-
¿Kʼusi jaʼ li Ajvalilal yuʼun Diose?¡Kʼupino akuxlejal ta sbatel osil! Li Vivliae xuʼ skoltaot ta stael
-
-
XCHANOBIL 31
¿Kʼusi jaʼ li Ajvalilal yuʼun Diose?
Li kʼusi mas chalbe skʼoplal Vivliae jaʼ li Ajvalilal yuʼun Diose, yuʼun li Ajvalilal taje jaʼ tstunes Jeova sventa xakʼ kʼotuk ta pasel li kʼusi tskʼan yoʼonton liʼ ta balumile. ¿Kʼusi jaʼ li Ajvalilal yuʼun Diose? ¿Kʼuxi jnaʼojtik ti yakal xa tspas mantale? ¿Kʼusitik xa spasoj talel? Xchiʼuk ¿kʼusi tspas li ta jelavele? Taje te ta xichʼ takʼel li ta xchanobil liʼe xchiʼuk li ta xchanobil 32 xchiʼuk 33.
1. ¿Kʼusi jaʼ li Ajvalilal yuʼun Diose xchiʼuk buchʼu ch˗ajvalilaj?
Li Ajvalilal taje jaʼ xchapanoj li Jeovae. Li Ajvalile jaʼ li Jesukristoe xchiʼuk te to ta vinajel chventainvan talel (Mateo 4:17; Juan 18:36). Li Vivliae xi chalbe skʼoplal li Jesuse: ‹Chventainvan sbatel osil› (Lukas 1:32, 33). Ta skoj ti jaʼ tʼujbil ta Ajvalil yuʼun Dios li Jesuse, jaʼ tsventain skotol li jnaklejetik ta balumile.
2. ¿Mi oy buchʼutik chchiʼin ta Ajvalilal li Jesuse?
Mu stukuk ch˗ajvalilaj li Jesuse, yuʼun oy «krixchanoetik ti jeltos snitilulalik, skʼopik, steklumalik xchiʼuk slumalike [...] ch˗ajvalilajik» (Apokalipsis 5:9, 10). ¿Jayvoʼ ch˗ajvalilajik xchiʼuk li Kristoe? Ti kʼu xa sjalil ay ta balumil li Jesuse ta smiyonal noʼox krixchanoetik stsʼakliojik talel. Pe jaʼ noʼox 144 mil chbatik ta vinajel sventa xchiʼinik ta ajvalilal li Jesuse (kʼelo Apokalipsis 14:1-4). Li yantik une liʼ chnakiik ta balumil ti jaʼ chventainatik tal li Ajvalilal yuʼun Diose (Salmo 37:29).
3. ¿Kʼu yuʼun mas lek li Ajvalilal yuʼun Dios ti jaʼ mu sta li ajvaliletik ta balumile?
Akʼo mi oy ajvaliletik ti tskʼan tspasik li kʼusi leke, mu spas yuʼunik. Vaʼun, chichʼ sabel xkʼexolik ti xuʼ van mi jsetʼuk oy ta yoʼontonik li krixchanoetike. Pe jaʼuk mi lik ajvalilajuk li Jesus ti jaʼ tʼujbil yuʼun Diose, muʼyuk buchʼu ch˗och ta xkʼexol. Li Ajvalilal la svaʼan Diose ‹muʼyuk bu chichʼ chʼaybel-o skʼoplal› (Daniel 2:44). Tsventain spʼejel balumil li Jesuse xchiʼuk mu tʼujbiluk buchʼu chkʼuxubin. Snaʼ xkʼanvan, lek yoʼonton xchiʼuk tukʼ kʼusi tspas xchiʼuk chchanubtas yantik sventa jechuk stalelalik ek: ti snaʼuk xkʼanvanike, ti lekuk yoʼontonike xchiʼuk ti tukʼuk kʼusi spasbeik li yantike (kʼelo Isaias 11:9).
JCHANTIK TO BATEL MAS
Jkʼeltik batel kʼu yuʼun stuk xa noʼox jech li Ajvalilal yuʼun Diose ti jaʼ mu sta li ajvaliletik ta balumile.
4. Jun Ajvalil ti tsots sjuʼel ti tsventain spʼejel balumile
Li Jesuse oy sjuʼel xchiʼuk mas xtojob ta ajvalil ti jaʼ mu sta li buchʼutik echʼemik xa talele. Kʼelik Mateo 28:18 xchiʼuk albeik skʼoplal li sjakʼobil liʼe:
¿Kʼu yuʼun jaʼ mas tsots yabtel akʼbil Jesus ti jaʼ mu sta li ajvaliletik ta balumile?
Li ajvaliletik ta balumile oy noʼox spajeb ti bu tspasik mantale xchiʼuk chlaj skʼoplalik. ¿Mi jaʼ van jech li Ajvalilal yuʼun Dios eke? Kʼelik Daniel 7:14 xchiʼuk albeik skʼoplal li sjakʼobiltak liʼe:
¿Kʼusi sbalil ta jtabetik ti muʼyuk chlaj˗o skʼoplal li Ajvalilal yuʼun Diose?
¿Kʼusi sbalil ta jtabetik ti tsventain spʼejel li balumile?
5. Chichʼ sabel xkʼexol li ajvaliletik ta balumile
¿Kʼu yuʼun ta jkʼantik xa ti xlik sventainutik li Ajvalilal yuʼun Diose? Kʼelik li VIDEOE xchiʼuk albeik skʼoplal li sjakʼobil liʼe:
¿Kʼusitik vokoliletik yakʼoj li ajvaliletik ta balumile?
Kʼelik Eklesiastes 8:9 xchiʼuk albeik skʼoplal li sjakʼobiltak liʼe:
¿Mi mas lek xanaʼ ti jaʼ sventainutik li Ajvalilal yuʼun Diose? ¿Kʼu yuʼun ti jech chavale?
6. Li Jesus xchiʼuk li 144 mile snaʼojik kʼu yelan chkaʼi jbatik
Ta skoj ti echʼ kʼuchaʼal krixchano ta balumil li Jesuse, xuʼ «xijkʼuxubaj ta yoʼonton ta skoj ti kʼunutike» (Ebreos 4:15). Li 144 mil ti tʼujbilik yuʼun Jeova sventa x˗ajvalilajik xchiʼuk Jesuse jaʼik viniketik xchiʼuk antsetik ti ‹jeltos snitilulalik, skʼopik, steklumalik xchiʼuk slumalik› (Apokalipsis 5:9).
¿Mi tspat avoʼonton ti xaʼibeik smelolal kʼu yelan chkaʼi jbatik li buchʼutik tsventainutike? ¿Kʼu yuʼun ti jech chavale?
Li Jeovae stʼujoj viniketik xchiʼuk antsetik ti jeltos slumalik sventa xchiʼinik ta ajvalilal li Jesuse.
7. Li Ajvalilal yuʼun Diose mas to lek li mantaletik chakʼe
Li ajvaliletik ta balumile chakʼik mantaletik sventa xchabiik xchiʼuk skoltaik li krixchanoetike. Li Ajvalilal yuʼun Dios eke yakʼojan mantaletik xchiʼuk tskʼan ti xchʼunik li buchʼutik sventainojane. Kʼelik 1 Korintios 6:9-11 xchiʼuk albeik skʼoplal li sjakʼobiltak liʼe:
¿Kʼu van yelan jkuxlejaltik xanaʼ ti tauk jchʼunbetik smantal Dios ta sventa ti kʼu yelan skʼan xkakʼ ta ilel jtalelaltike?a
¿Mi sta˗o xanaʼ ti xalbutik Jeova ti kʼu yelan skʼan xkakʼ ta ilel jtalelaltike? ¿Kʼu yuʼun ti jech chavale?
¿Kʼuxi jnaʼojtik ti xuʼ xjel stalelal li krixchanoetike? (Kʼelik li versikulo 11).
Li ajvaliletike chakʼik mantaletik sventa xchabiik xchiʼuk skoltaik li krixchanoetike. Pe mas to lek li mantaletik chakʼ li Ajvalilal yuʼun Diose, yuʼun chchabi xchiʼuk tskolta li buchʼutik tsventainane.
JUNANTIKE XI TSJAK’IKE: «¿Kʼusi jaʼ li Ajvalilal yuʼun Diose?».
¿Kʼusi van chatakʼbe mi oy buchʼu jech la sjakʼbote?
¿KʼUSI LA ACHAN?
Li Ajvalilal yuʼun Diose te to tspas talel mantal ta vinajel xchiʼuk jaʼ tsventain spʼejel li balumile.
Svulesobil ta joltik
¿Buchʼutik tspasik mantal li ta Ajvalilal yuʼun Diose?
¿Kʼu yuʼun mas lek li Ajvalilal yuʼun Dios ti jaʼ mu sta li ajvaliletik ta balumile?
¿Kʼusi tskʼan Jeova ti akʼo spasik li buchʼutik chventainatik yuʼun li Ajvalilal yuʼun Diose?
XUʼ TO XAKʼEL LIʼE
Kʼelavil kʼusi laj yal Jesus ti bu chichʼ chotanel li Ajvalilal yuʼun Diose.
«¿Mi tey ta koʼontontik li Ajvalilal yuʼun Diose?» (Xu’ te xata ta jw.org)
¿Kʼu yuʼun mas tsots skʼoplal chaʼi stestigotak Jeova ti tukʼ xakʼ sbaik ta stojolal li Ajvalilal yuʼun Diose?
Tukʼ laj yakʼ sbaik ta stojolal li Ajvalilal yuʼun Diose (1:43)
Kʼelavil kʼusi chal Vivlia ta sventa li 144 mil ti tʼujbilik yuʼun Jeova sventa xchiʼinik ta ajvalilal li Jesuse.
Jun ants ti ochem toʼox ta chukele laj yakʼ venta ti jaʼ noʼox tukʼ chchapanvan li Ajvalilal yuʼun Diose.
«Laj kakʼ venta buchʼu xuʼ xakʼbe slajeb li choplejale» (¡Vikʼiluk me jsatik!, noviembre ta 2011)
a Li ta yoxvokʼale, te ta jkʼeltik junantik mantaletik ta sventa ti kʼu yelan skʼan xkakʼ ta ilel jtalelaltike.
-
-
¿Kʼusi smakoj ti tukʼ chkakʼ jbatike?¡Kʼupino akuxlejal ta sbatel osil! Li Vivliae xuʼ skoltaot ta stael
-
-
XCHANOBIL 45
¿Kʼusi smakoj ti tukʼ chkakʼ jbatike?
Li Jesuse laj yakʼ ta chanel ti ‹maʼuk te skʼoplalik ta balumil› li yajchankʼoptake (Juan 15:19). Taje jaʼ skʼan xal ti tukʼ chakʼ sbaike, ti muʼyuk tstikʼ sbaik ta politika mi jaʼuk ta paskʼope. Pe mu kʼunuk chkaʼitik ti tukʼ chkakʼ jbatike. Yuʼun xuʼ slabanutik li yantike. Pe ¿kʼusi xuʼ jpastik sventa tukʼ xkakʼ jbatik ta stojolal li Jeovae?
1. ¿Kʼu yelan skʼan xkiltik li ajvaliletike?
Li yajtsʼaklomutik Kristoe ta jtsaktik ta venta li ajvaliletike. Xi laj yal li Jesuse: «Tojbeik Sesar li kʼusitik jaʼ yuʼun Sesare». Jaʼ li kʼusi ta jpastike: ta jchʼuntik li mantaletik yakʼojik ta jujun lume, jech kʼuchaʼal li stojel patanetike (Markos 12:17). Li Vivliae chal ti jaʼ jech tskʼan Jeova ti x-ajvalilajik li krixchanoetike (Romanos 13:1). Jnaʼojtik ti oy noʼox spajeb ti kʼu yelan tspasik mantal li ajvaliletik ta balumile ti jaʼ mu jechuk li Diose. Jpatoj koʼontontik ti jaʼ noʼox xuʼ slajesbe skʼoplal jvokoltik li Diose xchiʼuk li Ajvalilal yuʼune.
2. ¿Kʼuxi xuʼ xkakʼtik ta ilel ti tukʼ chkakʼ jbatike?
Muʼyuk ta jtikʼ jbatik ta politika jech kʼuchaʼal la spas li Jesuse. Kʼalal laj yil krixchanoetik ti la spas jun milagro li Jesuse, tskʼan ox tsvaʼanik ta ajvalil liʼ ta balumile, pe li Jesuse muʼyuk la skʼan (Juan 6:15). ¿Kʼu yuʼun? Xi laj yal ta mas tsʼakale: «Maʼuk sventa balumil li Ajvalilal kuʼune» (Juan 18:36). Li yajtsʼaklomutik Kristo avie ep ta tos ti kʼu yelan chkakʼtik ta ilel ti tukʼ chkakʼ jbatike. Jun skʼelobile, jaʼ ti muʼyuk chijbat ta paskʼope (kʼelo Mikeas 4:3). Akʼo mi ta jtsaktik ta venta li kʼusi tstunesik sventa xichʼik ta mukʼ li jlumaltike, jech kʼuchaʼal li vanderae, muʼyuk ta jpastik saludar, yuʼun xkoʼolaj ti chkichʼtik ta mukʼe (1 Juan 5:21). Li voʼotike muʼyuk chkakʼ jbatik ta stojolal xchiʼuk muʼyuk ta jkontraintik mi junuk partido politiko o junuk kandidato. Taje jaʼ noʼox junantik ti kʼu yelan tukʼ chkakʼ jbatik ta stojolal li Ajvalilal yuʼun Diose.
JCHANTIK TO BATEL MAS
Jkʼeltik batel butik van vokol chkaʼitik ti tukʼ xkakʼ jbatike xchiʼuk jkʼeltik kʼuxi xuʼ xmuyubaj avuʼun Jeova ta sventa li kʼusi chanop chapase.
3. Li yajtunelutik Diose tukʼ chkakʼ jbatik
Li Jesus xchiʼuk yajchankʼoptake tukʼ laj yakʼ sbaik ek. Kʼelik Romanos 13:1, 5-7 xchiʼuk 1 Pedro 2:13, 14. Mi laje, kʼelik li VIDEOE xchiʼuk albeik skʼoplal li sjakʼobiltak liʼe:
¿Kʼu yuʼun skʼan jtsaktik ta venta li ajvaliletike?
¿Kʼuxitik xuʼ xkakʼtik ta ilel ti ta jchʼunbetik li smantalike?
Kʼalal jaʼo chlik paskʼope, junantik lumetike chalik ti muʼyuk la tstikʼ sbaike, pe tskoltaik li buchʼutik yakalik ta paskʼope. Pe ¿mi melel ti muʼyuk tstikʼ sbaike? Kʼelik Juan 17:16. Mi laje, kʼelik li VIDEOE xchiʼuk albeik skʼoplal li sjakʼobil liʼe:
¿Kʼusi smakoj ti tukʼ chkakʼ jbatike?
Pe ¿kʼusi van chapas mi oy kʼusi chakʼ apas ajvaliletik ti anaʼoj ti tskontrainbe smantal Diose? Kʼelik Echos 5:28, 29. Mi laje, kʼelik li VIDEOE xchiʼuk albeik skʼoplal li sjakʼobiltak liʼe:
Mi oy junuk smantal ajvalil ti tskontrain li smantal Diose, ¿bu van junukal ta jchʼuntik?
¿Mi xuʼ xaval jtosuk ti bu muʼyuk ta jchʼunbetik smantal li ajvaliletike?
4. Tukʼuk xkakʼ jbatik ta jnopbentik xchiʼuk ta kʼusitik ta jpastik
Kʼelik 1 Juan 5:21. Mi laje, kʼelik li VIDEOE xchiʼuk albeik skʼoplal li sjakʼobiltak liʼe:
¿Kʼu yuʼun muʼyuk la stikʼ sba ta partido li Ayenge xchiʼuk ti muʼyuk la spas saludar li vanderae?
Kʼu xachi, ¿mi lek van li kʼusi kʼot ta nopel yuʼune?
¿Bu yan ti xuʼ van vokol chkaʼitik ti tukʼ chkakʼ jbatike? Kʼelik li VIDEOE xchiʼuk albeik skʼoplal li sjakʼobiltak liʼe:
¿Kʼuxi xuʼ tukʼ xkakʼ jbatik kʼalal tstsal sbaik ta tajimol li mukʼta lumetike?
Kʼalal oy kʼusi tsnop tspasik li jpolitikoetik ti xuʼ jtabetik sbalil o ti xkil-o jvokoltike, ¿kʼuxi xuʼ xkakʼtik ta ilel ti tukʼ chkakʼ jbatike?
¿Kʼuxi xuʼ sjel jnopbentik li kʼusi chalik ta notisia o li krixchanoetike?
¿Butik xuʼ xakʼ ta ilel jun yajtsʼaklom Kristo ti tukʼ chakʼ sba ta sventa li kʼusi tsnope xchiʼuk li ta kʼusitik tspase?
JUNANTIKE XI TSJAKʼIKE: «¿Kʼu yuʼun muʼyuk chatikʼ aba ta junuk partido?».
¿Kʼusi van chatakʼ ti oy buchʼu jech sjakʼbote?
¿KʼUSI LA ACHAN?
Li yajtsʼaklomutik Kristoe chkakʼtik ta ilel ta kʼusitik ta jnoptik, ta jpastik xchiʼuk ta jkʼopojeltik ti muʼyuk ta jtikʼ jbatik ta politikae.
Svulesobil ta joltik
¿Kʼusi skʼan jtojbetik li ajvaliletike?
¿Kʼu yuʼun muʼyuk ta jtikʼ jbatik li ta politikae?
¿Butik van xuʼ vokol chkaʼitik ti tukʼ xkakʼ jbatike?
XUʼ TO XAKʼEL LIʼE
¿Kʼusitik van xuʼ xkiktatik sventa tukʼuk xkakʼ jbatike?
¿Kʼuxi xuʼ baʼyel xchapan sbaik li utsʼ alaliletik sventa tukʼ xakʼ sbaik kʼalal te oyik ta yeloval krixchanoetike?
Tukʼuk xkakʼ jbatik ta stojolal Jeova kʼalal te oyutik ta yeloval krixchanoetike (4:25)
Junantike tsots tajek skʼoplal chilik spakbel skʼoplal li slumalike, pe ¿mi tsots van tajek skʼoplal?
¿Kʼuxi chkakʼtik ta ilel ti muʼyuk te kapal jkʼoplaltik ta balumil kʼalal ta jchʼamtik junuk abtelale?
-