3. 1) ¿Kʼusi skʼoplal li teʼ sventa Judae? 2) ¿Kʼuxi jnaʼojtik ti jaʼ skʼoplal li lajunchop nitilulal li steʼ Efraine?

³ Li Jeovae laj yalbe Esekiel ti oyuk kʼusi stsʼiba li ta chaʼtel teʼe. Xi skʼan stsʼiba li ta jtel teʼe: «Ta sventa Juda», li ta yane xi skʼan stsʼibae: «Ta sventa Jose ti jaʼ li steʼ Efraine» (kʼelo Esekiel 37:15, 16). ¿Kʼusi skʼoplal li chaʼtel teʼe? Li teʼ sventa Judae jaʼ skʼoplal li ajvalilal ta chaʼchop nitilulal ti jaʼ li Juda xchiʼuk Benjamine. Li chaʼchop nitilulaletik taje pasatik ta mantal yuʼun ajvaliletik ti likemik ta snitilulal Judae. Jech xtok, li ajvaliletik xchiʼuk li paleetike toj lek xil sbaik, yuʼun li paleetike jaʼ te tspas yabtelik li ta templo ta Jerusalene (2 Kron. 11:13, 14; 34:30). Jech oxal, li ta ajvalilal ta Judae te skʼoplal ajvaliletik ti likemik ta yutsʼ yalal Davide xchiʼuk oy paleetik ti likemik ta snitilulal Levie. Pe ¿buchʼu skʼoplal «li steʼ Efraine»? Jaʼ li ajvalilal ta Israel ti jaʼ li lajunchop nitilulale. ¿Kʼuxi jnaʼojtik taje? Yuʼun li baʼyel ajvalil li ta lajunchop nitilulale jaʼ li Jeroboan ti likem ta snitilulal Efraine. Ta mas tsʼakale, jaʼ mas toyol skʼoplal kʼot ta Israel li snitilulal Efraine (Deut. 33:17; 1 Rey. 11:26). Li ta ajvalilal ta lajunchop nitilulale muʼyuk te skʼoplal li ajvaliletik ta yutsʼ yalal Davide xchiʼuk muʼyuk te skʼoplal li paleetik ta snitilulal Levie.

Li Jeovae laj yalbe Esekiel ti xi stsʼiba li ta jtel teʼe: «Ta sventa Juda» xchiʼuk li ta yan jtel teʼe: «Ta sventa Jose ti jaʼ li steʼ Efraine»

«Sventa Juda»

TA VOʼNE

Li ajvalilal ta Judae (chaʼchop nitilulal)

AVI KʼAKʼAL

Li buchʼutik tʼujbil chbatik ta vinajele

«Sventa Jose ti jaʼ li steʼ Efraine»

TA VOʼNE

Li ajvalilal ta Israele (lajunchop nitilulal)

AVI KʼAKʼAL

Li yan chijetike