Li Jeovae jutuk xa skʼan stunes li Ajvalil svaʼanoj sventa slajesbe skʼoplal skotol li jvokoltike. ¡Taje jaʼ jun lekil aʼyej! ¿Mi mu lekuk van ti xkalbetik li yan krixchanoetike? Li Jesuse oy ta yoʼonton ti xalik batel yajtsʼaklomtak ta spʼejel balumil li aʼyej taje (Mateo 28:19, 20). ¿Kʼusi spasojik li stestigotak Jeova sventa xchʼunik li kʼusi laj yal Jesuse?

1. ¿Kʼuxi yakal chkʼot ta pasel li kʼusi chal Mateo 24:14?

Xi xa onoʼox yaloj li Jesuse: «Li lekil aʼyejetik ta sventa li Ajvalilale ta xichʼ cholel ta spʼejel balumil» (Mateo 24:14). Li stestigounkutik Jeovae ta jkʼupinkutik tajek spasel li abtelal taje. Li lekil aʼyejetike yakal ta jcholkutik ta spʼejel balumil mas ta jmil jeltos kʼopetik. Ta skoj ti toj ep li abtelale, skʼan xkakʼ kipalkutik xchiʼuk ti jnaʼkutik kʼuxi xuʼ jpaskutike. Jaʼ yuʼun, mu spas kuʼunkutik ta jtukutik mi muʼyuk tskoltaunkutik li Jeovae.

2. ¿Kʼusi ta jpaskutik sventa jcholbekutik mantal skotol li krixchanoetike?

Ta buyuk noʼox ta jcholkutik mantal. Jech kʼuchaʼal la spasik li yajtsʼaklomtak Kristo ta voʼnee, chibatkutik «ta jujupʼej na» (Echos 5:42). Ti jech ta jpaskutike jaʼ sventa jcholbekutik mantal ta smiyonal noʼox krixchanoetik jujun jabil. Ta skoj ti ep ta velta muʼyuk te ta jtakutik ta sna li krixchanoetike, ta jcholkutik mantal xtok ta buyuk noʼox. Ta onoʼox xkakʼkutik persa yalbel yantik ta sventa li Jeovae xchiʼuk li kʼusi oy ta yoʼontone.

3. ¿Buchʼutik sbainojik xcholel batel li lekil aʼyeje?

Skʼan xalik batel lekil aʼyejetik skotol li melel yajtsʼaklomtak Kristoe. Voʼonkutike toj tsots skʼoplal chkilkutik li abtelal taje. Ta jcholkutik mantal ti bu kʼalal xuʼ kuʼunkutike, yuʼun jnaʼojkutik ti xuʼ sta˗o skolelik li krixchanoetike (kʼelo 1 Timoteo 4:16). Muʼyuk chkichʼkutik tojel ta spasel li abtelal taje, yuʼun xi chal li Vivliae: «Ta moton la-akʼbatik, jaʼ jech ta moton xavakʼik ek» (Mateo 10:7, 8). Akʼo mi ep buchʼutik mu xchikintaik, jech-o ta jcholkutik mantal, yuʼun jaʼ jech ta jchʼunbekutik smantal li Jeovae xchiʼuk chmuyubaj kuʼunkutik.

JCHANTIK TO BATEL MAS

4. Chkakʼkutik persa xcholbel mantal skotol krixchanoetik

VIDEO: Xcholel mantal «kʼalal to ta namal balumil» (7:33)

• Ti kʼu yelan ta jcholkutik mantale, ¿kʼusi ti mas lek laj avile?

Kʼelik Mateo 22:39 xchiʼuk Romanos 10:13-15 xchiʼuk albeik skʼoplal li sjakʼobiltak liʼe:

• ¿Kʼuxi xvinaj ti jkʼanojkutik krixchanoetik kʼalal ta jcholkutik mantale?

• ¿Kʼu yelan chil Jeova li buchʼutik chalik batel lekil aʼyejetike? (Kʼelik li versikulo 15).

5. Ta jchiʼinkutik ta abtel li Diose

Oy kʼusitik chkʼot ta pasel ti chakʼ ta ilel ti jaʼ tsbeiltas cholmantal li Jeovae. Jkʼeltik avil kʼusi kʼot ta pasel li ta Nueva Zelandae. Jun mal kʼakʼale, bat xchol mantal ta naetik jun stestigo Jeova ti Paul sbie, vaʼun la xchiʼin ta loʼil jun ants. Li vaʼ kʼakʼale, sob la skʼopon Jeova li antse. La stunesbe sbi xchiʼuk laj yalbe ti oyuk buchʼu xtal yoʼ xkoltaat ta yojtikinel li Diose. Xi chal sloʼil li Paule: «Oxib ora ta mas tsʼakale, te xa ox ta jtijbe stiʼ sna».

Kʼelik 1 Korintios 3:9 xchiʼuk albeik skʼoplal li sjakʼobil liʼe:

• Li kʼusi kʼot ta pasel ta Nueva Zelandae, ¿kʼuxi chakʼ ta ilel ti jaʼ yakal tsbeiltas cholmantal li Jeovae?

Kʼelik Echos 1:8 xchiʼuk albeik skʼoplal li sjakʼobil liʼe:

• ¿Kʼu yuʼun skʼan xkoltavan Jeova sventa xichʼ cholel li mantale?

¿Mi chakʼan to chachan mas?

Li tsobajeletik ch˗echʼ kuʼunkutik ta xokol kʼakʼale chchanubtasunkutik sventa jcholkutik mantal. Mi oy xa ayemot junuk velta li ta jtsobajelkutik taje, ¿kʼu yelan aviloj li chanubtasel chkichʼkutike?

6. Kʼalal ta jcholkutik mantale, jech ta jchʼunbekutik smantal Dios

Li ta voʼnee, oy ox buchʼutik tskʼan tspajesik li yajtsʼaklomtak Jesus sventa mu xa xcholik mantale. Li yajtsʼaklomtak Kristo taje la spakbeik skʼoplal cholmantal sventa oyuk sderechoik «ta sventa li lekil aʼyejetike» (Filipenses 1:7). Jaʼ jech ta jpaskutik li avi eke.a

VIDEO: Chich’ pakbel skʼoplal li cholmantale (2:28)

Kʼelik Echos 5:27-42 xchiʼuk albeik skʼoplal li sjakʼobil liʼe:

• ¿Kʼu yuʼun muʼyuk chkikta jbakutik li ta cholmantale? (Kʼelik li versikulo 29, 38 xchiʼuk 39).

¿KʼUSI LA ACHAN?

Li Jesuse laj yalbe mantal yajtsʼaklomtak sventa xcholik li lekil aʼyej ta skotol jteklumetike. Li Jeovae yakal tskolta yajtuneltak sventa spas yuʼunik li abtelal taje.

Svulesobil ta joltik

• ¿Kʼuxi yakal chichʼ cholel lekil aʼyejetik ta spʼejel li balumile?

• ¿Kʼuxi xvinaj ti jkʼanojkutik krixchanoetik kʼalal ta jcholkutik mantale?

• ¿Mi chakʼ van muyubajel xanaʼ li cholmantale? ¿Kʼu yuʼun ti jech chavale?

XUʼ TO XAKʼEL LIʼE

Kʼelavil kʼu yelan chcholik mantal ta mukʼta lumetik li stestigotak Jeovae.

Cholmantal ta buyuk noʼox xchiʼuk grupo ta mukʼta lumetik: Ta París (5:11)

¿Kʼusi spasojik li stestigotak Jeova sventa skoltaik li buchʼutik jatavem lokʼel ta slumalike?

Ta jkoltakutik yoʼ mu xaʼiik takitiʼil ta mantal li buchʼutik snakʼoj sbaike (5:59)

Kʼelavil kʼu yuʼun xmuyubaj tajek jun ants ti jaʼ mas tsots skʼoplal laj yil ta xkuxlejal li cholmantale.

Ximuyubaj tajek ti la jtʼuj li abtelal liʼe (6:29)

Kʼelavil kʼusitik tsots skʼoplal kʼotem ta nopel yuʼunik ta snail chapanobbail sventa jechuk-o xichʼ cholel li lekil aʼyejetike.

«Tskanik chapanel ta snail chapanobbail li jcholmantaletike» (¡Chventainvan xa li Ajvalilal yuʼun Diose!, kapitulo 13)

Li Jesuse chanubtasvan ti skʼan xichʼ voʼ li buchʼu tskʼan chkʼot ta yajtsʼaklome (kʼelo Mateo 28:19, 20). Pe ¿kʼu yelan skʼan xichʼ pasel li ichʼvoʼe? Xchiʼuk ¿kʼusi skʼan spas li buchʼu tskʼan chichʼ voʼe?

1. ¿Kʼu yelan skʼan xichʼ pasel li ichʼvoʼe?

Li jpʼel kʼop ta griego ti chichʼ jelubtasel kʼuchaʼal ichʼvoʼe jaʼ smelolal «mukel ta voʼ». Kʼalal laj yichʼ voʼ li Jesuse, laj yichʼ mukel li ta ukʼum Jordane, laje lokʼ talel li ta voʼe (Markos 1:9, 10). Jech oxal chaʼa, kʼalal chichʼ voʼ sventa xkʼot ta yajtsʼaklom Kristo li jun krixchanoe, chichʼ mukel ta voʼ sjunlejal.

2. ¿Kʼusi chakʼ ta ilel li buchʼu chichʼ voʼe?

Kʼalal oy buchʼu chichʼ voʼe, chakʼ ta ilel ti yakʼojbe xa xkuxlejal li Jeovae. ¿Kʼusi skʼan spas li buchʼu tskʼan chakʼbe xkuxlejal li Jeovae? Skʼan skʼopon Jeova ta stuk sventa xalbe ti tskʼan chtun ta stojolal ta sbatel osile. Taje jaʼo tspas kʼalal skʼan toʼox xichʼ voʼe. Li ta orasion taje, te chalbe Jeova ti jaʼ noʼox tskʼan chichʼ ta mukʼe xchiʼuk ti jaʼ mas tsots skʼoplal chaʼi li kʼusi tskʼan yoʼontone. Jech xtok, chchanbe stalelal xchiʼuk chakʼ ta xkuxlejal li chanubtasel laj yakʼ Jesus ti xi laj yale: «Mi oy buchʼu tskʼan chtal ta jtojolale, akʼo sjip ta yoʼonton xkuxlejal [...] xchiʼuk akʼo stsʼakliun-o batel» (Mateo 16:24). Mi laj avakʼbe akuxlejal li Jeovae xchiʼuk mi laj avichʼ voʼe, mas to chavamigoin xchiʼuk lek tajek chavil aba xchiʼuk li buchʼutik chichʼik ta mukʼ Jeovae.

3. ¿Kʼusi skʼan spas li buchʼu tskʼan chichʼ voʼe?

Mi chakʼan chavichʼ voʼe, baʼyel skʼan xavojtikin mas li Jeovae xchiʼuk oyuk xchʼunel avoʼonton ta stojolal (kʼelo Ebreos 11:6). Mas to chakʼan Jeova mi laj avojtikin leke xchiʼuk mi ayan mas xchʼunel avoʼontone. Vaʼun, chlik ayanuk ta avoʼonton xcholel mantal xchiʼuk ta xchʼunbel li smantale (2 Timoteo 4:2; 1 Juan 5:3). Mi lik spas kʼusi lek chil Jeova li jun krixchanoe, xuʼ van x˗ayan ta yoʼonton xakʼbe xkuxlejal li Diose xchiʼuk ti xichʼ voʼe (Kolosenses 1:9, 10).a

JCHANTIK TO BATEL MAS

4. ¿Kʼusi chakʼ jchantik ti kʼu yelan laj yichʼ voʼ li Jesuse?

Sventa jnaʼtik kʼu yelan laj yichʼ voʼ li Jesuse, kʼelik Mateo 3:13-17. Mi laje, albeik skʼoplal li sjakʼobiltak liʼe:

• Kʼalal laj yichʼ voʼ li Jesuse, ¿mi uni neneʼ toʼox?

• ¿Mi naka noʼox la svijbeik voʼ ta sjol? Vaʼun chaʼa, ¿kʼu yelan laj yichʼ voʼ?

Kʼalal laj yichʼ voʼ li Jesuse, jaʼo lik spas li abtelal akʼbil sbain yuʼun Diose. Kʼelik Lukas 3:21-23 xchiʼuk Juan 6:38 xchiʼuk albeik skʼoplal li sjakʼobil liʼe:

• Kʼalal laj xa ox yichʼ voʼ li Jesuse, ¿kʼusi abtelal laj yakʼ ta yoʼonton spasel?

5. ¡Xuʼ me xavichʼ voʼ!

Kʼalal ta jnopbetik skʼoplal ti chkakʼ jkuxlejaltik ta stojolal Dios xchiʼuk ti chkichʼtik voʼe, xuʼ van chijxiʼ-o yuʼun. Pe mi mas laj avojtikin batel li Jeovae, xuʼ me xlik anop ti xavichʼ voʼe. Sventa xavojtikin junantik krixchanoetik ti pas yuʼunike, kʼelik li VIDEOE.

VIDEO: ¿Kʼuxi xuʼ xkamigointik li Jeovae? (1:11)

Kʼelik Juan 17:3 xchiʼuk Santiago 1:5 xchiʼuk albeik skʼoplal li sjakʼobil liʼe:

• ¿Kʼusi xuʼ xkoltaat li buchʼu tskʼan chichʼ voʼe?

1. Chkakʼbe jkuxlejaltik Jeova kʼalal chkalbetik ti chijtun ta stojolal ta sbatel osile.

2. Kʼalal chkichʼtik voʼe, chkakʼtik ta ilel ti kakʼoj xa jkuxlejaltik ta stojolal Diose.

6. Chijkʼot ta yutsʼ yalal Jeova mi laj kichʼtik voʼe

Mi laj kichʼtik voʼe, kutsʼ kalal jbatik chijkʼot xchiʼuk li ermanoetik ta spʼejel balumile. Mu ventauk bu likemutik tal o kʼu yelan echʼem jkuxlejaltik, yuʼun koʼol kʼusi jchʼunojtik xchiʼuk ta jchʼuntik li kʼusi chal Vivliae. Kʼelik Salmo 25:14 xchiʼuk 1 Pedro 2:17 xchiʼuk albeik skʼoplal li sjakʼobil liʼe:

• Mi laj kichʼtik voʼe, ¿kʼu yelan chkil jbatik xchiʼuk Jeova xchiʼuk li buchʼutik chichʼik ta mukʼe?

¿KʼUSI LA ACHAN?

Li Jesuse laj yal ti skʼan xichʼ voʼ li buchʼu tskʼan chkʼot ta yajtsʼaklome. Sventa spas avuʼune, skʼan oyuk xchʼunel avoʼonton ta stojolal Jeova, ti xachʼun li kʼusi chale xchiʼuk ti xavakʼ akuxlejal ta stojolale.

Svulesobil ta joltik

• ¿K’u yelan li ich’voʼe xchiʼuk k’u yuʼun tsots skʼoplal?

• ¿Kʼusi chakʼ ta ilel li ichʼvoʼe?

• ¿Kʼusi skʼan spas li buchʼu tskʼan chakʼbe xkuxlejal Dios xchiʼuk ti xichʼ voʼe?

XUʼ TO XAKʼEL LIʼE

Kʼelavil kʼu yelan chichʼ pasel li ichʼvoʼe xchiʼuk li kʼusi jecheʼ xchʼunojik junantike.

«¿Kʼusi skʼan xal li ichʼvoʼe?» (Xu’ te xata ta jw.org)

Kʼelavil kʼusitik xuʼ xapas sventa xavichʼ voʼe.

«¿Kʼusi xuʼ stij avoʼonton sventa xavichʼ voʼ?» (Li Jkʼel-osil ta toyole, marso ta 2020)

Kʼelavil sloʼil xkuxlejal jun vinik ti la snopbe lek skʼoplal kʼalal laj yichʼ voʼe.

«Tskʼanik ti xkakʼ venta jtuk bu li melele» (Li Jkʼel-osil ta toyole, 1 yuʼun fevrero ta 2013)

Kʼelavil kʼu yuʼun oy sbalil ti xanopbe skʼoplal li ichʼvoʼe xchiʼuk li kʼusitik xuʼ xapas sventa xatae.

«¿Mi skʼan van xkichʼ voʼ?» (Li kʼusi tsjakʼ kerem tsebetike. Stakʼobiltak, volumen 2, kapitulo 37)