slomes uk’um li snaike xchi’uk kuchbat ech’el skotol li k’usi x-ayan yu’unike. Batik li ta Salon sventa Tsobobbail ti 30 minuto xilike, pe li va’ orae chib to ora yo’ k’otik-oe, t’uxulik xchi’uk lubemik xa ox tajek, pe lek k’otik.

Li Beteletik ta Malaui xchi’uk Mozambiquee ta anil no’ox la xchapanik ti k’uxi xu’ skoltaik li ermanoetike. Ja’ la sk’anbeik li jk’elvanejetik ta sirkuito xchi’uk li moletik ta tsobobbail ti ak’o sk’elik li k’usi chtun yu’unik li ermanoetik ti laj yil svokolik sventa spatbeik yo’onton xchi’uk stsatsubtasik ta mantale. Likik no’ox ta abtel li Komite ti chtunik ta skoltael li ermanoetik sventa sk’elik ti k’u yelan oyike, ja’ yu’un li ermanoetike lik no’ox yich’ sve’elik xchi’uk li k’usi chtun tajek yu’unike. Laj yich’ tunesel mas ta 33 mil dolar sventa xich’ koltael li krixchanoetike xchi’uk mas ta 300 mil dolar sventa xich’ tuk’ulanel o xich’ cha’va’anel naetik.

Li Komiteetik ti tskoltaik li ermanoetike lek tajek la stunesik li matanal tak’ine, yu’un toy tajek stojol skotol li k’usitik chich’ manele. Jech k’u cha’al li’e, ka’lal naka to’ox vukub u lik skoltaik li ermanoetike, li stojol s-arinail ixim ti ja’ sve’elik jujun k’ak’al ta Malauie mas ta j-o’lol toy stojol xchi’uk toy tajek stojol li gase. Ja’ yu’un, li ermanoetike te no’ox nopol la smanik li ve’lil sventa mu stojbeik spasajeal o skarroal xchi’uk ta epik la smanik sventa masuk yaleluk xlok’.

Skotol li k’usitik chich’ pasel taje chk’ot ta yo’ontonik li yajtuneltak Jeovae. Jun ermano ta Mozanbique ti Felisberto sbie xi chale: «Mu’yuk bu kiloj yan organisasion jech k’ucha’al li s-organisasion Jeovae, yu’un chak’butik li materialetik sventa jva’an jnatike, tstakik tal j-abteletik, ve’liletik xchi’uk ta slekil yo’onton ta tsbeiltasutik. Ja’ jech sk’anoj sbaik jech k’ucha’al laj yal Jesus ta Juan 13:34, 35». Ester ti ja’ jun ermana ta Malaui ti chamem smalal xchi’uk ti laj snae xi chale: «¡Mu xa jna’ k’usi ta jpas! Yu’un ch’abal jtak’in sventa jcha’vaan jna. Ja’ yu’un, k’alal k’ot sva’anik jna li ermanoetike, xko’olaj xa ta paraiso oyun laj ka’i».

Yo’ to ta jmalatik chtal li ach’ balumile yantik stsatsaj batel li vokoliletike (Mateo 24:7, 8). Pe koliyal ti toj lek avo’ontonik ti chavak’ik matanal tak’ine, jnaojtik lek ti ta yorail no’ox chich’ koltael li steklumal Jeova k’alal ja’o oy svokolike. Li ta donate.jw.org te chal k’uxi ta ak’el matanal tak’in. ¡Ta jtojkutik ta vokol ti toj lek avo’ontonike!