• Tsakbat ta mukʼ yuʼun Dios li matanaletik laj yakʼike
    ¡Tsta yorail ti jaʼ xa noʼox Jeova chichʼ ichʼel ta mukʼe!

    • Li Abele chakʼ ta ilel kʼuxi ta ichʼel ta mukʼ li melel Diose

      10. ¿Kʼusi ch-akʼbat xchanik li sloʼil Abel li buchʼutik chichʼik ta mukʼ li melel Diose?

      10 Li Abele laj yakʼbe smoton Jeova, yuʼun snaʼoj ti jaʼ noʼox sta-o xkichʼtik ta mukʼe. Toj echʼ noʼox lek li matanal laj yakʼe, yuʼun jaʼ la stʼuj jlomuk sba yol xchijtak. Li Vivliae muʼyuk chal mi la xchikʼ ta sba junuk skajleb matanal o mi muʼyuk, pe xvinaj ti muʼyuk chopol laj yil Dios ti kʼu yelan laj yakʼe. Ti kʼusi mas tsots skʼoplale jaʼ ti kʼusi tijbat-o yoʼonton ta yakʼel li matanale. Jaʼ yuʼun, xuʼ xkaltik ti yakal chkʼopoj li avie, jaʼ xkaltik, ti ep kʼusi chakʼ jchantik li sloʼile akʼo mi jelavem xa mas ta vakmil jabil slajel. Ta skoj ti oy xchʼunel yoʼonton ta stojolal li Diose xchiʼuk ti skʼanoj li stukʼil mantaltake, jaʼ tijbat-o yoʼonton ta yakʼbel smoton li Jeovae, ¿kʼuxi jnaʼojtik ti jaʼ jeche?

      Yakal chakʼbe matanal Jeova li Abele. Li ta spate te oy keruvinetik ti yakal xchabiik li yochebal Edene

      Li Abele la spas li chantos kʼusi tskʼan Jeova ta sventa li yichʼel ta mukʼe. (Kʼelo parafo 10.)

      11. ¿Kʼu yuʼun laj yal Jesus ti tukʼ li Abele?

      11 Baʼyel jkʼeltik kʼusi laj yal Jesus ta stojolal li Abele, yuʼun lek onoʼox xojtikin. Li Jesuse te skʼeloj yalel tal ta vinajel li Abele xchiʼuk chchabibe onoʼox li xnichʼon Adane (Prov. 8:22, 30, 31; Juan 8:58; Kol. 1:15, 16). Ta skoj ti laj yil Jesus kʼu yelan stalelal li Abele, laj yal ti jaʼ jun tukʼil vinike (Mat. 23:35). Li tukʼil krixchanoe snaʼoj ti jaʼ noʼox Jeova xuʼ xal kʼusi lek xchiʼuk kʼusi chopol. Chakʼ ta ilel ta xkuxlejal xtok ti xchʼunoj ta melele (koʼoltaso xchiʼuk Lukas 1:5, 6). Mu ta aniluk xvinaj mi tukʼ li jun krixchanoe. Jech oxal, xuʼ xkaltik ti ojtikinbil Abel ti chkuxlebin smantaltak Jeova akʼo mi muʼyuk toʼox yakʼoj li matanale. Pe mu kʼunuk laj yaʼi, yuʼun muʼyuk lek ta chanbel stalelal li Kain ti jaʼ sbankile (1 Juan 3:12). Li smeʼe muʼyuk la xchʼun jun mantal ti jamal yaloj Diose xchiʼuk li stote la stoy sba ta stojolal li Jeovae, yuʼun oy ox ta yoʼontonik snopel stukik li kʼusi lek xchiʼuk li kʼusi chopole (Jen. 2:16, 17; 3:6). Lek tsots yoʼonton li Abele, yuʼun muʼyuk la xchanbe stalelal yutsʼ yalal.

      12. ¿Kʼu yuʼun mu xkoʼolajik ­tajek li Kain xchiʼuk Abele?

      12 Ta xchibale, jaʼ ti jkʼeltik kʼuxi la snitbe skʼoplal li xchʼunel oʼontonal xchiʼuk tukʼilal li jtakbol Pabloe, xi laj yale: «Ta skoj xchʼunel yoʼonton Abel laj yakʼ milbil matanal ti mas oy sbalil ta stojolal Dios kʼuchaʼal li matanal yuʼun Kaine. Ta skoj xchʼunel yoʼonton laj yichʼ albel skʼoplal ti tukʼ li Abele» (Ebr. 11:4). Li kʼusi laj yal Pabloe chakʼ ta ilel li kʼusi tijbat-o yoʼonton Abel ta yakʼel li matanale jaʼ ti oy xchʼunel yoʼonton ta stojolal Jeovae xchiʼuk ti snaʼoj ti tukʼ skotol li kʼusi tspase. Jech oxal, skotol ora vinaj ta xkuxlejal xchiʼuk ta sjunul yoʼonton la spas. Pe mu jechuk la spas li Kaine.

      13. ¿Kʼusi chakʼ jchantik li ­sloʼilal Abele?

      13 Li sloʼilal Abele chakʼbutik ta ilel ti jaʼ noʼox xuʼ chichʼik ta mukʼ melel Dios li buchʼutik lek kʼusi oy ta yoʼontonike, jaʼ xkaltik, ti oy xchʼunel yoʼontonik ta stojolal Jeova xchiʼuk ti chchʼunbeik li stukʼil mantaltake. Jech xtok, laj kiltik ti melel yichʼel ta mukʼ Diose, maʼuk noʼox smakojbe skʼoplal li kʼusi ta jpastik yoʼ xkichʼtik ta mukʼe, yuʼun te skʼoplal skotol li kʼusi ta jpas ta jkuxlejaltike.