Nota

d Li Jerjes I, mas laj yichʼ-o ojtikinel ta skoj ti jech tskʼan xichʼ pasel kʼusitik kʼuchaʼal tskʼan stuke yuʼun mi moʼoje chlik ilinuk ta jyalel. Li j-al-loʼil griego Heródoto sbie, chal ti toj chopol stalelal kʼalal la spas kampanya sventa paskʼop xchiʼuk li Greciae. Jun veltae laj yal mantal ti akʼo spasik jun bakʼo ti ikbil ta varkoetik li ta skʼob nab ti Helesponto sbie. Kʼalal la sokes bakʼo li ikʼal tsatsal voʼe, ta skoj ti kap tajeke laj yal mantal ti akʼo xtuchʼbeik snukʼ li injenieroetike xchiʼuk ti xakʼbeik «stoj smul» xkaltik li voʼe, yuʼun la xchopol kʼopta xchiʼuk la stsits ta nukul li voʼe. Kʼalal jaʼo li kampanya taje, oy jun jkʼulej vinik ti la skʼanbe vokol li ajvalil sventa mu x-och ta soltaroal li skereme, pe li ajvalile kap tajek sjol, yuʼun laj yal mantal ti akʼo xtuchʼik ta oʼlol li kereme xchiʼuk ti sjokʼanik ta yeloval satil sventa xuʼ xiʼik li krixchanoetike.