¿Mi yaloj xa onoʼox Dios li kʼusi chkʼot ta jkuxlejaltike o mi xuʼ jnop jtuktik?

Li kʼusi chal Vivliae

Toj lek yoʼonton ta jtojolaltik li Diose, yuʼun yakʼoj jnop jtuktik li kʼusi ta jkʼan ta jpastike. Li Diose muʼyuk kak chal li kʼusi chkʼot ta jkuxlejaltike. Jkʼeltik batel kʼusi chal Vivlia ta sventa taje.

• Kʼalal la spasutik li Diose, ta slokʼol la spasutik (Jenesis 1:26). Li chonbolometike muʼyuk tsnop stukik li kʼusi tspasike, li voʼotike xijkoʼolajutik kʼuchaʼal li Jpasvanej kuʼuntike. ¿Kʼuxi ti xijkoʼolajutik xchiʼuke? Yuʼun xuʼ jchanbetik stalelal li Diose, jech kʼuchaʼal kʼanelal xchiʼuk tukʼilal. Jech xtok, xuʼ jnop jtuktik li kʼusi ta jpastike, jech kʼuchaʼal li stuke.

• Ti lek xkaltike, voʼotik oy ta jbatik li kʼusi chkʼot ta jtojolaltik ta mas tsʼakale. Li Diose chal ti tskʼan jchikintabetik li kʼusi chale xchiʼuk ti jtʼujtik li kuxlejale, jaʼ xkaltik, ti jchʼunbetik skotol li smantaltake (Deuteronomio 30:​19, 20). Ti jech chalbutike muʼyuk srasonal jechuk ti muʼyukuk ta jnop jtuktik li kʼusi ta jpastike, muʼyuk ta sujutik. Yuʼun ta slekil yoʼonton xi chalbutike: «¡Oy ta koʼonton ti xatsʼet chikinta li jmantaltake! Vaʼun bi, li jun oʼontonal avuʼune chkʼot kʼuchaʼal jun ukʼum» (Isaias 48:18).

• Voʼotik ta jnoptik mi lek kʼusi chkʼot ta jtojolaltik o moʼoj. Mi ta jkʼantik lek chbat jkuxlejaltike, skʼan me lek kʼusi jpastik. Xi chal li Vivliae: «Kʼusiuk ti xuʼ spas li akʼobe akʼbo yipal spasel» (Eklesiastes 9:10). Chal xtok «ti kʼusitik snopoj tspas li buchʼutik baxbolike jpʼel skʼoplal lek chkʼot ta pasel» (Proverbios 21:5).

Ti xuʼ jnop jtuktike, jaʼ jun matanal yakʼojbutik li Diose, yuʼun jaʼ jech xuʼ jkʼan ta sjunul koʼontontik ta skoj ti chlokʼ ta koʼontontike (Mateo 22:37).

¿Mi mu jaʼuk oy ta sba Dios skotol li kʼusi chkʼot ta pasele?

Li Vivliae chal ti skotol xuʼ yuʼun li Diose, muʼyuk buchʼu xuʼ smak ta be li kʼusi oy ta yoʼonton tspase, jaʼ noʼox chal stuk mi tspas o mi moʼoj (Job 37:23; Isaias 40:26). Pe muʼyuk stunes sjuʼel sventa oyuk kʼusi chopol jnuptantike o ti tsujutik sventa oyuk kʼusi jpastike. Li Vivliae chal ti la spajtsan sba sventa mu stsak ta kʼop li voʼneal Babilonia ti jaʼ yajkontra li steklumale (Isaias 42:14). Jech xtok, spajesoj toʼox sba sventa mu xakʼbe slajeb li buchʼutik muʼyuk lek kʼusi chkʼot ta nopel yuʼunike xchiʼuk ti chakʼbe svokol li yantike. Pe xijmuyubajutik yuʼun ti ta onoʼox xkʼot skʼakʼalil ti ta slajesbe skʼoplale (Salmo 37:​10, 11).