Li Rebekae maʼuk noʼox laj yakʼbe juteb voʼ li kameyoetike yuʼun jaʼ to ti kʼuxi echʼ yoʼontonike. Li jkot kameyoe te van 95 litro voʼ chuchʼ kʼalal jal xa muʼyuk yuchʼoj voʼe. Jaʼ yuʼun xuʼ van jal xchiʼuk tsots abtej li Rebekae. Ta skoj li kʼusi kʼot ta pasel ta tsʼakale, yileluke mu toj masuk chuchʼik yaʼi voʼ li kameyoetike.a Pe muʼyuk toʼox snaʼoj kʼalal laj yal ti chakʼbe yuchʼ voʼ li kameyoetike. Akʼo mi jech, mu sventauk kʼusi tspas sventa xakʼbe ta ilel slekil yoʼonton li jyanlume, jaʼ yuʼun lek laj yaʼi li vinike. Kʼalal te kʼelbil yuʼun li vinike te xyal xmuy ta snojesel skʼib sventa chbat snojesbe yav yaʼal chonbolometik li Rebekae (Génesis 24:20, 21).

Laj van yakʼ venta Rebeka ti te kʼelbil yuʼun li vinike. Pe maʼuk ti yuʼun oy xa kʼusi chopol tsnope, yuʼun jaʼ jech chakʼ ta ilel ti labal sba chil, ti xmuyubaj tajek xchiʼuk ti chʼayal kʼot yoʼonton ta skoj li kʼusi tspas li tsebe. Kʼalal laj yoʼontone, li vinike laj yakʼbe matanaletik ti toyolik stojole, xchiʼuk xi la sjakʼbee: «Avocoluc albun caʼay bochʼo atot ameʼ, xchiʼuc me oy xocol sna atot jchʼamancutic jvoyuc xchiʼuc li jchiʼiltaque». Kʼalal laj yalbe buchʼu stot smeʼe, mas to muyubaj. Xi to laj yal li Rebeka ta skoj ti xmuyubaj van tajeke: «Li jnacutique xocol; xuʼ te chbat vayanic. Jech noxtoc oy lec jobel sloʼ li acamelloique». Li kʼusi laj yale jaʼ te laj yakʼ ta ilel slekil yoʼonton, yuʼun ep xchiʼiltak li vinike. Jaʼ yuʼun bat yalbe ta anil smeʼ li kʼusi kʼot ta pasele (Génesis 24:22-28, 32).