¿Kʼu yuʼun toj ep vokolil xchiʼuk choplejal?

Kʼalal oy kʼusi chopol chkʼot ta pasele, xuʼ van xi ta jakʼbe jbatike: «¿Kʼu yuʼun ti jech kʼot ta pasele?». Pe tspat koʼontontik li Vivliae, yuʼun jamal chalbutik ti kʼu yuʼun jech chkʼot ta pasele.

1. ¿Kʼusi la spas Satanas sventa spas ta jmulavil li krixchanoetike?

Li Satanase la stoy sba ta stojolal Dios. Ta skoj ti tskʼan tspas ta mantal li yantike, oy kʼusi la spas sventa stoy sbaik ta stojolal Dios li Adan xchiʼuk Evae. Pas onoʼox yuʼun, yuʼun la sloʼla li Evae (Jenesis 3:1-5). Laj yakʼbe snop ti chopol yoʼonton li Jeovae, ti oy la kʼusitik muʼyuk ch˗akʼbat skʼupine. Jaʼ xa noʼox muʼyuk xlokʼ ta alel yuʼun ti mas la xmuyubajik mi muʼyuk chchʼunbeik smantal Diose. Kʼalal laj yal Satanas ti muʼyuk la chcham li Evae, jaʼ noʼox la sjut kʼop. Jaʼ yuʼun, li Vivliae chal ti jaʼ jun «jutkʼop xchiʼuk jaʼ totil yuʼun li jutbil kʼope» (Juan 8:44).

2. ¿Kʼusi kʼot ta nopel yuʼunik li Adan xchiʼuk Evae?

Li Jeovae toj lek yoʼonton ta stojolal li Adan xchiʼuk Evae. Laj yalbe ti xuʼ slobeik sat skotol li teʼetik ta nichimaltike, jtekʼ noʼox ti muʼyuk xakʼbe sloʼe (Jenesis 2:15-17). Akʼo mi jech, laj onoʼox slobeik sat li jpets teʼ taje. Vaʼun, li Evae «la stulbe li sate, jech la sloʼ». Ta tsʼakale, «jech lik sloʼ» li Adan eke (Jenesis 3:6). Xchaʼvoʼalik muʼyuk la xchʼunbeik smantal Dios. Li Adan xchiʼuk Evae tukʼil krixchanoetik toʼox, jaʼ yuʼun mu vokoluk chaʼiik spasel jechuk li kʼusi leke. Pe yalel xa muʼyuk la xchʼunbeik smantal li Diose, la saʼ smulik xchiʼuk mu xa skʼanik ti spasatik ta mantale. Tsots laj yil˗o svokolik li kʼusi kʼot ta nopel yuʼunike (Jenesis 3:16-19).

3. ¿Kʼuxi la jtatik ta makiel li kʼusi kʼot ta nopel yuʼunik Adan xchiʼuk Evae?

Kʼalal la saʼ smulik li Adan xchiʼuk Evae, pasik ta jmulavil krixchanoetik xchiʼuk jaʼ xa jech komik ek li yalab xnichʼnabike. Li Vivliae xi chalbe skʼoplal li Adane: «Jech kʼuchaʼal ta jun noʼox vinik och talel li mulil ta balumile, jech ta skoj mulil och talel ek li lajelale, jaʼ yuʼun chcham skotol krixchanoetik ta skoj ti jpasmulil kʼot skotolike» (Romanos 5:12).

Vaʼun chaʼa, ¿kʼu yuʼun ti chkil jvokoltike? Bakʼintike, jaʼ ta skoj li kʼusi chopol chkʼot ta nopel kuʼuntike. Bateltik xtoke, jaʼ ta skoj li kʼusi chopol chkʼot ta nopel yuʼun li yantike. Moʼoj xtoke, xuʼ jnuptan jvokoltik ta skoj ti bu oyutike o kʼalal jaʼo bu chijbate (kʼelo Eklesiastes 9:11).

JCHANTIK TO BATEL MAS

4. ¿Buchʼu ta smul li jvokoltike?

Epal krixchanoetik tsnopik ti jaʼ sventainoj balumil li Diose. ¿Mi jech van xanaʼ? Kʼelik li VIDEOE.

VIDEO: ¿Buchʼu oy ta skʼob li balumile? (1:24)

Kʼelik Santiago 1:13 xchiʼuk 1 Juan 5:19 xchiʼuk albeik skʼoplal li sjakʼobil liʼe:

• ¿Mi jaʼ van ta smul Dios li vokolil xchiʼuk choplejale?

5. ¿Kʼusi kʼotem ta pasel ta skoj ti jaʼ tspas mantal li Satanase?

VIDEO: ¿Kʼu yuʼun yakʼoj to oyuk vokolil li Diose? (jtuchʼ noʼox) (3:07)

Kʼelik Jenesis 3:1-6 xchiʼuk albeik skʼoplal li sjakʼobiltak liʼe:

• ¿Kʼusitik laj yal Satanas ti mu meleluke? (Kʼelik li versikulo 4 xchiʼuk 5).

• ¿Kʼusi laj yal Satanas sventa xakʼ ta aʼiel ti oy la kʼusi muʼyuk chakʼbe skʼupin krixchanoetik li Jeovae?

• ¿Mi laj yal Satanas ti skʼan xventainatik yuʼun Jeova li krixchanoetik sventa xmuyubajike?

Kʼelik Eklesiastes 8:9 xchiʼuk albeik skʼoplal li sjakʼobil liʼe:

• ¿Kʼu yelan jkuxlejaltik ta skoj ti maʼuk sventainoj balumil li Jeovae?

1. Li Adan xchiʼuk Evae tukʼil krixchanoetik toʼox xchiʼuk te toʼox nakalik ta Paraiso. Pe la stoy sbaik ta stojolal Jeova, yuʼun jaʼ la xchʼunbeik li kʼusi laj yal Satanase.

2. Kʼalal laj xa ox stoy sbaike, jaʼ jech puk ta spʼejel balumil li mulile, li vokolile xchiʼuk li lajelale.

3. Li Jeovae chakʼbe slajeb li mulile, li vokolile xchiʼuk li lajelale. Chijpas ta tukʼil krixchano xchiʼuk te chijkuxi ta Paraiso.

6. Li Jeovae kʼux chaʼi kʼalal chkil jvokoltike

¿Mi te noʼox van skʼeloj Dios kʼalal chkil jvokoltike? Kʼelavil kʼusi laj yalik li ajvalil David xchiʼuk li jtakbol Pedroe. Kʼelik Salmo 31:7 xchiʼuk 1 Pedro 5:7 xchiʼuk albeik skʼoplal li sjakʼobil liʼe:

• ¿Kʼu yelan chavaʼi aba k’alal chavaʼi ti yiloj Jeova xchiʼuk ti kʼux chaʼi li jvokoltike?

¿KʼUSI LA ACHAN?

Li choplejal oy ta balumile jaʼ ta smul li Satanas, Adan xchiʼuk Evae. Kʼux tajek chaʼi Jeova kʼalal chkil jvokoltike, jaʼ yuʼun poʼot xa slajesbe skʼoplal.

Svulesobil ta joltik

• Li Satanase, ¿kʼusi laj yalbe Eva ti mu meleluke?

• ¿Kʼuxi la jtatik ta makiel li stoyobbail Adan xchiʼuk Evae?

• ¿Kʼu yuʼun chkaltik ti kʼux chaʼi Jeova kʼalal chkil jvokoltike?

XUʼ TO XAKʼEL LIʼE

Kʼelavil kʼusi chal Vivlia ta sventa li mulile.

«¿K’usi jaʼ li mulile?» (Xuʼ te xata ta jw.org)

Kʼelavil kʼuxi la sokesbe skʼoplal Jeova ta nichimaltik Eden li Satanase.

«¿Kʼu yuʼun chakʼ to oyuk vokolil li Diose?» (Li Jkʼel-osil ta toyole, 1 yuʼun enero ta 2014)

Kʼelavil kʼuxi tspat koʼontontik li kʼusi chalbe skʼoplal liʼe.

«¿K’u yuʼun ep lajik ta milel li judaetike? ¿K’u yuʼun muʼyuk la smak ta be li Diose?» (Xuʼ te xata ta jw.org)

Kʼelavil kʼusi laj yakʼ venta jun vinik ta skoj ti oy svokole.

Mu xa jtukuk chkaʼi jba (5:09)

Li baʼyel jtot jmeʼtik Adan xchiʼuk Evae la stoy sbaik ta stojolal Dios. Jaʼ yuʼun, li voʼotike jpasmulilutik, chkil jvokoltik xchiʼuk chijchamutik.a Pe oy to spatobil koʼontontik, yuʼun li Jeovae la stak talel ta balumil Xnichʼon sventa xcham ta jtojolaltik, jaʼ jech la spojutik lokʼel ta mulil xchiʼuk li ta lajelale. Li Vivliae chal ti la spojutik Jesus kʼalal cham ta jtojolaltike. ¿Kʼuxi ti la spojutike? Kalbetik junuk skʼelobil: kʼalal oy buchʼu chichʼ pasel sekuestrare, skʼan xichʼ akʼbel stojol sventa xichʼ pojel lokʼel. Li jtojoltik laj yakʼ Jesus sventa spojutik eke jaʼ li stuk’il kuxlejale (kʼelo Mateo 20:28). Kʼalal lokʼ ta yoʼonton Jesus ti mu liʼuk chkuxi sbatel osil ta balumile xchiʼuk ti laj yakʼ xkuxlejale, jaʼ sventa xuʼ jkʼupintik yan velta li kʼusi chʼay yuʼunik li Adan xchiʼuk Evae. Jech xtok, jaʼ svinajeb ti skʼanojutik tajek li Jeova xchiʼuk Jesuse. Li xchanobil liʼe tskoltaot sventa xatoj ta vokol ti cham ta atojolal li Jesuse.

1. ¿Kʼuxi ta jtabetik sbalil avi ti cham li Jesuse?

Ta skoj ti jpasmulilutike, ep kʼusi ta jpastik ti mu skʼupin li Jeovae. Mi ta jsutes koʼontontik ta melel kʼalal ta jsaʼ jmultike, mi ta jkʼanbetik perton Jeova ta sbi li Jesuse xchiʼuk mi muʼyuk xa ta jchaʼpastik li kʼusi chopole, xuʼ me xkamigointik lek li Diose (1 Juan 2:1). Xi chal li Vivliae: «Jun noʼox velta ta j˗echʼel cham Kristo sventa xchʼay li muliletike, cham jun tukʼil vinik ta stojolal epal krixchanoetik ti muʼyuk tukʼike sventa sbeiltasoxuk batel ta stojolal Dios» (1 Pedro 3:18).

2. ¿Kʼuxi ta jtabetik sbalil ta jelavel ti cham li Jesuse?

Li Jeovae «laj yakʼ li jun noʼox Xnichʼon sventa mu xichʼ lajesel li buchʼu chakʼ xchʼunel yoʼonton ta stojolale, moʼoj, yuʼun jaʼ sventa tsta˗o xkuxlejal sbatel osil» (Juan 3:16). Ta skoj li kʼusi la spas Jesuse, li Jeovae jutuk xa skʼan slajesbe skʼoplal skotol li kʼusitik chopol kʼotem ta pasel ta skoj li stoyobbail Adane. Jaʼ yuʼun, mi ep sbalil chkiltik ti laj yakʼ xkuxlejal li Jesuse, xuʼ xijkuxi sbatel osil ta balumil mi pasem xa ox ta paraisoe (Isaias 65:21-23).

JCHANTIK TO BATEL MAS

3. Li Jesuse la spojutik lokʼel ta mulil xchiʼuk ta lajelal

VIDEO: ¿K’u yuʼun cham li Jesuse? (sbavokʼal) (2:01)

• ¿Kʼusi xuʼ ox skʼupin li Adane? Pe ¿kʼusi kʼot ta pasel kʼalal muʼyuk la xchʼunbe smantal li Diose?

Kʼelik Romanos 5:12 xchiʼuk albeik skʼoplal li sjakʼobil liʼe:

• ¿Kʼuxi la ata ta makiel li smul Adane?

Kʼelik Juan 3:16 xchiʼuk albeik skʼoplal li sjakʼobil liʼe:

• ¿Kʼu yuʼun la stak talel ta balumil Xnichʼon li Diose?

1. Tukʼil vinik toʼox li Adane, pe kʼalal la spas smule, pas ta jmulavil yuʼun skotol li krixchanoetike xchiʼuk chchamik.

2. Tukʼil krixchano jelav li Jesuse xchiʼuk la xchʼunbe smantal Dios, jech oxal xuʼ xijpas ta tukʼil krixchano li ta jelavele xchiʼuk xuʼ xijkuxi sbatel osil.

4. Xuʼ stabe sbalil skotol krixchanoetik ti cham li Jesuse

VIDEO: ¿Kʼu yuʼun cham li Jesuse? (xchaʼvokʼal) (2:00)

• ¿Kʼuxi tspoj epal krixchanoetik li jun noʼox vinike?

Kʼelik 1 Timoteo 2:5, 6 xchiʼuk albeik skʼoplal li sjakʼobil liʼe:

• Tukʼil vinik toʼox li Adane, pe kʼalal la spas smule, pas ta jmulavil yuʼun skotol li krixchanoetike xchiʼuk chchamik. Li Jesuse tukʼil krixchano jelav. ¿Kʼusi la spas ti toj˗o yuʼun skotol krixchanoetik li «pojelal» laj yakʼe?

5. Jaʼ amoton yakʼojbot Jeova ti laj yakʼ xkuxlejal li Jesuse

Li yamigotak Jeovae jaʼ smoton chaʼiik ti laj yakʼ xkuxlejal ta stojolalik li Jesuse. Jkʼeltik avil buchʼu jech laj yaʼi sba, kʼelik Galatas 2:20 xchiʼuk albeik skʼoplal li sjakʼobil liʼe:

• ¿Kʼusi laj yal Pablo ti chakʼ ta ilel ti jaʼ smoton laj yaʼi ti cham ta stojolal li Jesuse?

Kʼalal la saʼ smul li Adane, ta persa cham xchiʼuk jaʼ jech chkʼot ta stojolal li snitilulaltak eke. Pe li Jeovae la stak talel Xnichʼon ta balumil sventa xcham. Vaʼun, xuʼ xakuxi ta sbatel osil.

Mi laj yichʼ kʼelel li versikuloetik liʼe, nopo avaʼi kʼu yelan laj yaʼi sba Jeova kʼalal laj yil ti chil svokol li Xnichʼone. Kʼelik Juan 19:1-7 xchiʼuk 16-18 xchiʼuk albeik skʼoplal li sjakʼobil liʼe:

• ¿Kʼu yelan chavaʼi aba ta skoj li kʼusi la spas ta atojolal li Jeova xchiʼuk Jesuse?

¿KʼUSI LA ACHAN?

Ta skoj ti cham li Jesuse, xuʼ xakʼutik ta perton li Jeovae xchiʼuk xuʼ xijkuxi ta sbatel osil.

Svulesobil ta joltik

• ¿Kʼu yuʼun cham li Jesuse?

• ¿Kʼuxi ti xtoj˗o skotol krixchanoetik li pojelal laj yakʼ Jesuse?

• ¿Kʼuxi chatabe sbalil ti cham Jesuse?

XUʼ TO XAKʼEL LIʼE

Kʼelavil kʼu yuʼun xuʼ spojutik ti laj yakʼ xkuxlejal Jesuse.

«¿Kʼuxi ti tspoj epal krixchanoetik kʼalal laj yakʼ xkuxlejal li Jesuse?» (Xu’ te xata ta jw.org)

Kʼelavil kʼuxi xuʼ xakol lokʼel li ta mulil xchiʼuk ta lajelale.

«¿Kʼu yelan tspojutik li Jesuse?» (Xuʼ te xata ta jw.org)

¿Mi chakʼutik ta perton Jeova mi tsots la jpas jmultike?

«Kʼusitik chichʼ jakʼel ta sventa Vivlia» (Li Jkʼel-osil ta toyole, 1 yuʼun mayo ta 2013)

Kʼelavil kʼuxi jelbat-o stalelal jun vinik kʼalal laj yaʼibe smelolal ti ay xchʼay jmultik li Kristoe.

«Maʼuk xa batem ta koʼonton li majvaneje» (Xuʼ te xata ta jw.org)