Jeremias

28 Li vaʼ jabil onoʼoxe, kʼalal skʼan toʼox stsʼaki chanib jabil yochel ta ajvalil ta Juda li Sedekiase,+ jaʼo ta svoʼobal u, li j-alkʼop Ananias ti jaʼ xnichʼon Asur ti likem ta Gabaone+ oy kʼusi laj yalbe li Jeremias te ta sna Jeova kʼalal te oyik li paleetike xchiʼuk sjunul li jteklume, xi laj yalbee: 2 «Xi chal li Jeova ti jaʼ bankilal yuʼun soltaroetike,* ti jaʼ li Dios yuʼun Israele: ‹Ta jkʼasbe li kʼatlom teʼ yuʼun ajvalil ta Babiloniae.+ 3 Leʼ batel ta chib jabile, chkichʼ sutel tal liʼ ta jteklum li kʼusitik jtunelik ta sna Jeova ti laj yichʼ batel ta Babilonia li ajvalil Nabukodonosore›».+ 4 «‹Jech xtok, chkikʼ sutel tal li Jekonias+ ti jaʼ xnichʼon Jeoiakim+ xchiʼuk ti jaʼ ajvalil ta Judae xchiʼuk skotol li judaetik ti laj yichʼik chukel batel ta Babiloniae,+ yuʼun ta jkʼasbe li skʼatlom teʼ ajvalil ta Babiloniae›, xi li Jeovae».

5 Vaʼun, li j-alkʼop Jeremiase la skʼopon li j-alkʼop Ananias te ta yeloval li paleetike xchiʼuk ta yeloval sjunul li jteklum ti te vaʼalik ta sna Jeovae. 6 Xi laj yal li j-alkʼop Jeremiase: «¡Jechuk!* ¡Akʼo jechuk xkʼot ta pasel yuʼun li Jeovae! ¡Akʼo kʼotuk ta pasel yuʼun Jeova li kʼusi laj aval ti chkʼot ta pasele xchiʼuk akʼo yichʼ sutel tal li kʼusitik jtunelik ta sna Jeova ti batem ta Babiloniae xchiʼuk akʼo yikʼ sutel tal skotol li buchʼutik chukbilik batele! 7 Akʼo mi jech, avokoluk, chikintao li aʼyej chkal avaʼie xchiʼuk ti chkalbe yaʼi sjunul li jteklume. 8 Yuʼun li j-alkʼopetik ta voʼne ti baʼyel echʼik kuʼune xchiʼuk ti baʼyel echʼik avuʼun eke laj yalik albil kʼopetik ta sventa epal mukʼtik lumetik xchiʼuk tsatsal jteklumetik ta sventa paskʼop, vokoliletik xchiʼuk tsatsal chameletik. 9 Mi oy junuk j-alkʼop chal ti ch-ayan jun oʼontonal xchiʼuk ti chkʼot ta pasel li kʼusi chale, vaʼun bi, chichʼ naʼel ti ta melel takbil tal yuʼun Jeova li j-alkʼop taje».

10 Vaʼun, li j-alkʼop Ananiase la snit lokʼel li kʼatlom teʼ ti te kʼatal ta snukʼ li j-alkʼop Jeremiase xchiʼuk la skʼas.+ 11 Laje, li Ananiase xi laj yal ta yeloval sat sjunul li jteklume: «Xi chal li Jeovae: ‹Leʼ batel ta chib jabile, jaʼ jech ta jkʼasbe li skʼatlom teʼ Nabukodonosor ti jaʼ ajvalil ta Babilonia ti te kʼatal ta snukʼik skotol li mukʼtik lumetike›».+ Laje, la stam batel sbe li j-alkʼop Jeremiase.

12 Kʼalal laj xa ox skʼas j-alkʼop Ananias li kʼatlom teʼ ti te kʼatal ta snukʼ li j-alkʼop Jeremiase, xi albat yuʼun Jeova li Jeremiase: 13 «Batan, xi xbat avalbe li Ananiase: ‹Xi chal li Jeovae: «Laj xa akʼas jun kʼatlom teʼ ti pasbil ta teʼe,+ pe chichʼ pasel yan kʼatlom teʼ ti pasbil ta tsatsal takʼine». 14 Yuʼun xi chal li Jeova ti jaʼ bankilal yuʼun soltaroetike, ti jaʼ li Dios yuʼun Israele: «Skotol li vaʼ mukʼtik lumetike ta jkʼatanbe ta snukʼik jun kʼatlom teʼ ti pasbil ta tsatsal takʼin sventa xtunik ta stojolal li Nabukodonosor ti jaʼ ajvalil ta Babiloniae, vaʼun persa chtunik ta stojolal.+ Jech xtok, chkakʼbe sventain teʼtikal chonbolometik ta osiltik li ajvalile»›».+

15 Vaʼun, li j-alkʼop Jeremiase xi laj yalbe li j-alkʼop Ananiase:+ «Ananias, ¡avokoluk, chikintao! Muʼyuk stakojot tal li Jeovae, yuʼun jecheʼ noʼox li kʼusi laj avalbe li jteklum ti la spat-o yoʼontonike.+ 16 Jaʼ yuʼun, xi chal li Jeovae: ‹¡Kʼelavil! Ta jtupʼ lokʼel akʼoplal li ta sba balumile. Chacham li jabil liʼe, yuʼun la atijbe yoʼonton yantik sventa stoy sbaik ta stojolal li Jeovae›».+

17 Jaʼ yuʼun, li j-alkʼop Ananiase cham onoʼox li vaʼ jabile, ta svukubal u.