² Li Esekiele laj yakʼ venta ti te chkʼot ta nab Muerto li yok ukʼume, vaʼun li voʼ ti chiʼpikʼane chlik lekubuk xchiʼuk ch-ayan ep xchoyal. Jech xtok, laj yil ti lik chʼiuk jeltos teʼetik ta stiʼiltak ukʼume. Jujun u chchʼi tal yan sat li teʼetike xchiʼuk chpoxtavan li yanale. Kʼalal jech la yil li Esekiele, jun van yoʼonton kom xchiʼuk la sta spatobil yoʼonton. Li Esekiel xchiʼuk li buchʼutik chukbil batike, ¿kʼuxi laj yaʼibeik smelolal li kʼusi laj yil Esekiel ta sventa li temploe? Xchiʼuk ¿kʼuxi chkaʼibetik smelolal li avi eke?

6. 1) ¿Kʼuxi tspat oʼontonal li kʼusi laj yil Esekiele? 2) ¿Kʼuxi pʼijubtasvan? (Kʼelo li tsʼib ta yok vune).

⁶ Voʼ ti chakʼ kuxlejale. Li ukʼum laj yil Esekiele te to chkʼot ta nab Muerto xchiʼuk chlekub yuʼun jutuk mu skotoluk li voʼe. Lik epajuk jeltos xchoyal li ukʼume jech kʼuchaʼal li ta Mukʼta nabe, jaʼ xkaltik, li nab Mediterraneoe. Jech xtok, li ta stiʼil nab Muertoe oy toʼox krixchanoetik ti jaʼ jtsak choyetik ti likemik ta chib lumetik ti nom xil sbaik yaʼeluke. Xi laj yal li anjele: «Chkuxi skotol li kʼusitik oy ti bu ch-echʼ batel li yok voʼe». ¿Mi jaʼ skʼan xal ti chkʼot ta sjunul nab Muerto li voʼ chlokʼ talel ta sna Jeovae? Moʼoj, yuʼun li anjele laj yal ti muʼyuk chkʼot ti bu achʼeltik tajeke. Xi onoʼox laj yale: «Jech-o chiʼpikʼan chkomik» (Esek. 47:8-11).b Taje tspat tajek oʼontonal, yuʼun chchaʼta yav li melel yichʼel ta mukʼ Diose, vaʼun jun noʼox yoʼonton li jteklume. Pe chpʼijubtasatik xtok, yuʼun mu skotolikuk chchʼamik li bendisionetik chakʼ Jeovae, jaʼ xkaltik, mu skotolikuk chlekubik.

Voʼ ti chakʼ kuxlejale

TA VOʼNE Li Jeovae ta sjunul yoʼonton chakʼbe bendision li steklumal ti tukʼ chakʼ sbae, jaʼ yuʼun oy yuʼunik li kʼusitik chtun yuʼunik ta mantal akʼo mi epajik

LI AVIE Yantik x-epaj batel li kʼusi yakal ta jkʼupintik avi ti xkoʼolaj ta paraisoe xchiʼuk ti likem tal ta stojolal Jeovae, yuʼun sjelojbe xkuxlejal xchiʼuk yakʼojbe bendision ta mantal epal krixchanoetik ti yantik x-epaj batele

TA TSʼAKAL Li Jeovae chakʼbe bendision li buchʼutik chchaʼkuxiik tale xchiʼuk li buchʼutik kuxul chjelavik ta Armajedone

12. 1) ¿Kʼuxi aviloj ti tstabeik sbalil krixchanoetik li kʼusi chakʼ ta chanel li Vivliae? 2) ¿Kʼu yelan tspʼijubtasutik avi li kʼusi laj yil Esekiele? (Kʼelo li tsʼib ta yok vune).

¹² Voʼ ti chakʼ kuxlejale. Xi laj yaʼi li Esekiele: «Chkuxi skotol li kʼusitik oy ti bu ch-echʼ batel li yok voʼe». Nopo avaʼi skʼoplal liʼe, ¿kʼuxi staojbeik sbalil li epal veʼlil ta mantal li buchʼutik ochemik ta steklumal Jeovae? Li chanubtaseletik ta Vivliae skoltaoj ta smiyonal noʼox krixchanoetik sventa xakʼ xchʼunel yoʼontonik ta stojolal li Jeovae. Tspʼijubtasutik xtok li avie, yuʼun oy junantike chiktaik xchʼunel kʼusi chal li Vivliae. Tsta yorail ti mu xa skʼan xchʼunik li mantaletike xchiʼuk mu xa skʼan xakʼ ta xkuxlejalik. Li vaʼ krixchanoetike xkoʼolajik kʼuchaʼal li «tsʼantsʼan voʼtik xchiʼuk li achʼeltik ti te nopol oy» ta nab ti laj yil Esekiele.c ¡Mu me xkakʼtik ti jech xkʼot ta jtojolaltike! (Kʼelo Deuteronomio 10:16-18).