Oy kʼusi akʼbat yil li Juane

Kʼalal jaʼo te tikʼil ta chukel li jtakbol Juan li ta Patmos ti jaʼ jun lum ti joyol ta nabe. Akʼbat yil yuʼun Jesus 16 ta tos li kʼusitik chkʼot ta pasel ta mas tsʼakale. Laj yil kʼu yelan chichʼ chʼultajesbel li sbi Jeovae, kʼuxi chtal li Ajvalilal yuʼune xchiʼuk ti kʼuxi chkʼot ta pasel yuʼun li kʼusi tskʼan yoʼonton liʼ ta balumil jech kʼuchaʼal ta vinajele.

Li Juane akʼbat yil ti te chotol Jeova ta jun chotlebal sventa Ajvalilal ta vinajele. Li ta spat xokon chotlebale oy 24 ta voʼ moletik ti slapojik sakil kʼuʼil xchiʼuk oy skoronail sjolik ti pasbil ta oroe. Jech xtok, li ta chotlebal taje chlokʼ talel saksevul, yechʼomal eil xchiʼuk chauketik. Vaʼun, li 24 ta voʼ moletike tskejan sbaik ta stojolal Jeova xchiʼuk chichʼik ta mukʼ. Jech xtok, li Juane laj yil epal krixchanoetik ti likemik tal ta epal lumetik, jteklumetik, ta jeltos kʼopetik ti chichʼik ta mukʼ li Jeovae. Li Chʼiom Chij ti jaʼ skʼoplal li Jesuse tsbeiltas batel epal krixchanoetik li ta voʼ ti chakʼ kuxlejale. Li kʼusi yan laj yil li Juane jaʼ ti lik spas mantal Jesus xchiʼuk li 24 moletike. Ta yan xtoke, laj yil ti yakal tstsak sbaik ta kʼop ta vinajel li Jesus xchiʼuk Satanase, vaʼun laj yichʼik jipel yalel tal ta balumil li Satanas xchiʼuk li spukujtake.

Li Juane oy to kʼusi toj kʼupil sba laj yil, yuʼun laj yil li Chʼiom Chij xchiʼuk li 144 mil krixchanoetik ti te vaʼajtik li ta Vits Sione. Jech xtok, laj yil jun anjel ti xvilet ta spʼejel balumil xchiʼuk ti xi chale: «Xiʼtaik xchiʼuk albeik smukʼulal li Diose».

Li yan kʼusi laj yil li Juane jaʼ li paskʼop ta Armajedone. Li ta paskʼop taje li Jesus xchiʼuk li yajsoltarotake la slajesbeik li xchopol balumil Satanase. Li ta slajebal kʼusi laj yile jaʼ ti naka xa jun oʼontonal oy ta vinajel xchiʼuk ta balumile, jech xtok jmoj xa oyik li krixchanoetike. Laj yil xtok ti chichʼ lajesel ta j-echʼel li Satanas xchiʼuk li chopol krixchanoetike. Vaʼun, skotol li buchʼutik te ta vinajel xchiʼuk ta balumile chʼul chilik li sbi Jeovae xchiʼuk jaʼ xa noʼox stuk chichʼik ta mukʼ.