VIVLIOTEKA TA INTERNET yuʼun Watchtower

«Ventainbilik-o yuʼun chʼul espiritu [...] xchiʼuk xkuxet noʼox yoʼontonik»

Jpukbetik skʼoplal li Ajvalilal yuʼun Diose
- 5. ¿Butik la xcholik mantal li Bernabe xchiʼuk Saulo kʼalal kʼotik ta Chipree?
  
  ⁵ Li Bernabe xchiʼuk Sauloe lokʼik batel ta Antiokia xchiʼuk bat ta yokik kʼalal to ta Seleusia. Vaʼun, totsik batel ta varko sventa xbatik ta Chipre ti joyol ta nabe, te van chib sien kilometrouk snamal.d Li Bernabee te likem ta Chipre, jaʼ yuʼun oy van tajek ta yoʼonton ti xalbe lekil aʼyejetik li jnaklejetik ta slumale. Kʼalal kʼotik ta Salamina ti te xkom ta tiʼ nab ta slokʼeb kʼakʼale, «lik spukbeik skʼoplal skʼop Dios ta snail tsobobbailetik yuʼun judaetik» (Ech. 13:5).e Laje, la xtuchʼik jelavel li lum Chipree. Laj van xcholik batel mantal li ta jteklumetik ti bu jelavike. Akʼo mi mu jnaʼtik lek bu jelavik, xanavik van 160 kilometrouk.
  
  SNAIL TSOBOBBAILETIK YUʼUN JUDAETIK
  
  Li chaʼpʼel kʼop snail tsobobbail xie, jaʼ skʼan xal «tsobajel» o «mukʼta tsobajel». Ta slikebale, jaʼ jech chalik kʼalal chalbeik skʼoplal stsobajelike, pe ta mas tsʼakale jaʼ xa jech lik yalik sventa xalbeik skʼoplal ti bu tstsob sbaik sventa xichʼik ta mukʼ Jeovae.
  
  Yileluke, li snail tsobobbaile jaʼo lik kʼalal chukbilik batel ta Babilonia li j-israeletik ti jalij 70 jabile o jaʼo kʼalal muʼyuk toʼox jal slokʼelike. Li judaetike te chbatik ta snail tsobobbail sventa xichʼik ta mukʼ Jeova, ti oyuk kʼusi xchanik ta stojolale, ti te xaptaik li Tsʼibetike xchiʼuk ti xchikintaik mantaletike. Li ta baʼyel sigloe, oy snail tsobobbail li ta jujun jteklum ta Palestinae, li ta mukʼtik jteklume oy jayibuk xtok, jaʼuk li ta Jerusalene ep tajek.
  
  Pe kʼalal kolik xa ox lokʼel ta Babiloniae, mu skotoluk judaetik sutik batel ta Palestina, yuʼun ep buchʼutik batik ta yan lum ta skoj li yabtelike. Li ta sjabilaltik 400 kʼalal muʼyuk toʼox talem Jesuse, oy xa ox parajeetik ti te nakal j-ebreoetik li ta 127 lumetik ta yosilal Persiae (Est. 1:1; 3:8). Ta mas tsʼakale, oy xa ox jayib parajeetik ti te nakal judaetik li ta jeltos lumetik ta sjoylejal li nab Mediterraneoe. Li parajeetik taje laj yichʼik ojtikinel kʼuchaʼal diáspora ti jaʼ skʼan xal «tanpuk batik» xchiʼuk la svaʼanik nail tsobobbailetik ti bu nakajtike.
  
  Li ta jujun savadoe, oy buchʼu chchan xchiʼuk chchapbe smelolal mantal li ta nail tsobobbaile, te chvaʼi ta oʼlol xchiʼuk oy chotlebaletik li ta oxjot yibel nae. Skotol li viniketik ti tukʼ yakʼoj sbaike xuʼ x-echʼ yaptaik li mantale, xuʼ xchapbeik smelolal xchiʼuk xuʼ xetʼesik mantaletik.

«Ventainbilik-o yuʼun chʼul espiritu [...] xchiʼuk xkuxet noʼox yoʼontonik»

Jpukbetik skʼoplal li Ajvalilal yuʼun Diose
- d Li varkoetik ta baʼyel sigloe xuʼ xanavik 160 kilometro ta jun kʼakʼal, pe jaʼ noʼox mi oy lek ikʼe, yuʼun mi chʼabale, xuʼ van mu sta jech snamal chanavik.