¿Mi chchʼak utsʼ alalil li stestigotak Jeovae?

Li stestigounkutik Jeovae chkakʼkutik persa ti jmojuk oyik li kutsʼ kalalkutike xchiʼuk li yutsʼ yalal yantike. Oy sbalil chkilkutik li utsʼ alalile, yuʼun jnaʼojkutik ti jaʼ yakʼojbe slikeb li Diose (Jenesis 2:21-24; Efesios 3:14, 15). Li Diose yakʼoj beiltaseletik ta Vivlia ti skoltaoj li krixchanoetik sventa xmuyubajikuk xchiʼuk ti lekuk tsobolike.

¿Kʼusi ta jpaskutik sventa jtsatsubtas li kutsʼ kalalkutike?

Ta yan xtoke, chkakʼkutik persa yakʼel ta jkuxlejalkutik li beiltaseletik ta Vivliae sventa xikʼotkutik ta lekil malalil, ajnilal o ta lekil totil meʼiletik (Proverbios 31:10-31; Efesios 5:22–6:4; 1 Timoteo 5:8). Li Vivliae xuʼ stsatsubtas li utsʼ alaliletik ti mu koʼoluk kʼusi xchʼunojike (1 Pedro 3:1, 2). Jkʼeltik kʼusi chalik junantik ti kʼot ta stestigo Jeova ta tsʼakal li snup xchiʼilike:

• «Ti svakibal xa jabil jnupunelkutike, skotol kʼakʼal chkutilan-o jbakutik tal. Pe kʼalal pas ta stestigo Jeova li Ivete mas xa oy slekil yoʼonton xchiʼuk oy smalael yuʼun. Ti jel stalelale jaʼ koltavan sventa mu jchʼak jbakutik». (Clauir, likem ta Brasil)

• «Kʼalal lik xchan Vivlia li jmalal ti Chansa sbie muʼyuk lek laj kil, yuʼun la jnop ti chchʼak utsʼ alaliletik li stestigotak Jeovae. Pe ta tsʼakale, laj kakʼ venta ti la skoltaunkutik li kʼusi chal Vivliae». (Agness, likem ta Zambia)

Kʼalal ta jcholkutik mantale, ta jchanubtaskutik li krixchanoetik ti kʼuxi xuʼ tskoltautik Vivlia ta sventa li kʼusitik liʼe:

• Kʼuxi xuʼ jtʼujtik lek li jnup jchiʼiltike

• Kʼuxi xuʼ stsal yuʼunik vokoliletik li achʼ jnupuneletike

• Kʼu yelan xuʼ lek xkil jbatik xchiʼuk li stot smeʼ jnup jchiʼiltike

• Kʼuxi xuʼ lek xichʼ tunesel li takʼine

• Kʼuxi xuʼ chʼabaluk kʼop kuʼuntik

• Kʼuxi xuʼ x-akʼvan ta perton

• Kʼuxi ta tukʼibtasel li kalab jnichʼnabtike

¿Mi chlik-o skʼopik jun nupultsʼakal kʼalal oy buchʼu junukal chlik xchan Vivlia yuʼunike?

Jech chkʼot ta pasel bakʼintik. Jech kʼuchaʼal laj yal li empresa Sofres ta 1998, li ta 20 nupultsʼakaletike oy jun ti chlik skʼopik ta skoj ti chkʼot ta stestigo Jeovae.

Li Jesuse laj onoʼox yal ti tsnuptanik vokolil ta yutsʼ yalalik li yajchankʼoptake (Mateo 10:32-36). Li j-al-loʼil Will Durant xi laj yale: «Kʼalal jaʼo tspas mantal li Romae, li yajchankʼoptak Kristoe jaʼ la ta smulik ti tsvokʼ sba li utsʼ alalile».a Li avi eke jaʼ jech chtikʼbat smulik bakʼintik li stestigotak Jeovae. Pe ¿mi jech ta melel?

Kʼalal laj yalik ti jaʼ chchʼak utsʼ alaliletik li stestigotak Jeovae, li Tribunal Europeo de Derechos Humanos laj yal kʼusi chlik-o skʼopik li utsʼ alaliletik ti maʼuk stestigo Jeovae, jaʼ la ta skoj ti muʼyuk «chichʼik ta mukʼ li kʼusi xchʼunojik ta jujuntale xchiʼuk ti jelel kʼusi tspasik ta srelijionike». Xi to laj yal li Tribunal Europeoe: «Jaʼ jech ta xil svokolik li utsʼ alaliletik ta skoj ti jelel srelijionike. Jech chkʼot ta stojolalik li stestigotak Jeova eke».b Akʼo mi muʼyuk lek ilbilik li stestigotak Jeovae chakʼik persa ta xchʼunel li beiltasel ta Vivlia liʼe: «Mu me chopoluk kʼusi xapakbe abaik sutel [...]. Ti bu kʼalal xuʼ chavilike junuk me avoʼontonik xchiʼuk skotol li krixchanoetike» (Romanos 12:17, 18).

¿Kʼu yuʼun muʼyuk tsaʼ snup xchiʼilik ta yan relijion li stestigotak Jeovae?

Li stestigounkutik Jeovae ta jchʼunkutik li tojobtasel ti skʼan jaʼ noʼox xinupunkutik «jaʼ noʼox ta sventa Kajvaltik», jaʼ xkaltik, ti jaʼ noʼox chinupunkutik xchiʼuk li buchʼu koʼol kʼusi jchʼunojkutike (1 Korintios 7:39). Mi jech la jpaskutike, ta jtabekutik sbalil. Li revista Journal of Marriage and Family ta 2010, xi chale: «Kʼalal koʼol srelijionik li nupultsʼakaletik, ti koʼol kʼusi xchʼunojik xchiʼuk li kʼusitik tspasike» mas onoʼox lek xil sbaik.c

Akʼo mi jech, muʼyuk chkalbekutik li buchʼutik chkʼotik ta jtsobajelkutik ti akʼo xikta snup xchiʼilik ta skoj ti maʼuk stestigo Jeovae. Xi chal li Vivliae: «Mi oy junuk ermano ti maʼuk jchʼunolajel li yajnile, mu me xikta mi lek chaʼi ti te xchiʼuk ta naklej smalal li antse; jech xtok, mi oy junuk ants ti maʼuk jchʼunolajel li smalale, mu me xikta mi lek chaʼi ti te xchiʼuk ta naklej yajnil li vinike» (1 Korintios 7:12, 13). Ta jchʼunkutik li mantal taje.