Jeremias
41 Li ta svukubal ue, li Ismael+ ti jaʼ xnichʼon Netanias xchiʼuk ti jaʼ smom Elisamae, ti jaʼ snitilulal ajvalile xchiʼuk ti jaʼ jun vinik ti mas tsots skʼoplal yuʼun li ajvalile, tal xchiʼuk lajunvoʼ sviniktak sventa xtal skʼoponik li Guedalias ti jaʼ xnichʼon Aikam ta Mispae.+ Kʼalal jaʼo te tsobol chveʼik ta Mispae, 2 li Ismael ti jaʼ xnichʼon Netanias xchiʼuk li lajunvoʼ sviniktake vaʼiik, lik smilik ta espada li Guedalias ti jaʼ xnichʼon Aikam xchiʼuk ti jaʼ smom Safane. Vaʼun, jaʼ jech la smil li buchʼu svaʼanoj ta skʼelel jteklum li ajvalil ta Babiloniae. 3 Jech xtok, li Ismaele la smil skotol li judaetik ti te xchiʼukik li Guedalias ta Mispae, la smil xtok li yajsoltarotak jkaldeaetik ti te oyike.
4 Li ta yokʼomal kʼalal laj xa ox yichʼ milel li Guedaliase, kʼalal muʼyuk toʼox buchʼu snaʼoje, 5 tal 80 ta voʼ viniketik ti likemik talel ta Sikem,+ ta Silo+ xchiʼuk ta Samariae.+ Li viniketike xjuxoj tal yisimik, xchʼiʼoj ta jatel li skʼuʼ spokʼike, xtuchʼojan sbekʼtalik,+ yichʼojik tal matanal sat tsʼunobiletik xchiʼuk yichʼojik tal sakil pom*+ sventa tal yakʼik ta sna Jeova. 6 Jaʼ yuʼun, li Ismael ti jaʼ xnichʼon Netaniase lokʼ batel ta Mispa sventa xbat snupan tal ta be, x-okʼolet kʼalal jaʼo chanav batele. Kʼalal la staan ta bee, xi laj yalanbee: «Laʼ kʼelavilik li Guedalias ti jaʼ xnichʼon Aikame». 7 Pe kʼalal ochik li ta jteklume, li Ismael ti jaʼ xnichʼon Netaniase xchiʼuk li sviniktake la smilik li viniketik taje xchiʼuk la sjipik ochel ta poso.
8 Pe oy lajunvoʼ viniketik yuʼunik ti xi laj yalbeik li Ismaele: «Mu xamilunkutik, yuʼun oy jnakʼojkutik* yavil trigo, sevada, aseite xchiʼuk pom ta osiltik». Jaʼ yuʼun, muʼyuk te kapal laj yichʼik milel xchiʼuk li xchiʼiltakike. 9 Vaʼun, li Ismael ti jaʼ xnichʼon Netaniase la sjipbe ochel ta jun mukʼta poso sbekʼtal li viniketik ti la smile, li mukʼta posoe jaʼ la spas li ajvalil Asa kʼalal yakal toʼox tspasik kʼop xchiʼuk li Baasa ti jaʼ ajvalil ta Israele.+ Taje jaʼ li poso ti la snojesbe ta sbekʼtal li viniketik ti laj yichʼik milele.
10 Li Ismaele la xchuk batel skotol li skomenal* krixchanoetik ta Mispae,+ ti te tsakal skʼoplal li stsebetak ajvalile xchiʼuk li buchʼutik te to oyik ta Mispae, ti jaʼ toʼox la sbain skʼelel li Guedalias+ ti jaʼ xnichʼon Aikam ti jaʼ ta smantal li Nebusaradan ti jaʼ bankilal yuʼun jchabivanejetike. Li Ismael ti jaʼ xnichʼon Netaniase la xchuk batel skotolik, vaʼun xanavik batel sventa xbatik ti bu oy li j-ammonetike.+
11 Li Joanan+ ti jaʼ xnichʼon Kareae xchiʼuk skotol li bankilal soltaroetik ti te xchiʼuke laj yaʼiik skotol li kʼusitik chopol la spas Ismael ti jaʼ xnichʼon Netaniase, 12 vaʼun laj yikʼik batel skotol li viniketike, bat stsakik ta kʼop li Ismael ti jaʼ xnichʼon Netaniase, te la staik ta xokon ti bu tsʼanal epal voʼ* ta Gabaone.
13 Skotol li krixchanoetik ti xchukoj batel li Ismaele muyubajik tajek kʼalal laj yilik li Joanan ti jaʼ xnichʼon Kareae xchiʼuk skotol li bankilal soltaroetik ti te xchiʼuk batele. 14 Vaʼun, skotol li krixchanoetik ti ay xchuk lokʼel ta Mispa+ li Ismaele, joyijik sutel xchiʼuk bat xchiʼinik li Joanan ti jaʼ xnichʼon Kareae. 15 Pe li Ismael ti jaʼ xnichʼon Netaniase xchiʼuk li vaxakvoʼ sviniktake jatavik ta stojolal li Joanane xchiʼuk te batik ti bu oyik j-ammonetike.
16 Li Joanan ti jaʼ xnichʼon Kareae xchiʼuk skotol li bankilal soltaroetik ti te xchiʼuke laj yikʼik sutel li skomenal* krixchanoetik ta Mispae, ti la spojbeik lokʼel ta skʼob li Ismael ti jaʼ xnichʼon Netanias kʼalal smiloj xa ox li Guedalias+ ti jaʼ xnichʼon Aikame. Laj yikʼik sutel ta Gabaon li viniketike, li antsetike, li ololetike xchiʼuk li bankilal j-abteletik ta pasob mantale. 17 Jaʼ yuʼun, batik xchiʼuk te komik li ta vayebal yuʼun Kimam ti te nopol ta Belene,+ yuʼun oy ta yoʼontonik ti stam batel sbeik sventa xbatik ta Ejipto+ 18 ta skoj li jkaldeaetike. Yuʼun xiʼemik ta stojolal li jkaldeaetike, yuʼun li Ismael ti jaʼ xnichʼon Netaniase la smil li Guedalias ti jaʼ xnichʼon Aikame, ti jaʼ li buchʼu la svaʼan li ajvalil ta Babilonia sventa tskʼel li jteklume.+