LI TA yantik lume lek nopem xaʼiik ti kʼu yelan tsbakʼes sbekʼtalike. Pe skotol krixchano jeltos kʼu yelan nopem xaʼiik tsbakʼes satik o yantik kʼalal chkʼopojike, manchuk mi jun noʼox buchʼu chchiʼin ta loʼil o jaʼo kʼalal tsjelubtasik mantal sventa skotol krixchanoetike.

Li Jesus xchiʼuk yajchankʼoptake nopem xaʼiik ti tsbakʼes skʼobik o tspasik yantik senyail kʼalal chkʼopojike. Jun velta kʼalal albat ti tal kʼelatuk yuʼun smeʼ xchiʼuk yitsʼinabtak li Jesuse, xi la stakʼe: «¿Buchʼu li jmeʼe xchiʼuk buchʼutik li jbankil kitsʼinabtake?». Xi to chal li Vivliae: «La syeʼ batel skʼob ti bu oy yajchankʼoptake, vaʼun xi laj yale: ‹¡Kʼelo avil! ¡Liʼe jaʼ jmeʼ xchiʼuk jaʼik li jbankil kitsʼinabtake!›» (Mat. 12:48, 49). Li yan tekstoetik jech kʼuchaʼal ta Echos 12:17 xchiʼuk 13:16 chal ti la spasik senya ta skʼobik li Pedro xchiʼuk Pabloe.

Li kʼusitik chkalbetik skʼoplal xchiʼuk ti kʼu yelan chkaʼi jbatike maʼuk noʼox te ta xvinaj li ta jkʼopojeltike, te chvinaj xtok li ta jsatike. Mi muʼyuk lek ta jpastik li senyailtak ta jsatike, xuʼ xakʼ ta aʼiel ti muʼyuk ta koʼontontik li kʼusi chkaltike; pe mi lek sta-o li kʼusi chkaltike, lek chbat li mantal chketʼestike. Mi chijkʼopoj ta telefonoe, mas me lek ta aʼiel li kʼusi tsots skʼoplal chkaltik mi ta jbakʼes lek jsatik, jkʼobtik o yantike, jech chkakʼtik ta aʼiel xtok ti kʼu yelan chkaʼi jbatike. Jaʼ yuʼun, jtunel me mi chabakʼes akʼob xchiʼuk asat manchuk mi chaloʼilaj noʼox, chakʼel o chavapta vun, jech xapas manchuk mi tskʼel Svivliaik o mi voʼot tskʼeloxuk li buchʼutik tee.

Mu persauk jchantik ta jlikuk livro ti kʼu yelan skʼan jbakʼes jbekʼtaltike. Yuʼun mu persauk la achan ta jlik livro ti kʼu yelan chatseʼin o cha-iline. Jaʼ jech kʼalal ta jbakʼes jkʼobtik eke, jaʼuk jech jpastik ti kʼu yelan chkaʼi jbatike. Mas to me lek mi muʼyuk chanbil ti kʼu yelan ta jpastike.

Oy chaʼtos smelolal ti ta jbakʼes jbekʼtaltike: sventa xkaltik kʼu yelan xchiʼuk sventa xkakʼtik ta aʼiel li kʼusi tsots skʼoplale. Li sventa chkaltik kʼu yelane, jaʼ sventa chkakʼtik ta aʼiel li kʼusi kʼot ta pasele o chkakʼtik ta aʼiel kʼu smukʼul o bu xkom. Mi jaʼ yakal chachanbe skʼoplal li xchanobil liʼe, skʼan me ep ta velta xabakʼes li akʼobe. Kʼalal chabakʼes abekʼtale, akʼo persa ti jech xapas kʼuchaʼal onoʼox nopem xavaʼi spasele, jech-o xapas ti kʼu sjalil chavetʼes apartee. Mi vokol chavaʼie, mas lek ti xatunes jpʼelantik kʼop ti chakʼ ta aʼiel bu xkom, kʼu snamal, kʼu smukʼul, kʼu staylej o yantik. Li ta junantik partee mu persauk xanop ti kʼu yelan cha-ilat yuʼun li yantike, jaʼ noʼox venta mi chavakʼ ta avoʼonton li kʼusi yakal chavetʼese, ti xaloʼilaj xchiʼuk ti jech xapas kʼuchaʼal onoʼox chapas jujun kʼakʼale. Mi jun noʼox avoʼonton chaloʼilaje, lek me chbat ta pasel avuʼun ti kʼu yelan chabakʼes akʼobe.

Li sventa chkakʼtik ta aʼiel li kʼusi tsots skʼoplale, jaʼ chakʼ ta aʼiel ti kʼu yelan chkaʼi jbatike o li kʼusi jchʼunojtike. Jaʼ sventa chkakʼtik ta aʼiel ti tsots skʼoplal li kʼusi yakal chkaltike. Toj tsots skʼoplal ti jbakʼes li jkʼobtike, pe skʼan me xkichʼ jpʼijiltik, yuʼun xuʼ mu xa staleluk jech ta jpastik o muʼyuk xa lek ta kʼelel ti kʼu yelan ta jpastike. Mi jtos noʼox jech ta jpastike, chchʼaybat-o yoʼonton li buchʼutik te chaʼibutike xchiʼuk mu xa kʼupiluk sba ta aʼiel li mantal chketʼestike. Mi chalbot li buchʼu sbainoj chanob vun ti jtos noʼox jech nopem xavaʼi spasele, xuʼ jaʼ xavakʼ ta avoʼonton spasel kʼuk sjalil li baʼyele, jaʼ xkaltik, li sventa xkaltik kʼu yelane. Ta tsʼakale xuʼ xapas li xchibale, jaʼ xkaltik, li sventa xkakʼtik ta aʼiel li kʼusi tsots skʼoplale.

Sventa xanaʼ kʼu yelan chapas li sventa xavakʼ ta aʼiel li kʼusi tsots skʼoplale xchiʼuk ti kʼu sjalikil skʼan xapase, tsako ta venta li buchʼutik te chaʼibote. Xuʼ chopol chaʼi sbaik mi chabechkʼobtae. Li ta jlom lumetike jaʼ noʼox antsetik xuʼ smak yeik ta skʼobik kʼalal oy kʼusi labal sba chilike, jaʼ yuʼun mu lekuk ta kʼelel mi jech tspasik li viniketike. Li ta yantik lume jaʼ la svinajeb ti tstoy sbaik li antsetik ti kʼalal tsbakʼes tajek skʼobik kʼalal ta xkʼopojike, jaʼ yuʼun li ermanaetike jaʼ mas skʼan sbakʼes li satik kʼalal chloʼilajike. Teuk me ta joltik ti ta buyuk noʼox muʼyuk lek ta kʼelel kʼalal toj echʼ noʼox ta jbakʼes jkʼobtik kʼalal muʼyuk ep li buchʼutik ta jchiʼintik ta loʼile.

Mi laj xa achan ti kʼu yelan chabakʼes abekʼtale, jaʼ xkaltik, ti chabakʼes abekʼtal sventa xavakʼ ta aʼiel li kʼusi tsots skʼoplale, mas xa chavakʼ lek ta ilel li kʼusi oy ta avoʼontone. Jech xtok, jech chavakʼ ta ilel ti achʼunoj xchiʼuk ti ta sjunul avoʼonton li kʼusi chavale, vaʼun mas chkʼot ta koʼontontik.

Li kʼusi chvinaj ta jsatike. Ti bu mas chvinaj li kʼusi oy ta koʼontontike jaʼ li ta jsatike. Te tsakal skʼoplal xtok kʼalal ta jbakʼestik li sbekʼ jsatike, li ketike xchiʼuk kʼalal ta jnijan joltike. Manchuk mi muʼyuk kʼusi chal li jun krixchanoe, xuʼ xakʼ ta ilel ta sat mi muʼyuk ta yoʼonton, mi muʼyuk lek chil, mi labal sba chil, mi chʼayal to chkʼot yoʼonton o mi jun yoʼonton. Mi sta-o kʼusi chkaltik kʼalal ta jbakʼes jsatike, chakʼik venta xchiʼuk mas chkʼot ta yoʼontonik li buchʼutik chaʼibutike. Li Jpasvanej kuʼuntike la spasutik ti stakʼ xijtseʼine xchiʼuk ti xkakʼtik ta ilel li kʼusi oy ta koʼontontike, jaʼ yuʼun akʼo jechuk jpastik kʼalal chketʼestik mantale.

Mi ta plataforma ta jelubtas jpartetik o mi ta jcholtik mantale, li aʼyej chkaltike toj kʼupil sba xchiʼuk chmuyubaj yuʼun li krixchanoetike. Lek kʼusi chkʼot ta pasel mi stseʼet noʼox li jsatike; yan mi mu jechuke, xuʼ mu xchʼunik mi melel li kʼusi chkaltike.

Chkakʼtik ta ilel ti lek koʼontontik mi stseʼet noʼox li jsatike, taje toj tsots skʼoplal ta skoj ti mu xa spat yoʼontonik li krixchanoetik kʼalal mu xojtikinik li buchʼu tskʼoponike. Jech xtok, mi stseʼet noʼox li jsatike, jaʼ mu xiʼik-o li krixchanoetike xchiʼuk mas chchikintaik li kʼusi chkaltike.

CHVINAJ ta jsatik li kʼu kelantike xchiʼuk li kʼusi oy ta koʼontontike. Xuʼ van xvinaj ta jsatik ti oy kʼusi labal sba chkaʼitike o ti oy kʼusi chijxiʼ yuʼune. Chvinaj mi oy buchʼu chkʼuxubaj ta koʼontontik o mi jkʼanojtik, bateltik xtoke chakʼ ta ilel mi xijnaʼet o mi oy kʼusi kʼux chkaʼitik. Xi laj yal jun vinik ti oy xa sjabilal ta sventa li krixchanoetik ti jmoj slumal xchiʼuke xchiʼuk ti snuptanoj tajek svokole: «Ta sbekʼ jsatkutik noʼox chiloʼilajkutik».

Ta skoj ti bu ta jkʼeltik batel kʼalal chijkʼopoje, xuʼ snaʼik yantik ti kʼu kelantike xchiʼuk ti kʼusi ta jkʼan chkaltike. Ta jlom lumetike mas chchʼunbeik kʼusi chal li buchʼu ta slekil yoʼontonik chkʼelvanike. Pe mi jaʼ noʼox skʼeloj yalel lum o yan kʼusi skʼeloje ti maʼuk skʼeloj li buchʼu tskʼopone, mu xchʼunik mi melel kʼusi chal o tsnopik ti mu xtojob ta yalele. Ta yan lumetik xtoke jaʼ skʼelobil ti muʼyuk xkʼexlal, ti ch-ilin o ti tsaʼvan yaʼi ta kʼop li buchʼu te kʼelvanem-o kʼalal chloʼilaje, mas to mi maʼuk xchiʼil ta vinikal o antsile o mi yajval ta abtel o mi mas tsots yabtel li buchʼu tskʼopone. Oy jlom xtoke, kʼalal jun kerem o tseb skʼelojbe lek sat tskʼopon li buchʼu oy xa sjabilale, jaʼ senyail chilik ti mu x-ichʼvan ta mukʼe.

Pe li ta lumetik ti bu mu chopoluk chilik ti jech chichʼ pasele, kʼalal tskʼelbeik sat li buchʼu tskʼoponike, xvinaj ti tsots skʼoplal li kʼusi chalike xchiʼuk ti xchʼunojik ta melele. Kʼelo avil kʼusi la stakʼ Jesus kʼalal oy kʼusi jakʼbat yuʼun li yajchankʼoptak ta skoj ti oy kʼusi labal sba laj yaʼiike, xi laj yalike: «¿Buchʼu xa noʼox xuʼ xkol ta melel?». Xi chal li Vivliae: «Kʼelbat lek satik yuʼun li Jesuse, vaʼun xi albatike: ‹Li krixchanoetike mu xuʼ yuʼunik spasel taje, pe li Diose xuʼ yuʼun spasel skotol›» (Mat. 19:25, 26). Li ta Vivlia xtoke chakʼ ta ilel ti tskʼel kʼu yelan chaʼi sbaik yantik li jtakbol Pabloe. Jun veltae te chchikintabat yuʼun jun vinik ti koxo onoʼox vokʼeme. Xi chal li Echos 14:9 xchiʼuk 10: «Li vinik taje yakal chaʼi li kʼusi chal Pabloe. Vaʼun kʼalal te skʼelojbe lek sat vinik li Pabloe xchiʼuk ti laj yil ti oy xchʼunel yoʼonton sventa xpoxtaje, xi tsots laj yale: ‹Likan, vaʼlan›».

Kʼusi skʼan xapas kʼalal chachol mantale. Ta slekiluk avoʼonton xakʼopon li krixchanoetik kʼalal chachol mantale. Mi sta-o chavile, oyuk kʼusi xajakʼbe sventa xlik avalbe skʼoplal ti kʼusi lek chavaʼi achaʼvoʼalike. Jech xtok, lik noʼox kʼelbo sat li buchʼu chakʼopone, pe ichʼvanan ta mukʼ xchiʼuk ta slekiluk avoʼonton xapas. Mas me chkʼot ta yoʼontonik mi stseʼet noʼox asat xchiʼuk mi xamuyubaj noʼoxe. Kʼalal chilik ti jech asate, chakʼik venta kʼu avelan xchiʼuk mas jun yoʼonton chchikintaik li kʼusi chavalbee.

Ti bu sta-o chavile, kʼelbo sat li krixchanoe, yuʼun xuʼ te chavakʼ venta kʼu yelan skʼan xakʼopon. Xuʼ te xavakʼ venta mi ch-ilin, mi oy ta yoʼonton li mantale o mi mu xaʼibe smelolal. Te chavakʼ venta xtok mi chchʼajub o mi oy tajek ta yoʼonton chchikinta li kʼusi chavale. Ta sat noʼox chavakʼ venta xtok mi skʼan mas kʼunkʼun xakʼopoj o mas anil, mi tskʼan van chloʼilaj ek, mi skʼan xa noʼox xatsutses li aloʼile o ti xavakʼ ta ilel kʼu yelan ta chanel li Vivliae.

Akʼo persa ti xa-ichʼvan ta mukʼ kʼalal chakʼelbe sat li buchʼu chakʼopone, manchuk mi chachol mantal o mi chavakʼ estudio. Pe mu me jaluk tajek xakʼel, yuʼun xuʼ xkʼexav avuʼun mi jech chapase (2 Rey. 8:11). Jaʼ lek jechuk xakʼel kʼuchaʼal onoʼox nopem xavaʼi ta xakʼelvane xchiʼuk ta slekiluk avoʼonton xapas, ta junantik lume jaʼ senyail ti oy ta yoʼontonik ta melel li buchʼu tskʼoponike. Mi yakal chakʼel Vivlia o chavapta yan vune, skʼan onoʼox jaʼ akʼeloj, pe skʼan onoʼox xakʼelbe sat jlikeluk li buchʼu chakʼopon mi chakʼan chavakʼ ta aʼiel ti oy kʼusi tsots skʼoplale. Mi chatoy asat bakʼintike, te chavil xtok kʼu yelan chaʼi sbaik yuʼun li kʼusi yakal chakʼele.

Mu xachibaj mi tsots chavaʼi ta slikebal ti chakʼelbe sat li buchʼu chakʼopone. Mi chachanilan ti chakʼelvan kʼuchaʼal onoʼox nopem xavaʼie, tskoltaot sventa mas xatojob ti kʼu yelan chaloʼilaje.

Kʼusi skʼan xapas kʼalal chavetʼes mantale. Li Vivliae chal ti kʼalal chlik xaʼox yal Mantaletik ta Vits li Jesuse «la stoy muyel sat ta stojolal li yajchankʼoptake» (Luk. 6:20). Jech xapas ek. Kʼalal skʼan toʼox xlik ajelubtas mantale, kʼelo jlikeluk li buchʼutik te chaʼiike. Ta jlom lumetike mu chopoluk mi tskʼelbeik sat jayvoʼuk li buchʼutik te oyike. Li uni jlikel taje jaʼ tskoltaot sventa xchʼay batel avuʼun li xiʼele. Jech