Ximuyubajkutik ti la atsak abi li ta Chanob vun sventa Kabteltik yuʼun Diose

LI TA mas ta chib sien lumetik ta spʼejel Balumile, ta smiyonal noʼox jchanunetik tstabeik sbalil li Chanob vun sventa Kabteltik yuʼun Dios ti ch-echʼ jujun xemanae. Junantike achʼik to, pe li yantike voʼne xa yochelik. Mu ventauk ti bu nakalote, xuʼ xatabe sbalil li chanob vun chapanbile. Ta moton chichʼik chanubtasel manchuk mi jeltos sjabilalik, stsʼunbalik xchiʼuk stalel xkuxlejalik.

Li stestigotak Jeovae lik spasik ta 1943 li chanun taje xchiʼuk xi laj yichʼ albel skʼoplal ti kʼusi stu laj yichʼ pasele: «Akʼo yichʼik lek tojobtasel skotol li ‹tukʼil viniketik› ti yaʼiojik xa li Skʼop Diose xchiʼuk ti yakʼoj xa xchʼunel yoʼontonike, yoʼ ‹lek chapalik sventa chchanubtasik batel li yantike› [...] ti xtojobikuk lek ta yalel batel ta jamal li kʼusi spatoj-o yoʼontonike» (Course in Theocratic Ministry [Chanubtasel sventa Kabteltik yuʼun Dios], paj. 4). Jaʼ jech stu li avi eke.

¿Kʼu yelan lek ta tunesel li jmotontik yakʼojbutik Dios ti xuʼ chijkʼopojutike? Xi tstakʼ li Vivliae: «Scotol li cʼusitic chichʼic iqʼue acʼo yichʼic ta mucʼ li Mucʼul Diose» (Sal. 150:6). Xkuxet yoʼonton kuʼuntik li Jtotik ta vinajel mi jech ta jpastike xchiʼuk jaʼ jech ta jtojbetik ta vokol li slekil yoʼontone xchiʼuk ti skʼanojutike. Mu labaluk chkaʼitik ti xi chkichʼtik albel li yajtsʼaklomutik Kristoe: «Jech-o me kakʼtik milbil matanaletik ti jaʼ skʼupil kʼoptael li Diose, jaʼ xkaltik, jaʼ li kʼusi chlokʼ ta ketik ti jamal chalbe skʼoplal ta stojolal krixchanoetik li sbie» (Evr. 13:15). Ta skoj ti oy ta koʼontonkutik ta jkoltaotkutik yoʼ xavichʼ-o ta mukʼ Jeova ta sventa li matanal yakʼojbote, ximuyubajkutik ti la atsak abi li ta Chanob vun sventa Kabteltik yuʼun Diose.

Li ta chanob vune tsots skʼoplal li skʼelel o yaptael vun ta yeloval krixchanoetike, ti xijtojob lek ta yetʼesel mantale xchiʼuk ti xijchanubtasvane, pe maʼuk noʼox taje, yuʼun oy to yan sbalil. Kʼalal chajelav ta chanob vune jaʼ tskoltaot sventa xatojob lek ta: skʼelel vun, ta xchikintael lek, ta skomesel ta ajol, ta xchanel, ta sabel smelolal, ta skʼelbel lek skʼoplal xchiʼuk ti xchapetuk lek avuʼune, ti xanaʼuk xaloʼilaj leke, ti xtakʼ avuʼun li sjakʼobiltake xchiʼuk ti kʼu yelan chatsʼibaje. Li Vivlia xchiʼuk jvuntike jaʼ li kʼusi mas tsots skʼoplal skʼan xatunes venta xachanunaj, sventa xaval aloʼil xchiʼuk xavetʼes li apartee. Mi laj avojtikin batel li kʼusi yan sba yutsil chchanubtasvan li ta Vivliae, jech xa me chlik anop kʼuchaʼal li Jpasvaneje, vaʼun xuʼ chatabe sbalil ta akuxlejal. Oy jun maestro ta siglo 20 ti William Lyon Phelps sbie, chal ti ep sbalil li Vivliae: «Skotol li buchʼu xojtikin lek li Vivliae xuʼ xkaltik ti lek chaneme. [...] Chkal voʼone li yojtikinel Vivliae jaʼ mas tsots skʼoplal manchuk mi muʼyuk chanunajemutik ta universidad, jaʼ mu sta li chanun ta universidad mi mu xkojtikintik li Vivliae».

Tabo lek sbalil

Skʼan onoʼox xavakʼ persa sventa xatabe sbalil li Chanob vun sventa Kabteltik yuʼun Diose. Li jtakbol Pabloe xi laj yalbe mantal li xchiʼil ta chʼunolajel ti jaʼ li Timoteoe: «Nopbo skʼoplal li kʼusitik taje; akʼo me tajek ta avoʼonton sventa lek jamal xil skotol krixchanoetik ti lek chbat avuʼune» (1 Tim. 4:15). ¿Kʼu yelan xuʼ xavakʼ ta akuxlejal li mantal taje?

Akʼo persa xabat jujun xemana li ta tsobajele. Jech xtok tojoban lek ta stunesel li livro TABO SBALIL LI CHANOB VUN SVENTA KABTELTIK YUʼUN DIOSE. Te xatsʼiba abi li ta slikebal livroe xchiʼuk ichʼo-o me batel li ta tsobajeletike.

Li livro liʼe xuʼ jtunestik xtok kʼuchaʼal jlik kuaderno. Kʼalal chakʼele, bono li kʼusi mas tsotsik skʼoplal chtun avuʼune xchiʼuk tuneso li stiʼiltak vun sventa xatsʼiba li kʼusi la achane.

Mu me xchʼay xavaʼi ti persa skʼan xatunes Vivlia kʼalal chachapan aba jujun xemanae. Akʼo me ta avoʼonton li skʼelel Vivlia jujun xemanae. Jech xtok, ta me xatabe ep sbalil mi baʼyel onoʼox chakʼel li butik lokʼem li yan parteetike.

Akʼo me ta avoʼonton ti xavakʼ aloʼil li ta tsobajele, yuʼun jaʼ tskoltaot sventa xvul ta ajol li kʼusitik la achane xchiʼuk ti xuʼ xavakʼ ta akuxlejale.

Li ta tsobobbaile ta me xavetʼes mantal xchiʼuk skʼelobiltak cholmantal jech kʼuchaʼal tspasik li yan jchanunetike. Tabo me lek sbalil ta jujutos li kʼusitik taje, akʼo persa spasel li kʼusi cha-albate sventa xatojob ti kʼutik yelan chavetʼes mantale. Jech me chavichʼ-o albel mantal yoʼ xatojob batel, jaʼ yuʼun chʼamo me ta sjunul avoʼonton. Tsʼibao ta alivro li kʼusi cha-albate. Manchuk mi voʼne xa atsakoj abi li ta chanob vune, li kʼusi cha-albate xchiʼuk li tojobtasel ta Vivliae ta me skoltaot sventa xachʼi batel ta mantal, yuʼun bakʼintik li yantike jaʼ xilik li kʼusi chtun kuʼuntike (Prov. 1:5).

¿Mi oy ta avoʼonton ti xatojob batel mase? Tspas avuʼun mi laj avakʼ persae. Chano baʼyel ti butik chlokʼ li parteetike. Mi jech chapase, xuʼ voʼot chavetʼes mi muʼyuk kʼot li buchʼu sbainoj junuk partee, vaʼun jaʼ jech chachan batel mas. Akʼo venta ti kʼu yelan chetʼesik li yantike, vaʼun jaʼ jech xuʼ xachanbe ek.

Mi xuʼ avuʼune, xuʼ xachan atuk li livro liʼe. Mi laj xaʼox achan li yan voʼlajuneb xchanobil chtale, xuʼ xachan ti bu xi chale: «Programa sventa xatojob ta yetʼesel mantal xchiʼuk sventa xakʼot ta jchanubtasvanej» ti te chlik ta pajina 78 kʼalal ta pajina 82. Chano baʼyel li jujun xchanobile xchiʼuk akʼo ta avoʼonton spasel ti bu chal «Paso liʼe», vaʼun jech xapas li ta cholmantale. Mi jech chapase, chatojob batel mas ti kʼu yelan chavetʼes mantale xchiʼuk chakʼot ta lekil jchanubtasvanej li ta Skʼop Diose.

Li chanob vune tskoltaot ta spasel li kʼusi mas tsots skʼoplale. Ta skoj ti jaʼ koliyal Dios ti kuxulutike, sta-o tajek ti jmuyubtatike xchiʼuk ti jkʼupil kʼoptatike (Apok. 4:11). Li kʼusi ta jchantik ta chanob vune jaʼ tskoltautik sventa spas kuʼuntik li kʼusitik taje, yuʼun jaʼ tskoltautik sventa lekuk li kʼusi ta jnoptike, ti lekuk jpas jtalelaltike xchiʼuk ti xijtojobutik lek ta yalbel smelolal li kʼusitik melel ta Vivlia ti yan sba yutsile.