¿Kʼusi skʼan xal ti oy ta koʼontontik Skʼop Diose? ¿Mi persa skʼan oyuk jrelijion sventa xkakʼ ta ilel ti oy ta koʼonton li Skʼop Diose?
Li kʼusi chal Vivliae
Li ta Vivliae chalbe skʼoplal ti buchʼu oy ta yoʼonton mantale, jaʼ li buchʼu tspas li kʼusi lek chil Diose xchiʼuk jaʼ jech snopben ek. Li buchʼu oy ta yoʼonton mantale chakʼ persa jechuk xkuxlebin li kʼusi chal smantaltak Diose xchiʼuk ti chakʼ sba ta beiltasel yuʼun li xchʼul espirituea (Romanos 8:5; Efesios 5:1).
Li Vivliae chchapbe smelolal kʼusi sjelbenal li buchʼu oy ta yoʼonton mantale xchiʼuk li buchʼu muʼyuke. Jech kʼuchaʼal liʼe. Li krixchano ti jech kuxul kʼuchaʼal tskʼan bekʼete, mu xchʼam li kʼusitik yuʼun xchʼul espiritu Diose, jaʼ xkaltik, li kʼusitik chakʼ ta chanel Diose (1 Korintios 2:14-16). Jech xok, li buchʼutik muʼyuk ta yoʼontonik mantale ti jaʼ noʼox tspasik kʼusi tskʼan bekʼete, muʼyuk lek yoʼontonik xchiʼuk muʼyuk jun yoʼontonik xchiʼuk li yantike. Jaʼ noʼox batem ta yoʼontonik li itʼixale xchiʼuk ti tstsak sbaik ta kʼope. Taje mu jechuk stalelalik li buchʼutik oy ta yoʼontonik mantale (1 Korintios 3:1-3). Li Vivliae chal ti buchʼutik chchopol kʼoptavanik xchiʼuk ti chchʼak sba yuʼunik li buchʼu yamigo sbaike, chal ti xkoʼolaj ta chonbolometik ti muʼyuk yichʼojik xchʼul espiritu Diose (Judas 19; Proverbios 16:28).b
Li ta mantal liʼe ta jkʼelbetik batel skʼoplal liʼe:
¿Kʼu yuʼun tsots skʼoplal ti oyuk ta koʼontontik li yichʼel ta mukʼ Diose?
¿Mi skʼan van oy junuk jrelijion sventa mas xkakʼ ta koʼonton li mantale?
Junantik tekstoetik ti chalbe skʼoplal kʼusi sbalil tstaik li buchʼutik oy ta yoʼontonik mantale
¿Kʼu yuʼun tskʼan chichʼik ta mukʼ Dios li krixchanoetike?
Oy ta koʼontontik mantal, yuʼun jaʼ slokʼolutik li Diose (Jenesis 1:27). Jaʼ yuʼun, mu labaluk sba chkaʼitik ti oy ta yoʼontonik Dios li krixchanoetik xchiʼuk ti tskʼan chchanik mas ta sventa li kʼusitik mu xilike o ti mu stakʼ spikike.
Jkotoltik xuʼ xkakʼ ta ilel jtalelaltik jech kʼuchaʼal stalelal li Jeovae,c yuʼun snaʼ xkʼuxubinvan xchiʼuk mu snaʼ xtʼujvan (Santiago 3:17). Li Diose tstunes xchʼul s-espiritu sventa skolta li buchʼutik chakʼik persa chchʼunbat smantale (Echos 5:32).
¿Kʼu yuʼun tsots skʼoplal ti oyuk ta koʼontontik li yichʼel ta mukʼ Diose?
Ti chkichʼtik ta mukʼ Diose jaʼ tskoltautik sventa jtatik jun oʼontonal xchiʼuk kuxlejal (Romanos 8:6). Taje jaʼ jun mukʼta mantal yakʼojbutik li Diose.
Li kuxlejale: Li Diose jamal yaloj ti chakʼbe kuxlejal sbatel osil li buchʼutik oy ta yoʼontonik mantale (Juan 17:3; Galatas 6:8).
Jun oʼontonal: Jaʼ skʼan xal ti jun koʼontontik xchiʼuk Diose. Li buchʼutik jaʼ noʼox batem ta yoʼontonik li kʼusi tskʼan stukike, jaʼ yajkontra Dios chkʼot (Romanos 8:7). Jech xtok, chal ti buchʼutik oy ta yoʼontonik mantale, ch-akʼbatik «li jun oʼontonal yuʼun Dios ti toj echʼ xa noʼox lek ti jaʼ mu sta li snopben krixchanoetike» (Filipenses 4:6, 7). Kʼalal jun yoʼontonike, xmuyubajik xtok (Mateo 5:3).
¿Kʼusi xuʼ jpas sventa mas xkakʼ ta koʼonton li mantale?
Chano xchiʼuk akʼo ta akuxlejal li Skʼop Diose. Spas avuʼun mi la achan li Vivliae, yuʼun te chal li kʼusi tsnop Diose, ti jaʼ la stsʼiba viniketik ti «tijbat yoʼontonik yuʼun li chʼul espiritue» (2 Pedro 1:21). Li kʼusi chachane jaʼ tskoltaot sventa xavichʼ ta mukʼ Dios «ta chʼul espiritu xchiʼuk ta melel», jaʼ xkaltik, ti jaʼ tsbeiltasot li chʼul espiritu xchiʼuk ti jaʼ tskoltaot sventa xapasbe li kʼusi tskʼan yoʼonton Diose (Juan 4:24).
Kʼopono Dios xchiʼuk albo ti akʼo skoltaote (Lukas 11:13). Jaʼ me tskoltaot Dios sventa xavakʼ ta ilel lekil talelaletik jech kʼuchaʼal stalelalik li krixchanoetik ti chichʼik ta mukʼ Diose (Galatas 5:22, 23). Li Diose chakʼbot apʼijil sventa xkuch avuʼun li avokoltake (Santiago 1:5).
Jaʼuk mas xachiʼinan li buchʼutik oy ta yoʼontonik yichʼel ta mukʼ Diose. Jaʼ me tskoltaoxuk sventa mas x-ayan ta avoʼonton li mantale (Romanos 1:11, 12). Pe mi oy avamigotak ti mu jechuk tsnopik kʼuchaʼal li Diose, mu me xachʼi ta mantal (Santiago 4:4).
¿Mi skʼan van oy junuk jrelijion sventa mas xkakʼ ta koʼonton li mantale?
Manchuk mi ochemutik ta jun relijion, maʼuk skʼan xal ti lek xa oyutik ta mantale. Xi chal li Vivliae: «Mi oy junuk vinik ti tsnop ti oy srelijione, pe mi mu snaʼ spajesel li yokʼe, yakal tsloʼla yoʼonton stuk xchiʼuk chʼabal sbalil ti jech chichʼ ta mukʼ Diose» (Santiago 1:26, tsʼib ta yok vun).
Akʼo mi jech, li Vivliae chal ti buchʼutik oy ta yoʼontonik mantale, jaʼ jech chichʼik ta mukʼ Dios kʼuchaʼal tskʼane. Xchʼunojik ti jun noʼox xchʼul espiritu oye, ti jaʼ chakʼ ti jmoj xichʼik ta mukʼ Dios jech kʼuchaʼal junuk bekʼtalile, jaʼ xkaltik ti jmojuk oyik ta skoj li chʼul espiritue (Efesios 4:1-4).
Li kʼusitik xchʼunojik ti mu meleluke
Li kʼusi xchʼunoj yantike: Jaʼ ti kʼusiuk noʼox spas ta xkuxlejalike xuʼ x-akʼbat-o smuyubajelik o ti chkoltaatik sventa masuk to lek stalelalike.
Li kʼusi melele: Li Vivliae chal ti buchʼu oy ta yoʼonton Dios ta melele, maʼuk noʼox jun chib kʼusi tsjel ta xkuxlejal, ti lek chaʼi sba stuke manchuk mi mu saʼ li Diose, yuʼun jaʼ chbeiltasat yuʼun li Diose. Li buchʼu oy lek ta yoʼonton li mantale, jun yoʼonton chaʼi sba kʼalal snaʼoj ti jaʼ Jpasvanej yuʼun li Jeovae xchiʼuk ti jaʼ jech xkuxlejal kʼuchaʼal tskʼan yoʼonton Diose (Salmo 100:3).
Li kʼusi xchʼunoj yantike: Li jun krixchanoe xuʼ mas to x-ayan ta yoʼonton mantal kʼalal chikta spasel li kʼusitik skʼupine o ti tsyayijes sba stuke.
Li kʼusi melele: Ep krixchanoetike tsnopik ti chichʼik-o ta mukʼ Dios kʼalal tsyayijes sba stukike, pe taje jaʼ noʼox jech snopben li krixchanoetike (Kolosenses 2:18, 23). Li Vivliae chal ti kʼalal oy ta koʼontontik mantale, muʼyuk chakʼ jvokoltik, yuʼun xijmuyubaj noʼox (Proverbios 10:22).
Li kʼusi xchʼunoj yantike: Li buchʼutik chnopajik ta stojolal li chʼulelaletike o tspasik espiritismoe xuʼ la mas x-ayan ta yoʼontonik li mantale.
Li kʼusi melele: Ep krixchanoetik ti tspasik li espiritismoe xchʼunojik ti xuʼ la xchiʼinik ta loʼil li animaetike. Pe li Vivliae jamal chal ti buchʼutik chamemike mu xa kʼusi snaʼik (Eklesiastes 9:5). Jaʼ yuʼun, li buchʼutik tspasik li kʼusitik taje, jaʼ yakal chchiʼinik ta loʼil li espirituetik ti kontra chil li Diose. Li espiritismoe chopol tajek chil li Diose xchiʼuk muʼyuk chkoltaat li jun krixchano sventa x-ayan ta yoʼonton li mantale (Levitiko 20:6; Deuteronomio 18:11, 12).
Li kʼusi xchʼunoj yantike: Stalel jech ti oy ta yoʼontonik mantal skotol li kʼusi kuxajtike.
Li kʼusi melel: Skotol li kʼusitik pasbil ta vinajel balumile tsmukʼibtasbe skʼoplal li Diose (Salmo 145:10; Romanos 1:20). Akʼo mi jech, li Diose jaʼ noʼox laj yakʼbe spʼijil li krixchanoetike xchiʼuk ti xuʼ ta kʼunkʼun x-ayan ta yoʼontonik li mantale. Jaʼuk li chonbolometike mu snaʼik snopel xchiʼuk mu xuʼ ti lek xil sbaik xchiʼuk li Diose, yuʼun jaʼ noʼox tspasik li kʼusitik jtunel yuʼunike (2 Pedro 2:12). Jaʼ yuʼun, li Vivliae jelel chalbe skʼoplal ti kʼu yelan stalel li buchʼu oy ta yoʼonton mantal xchiʼuk li buchʼu jaʼ noʼox jech stalelal kʼuchaʼal chonbolome (Santiago 3:15; Judas 19).
a Li ta kʼopetik laj yichʼ tsʼibael li Vivlia ta voʼnee li jpʼel kʼop «espiritu» xie jaʼ skʼan xal «yip kuxlejal». Li yan kʼusi skʼan xale jaʼ chakʼ ta aʼiel li kʼusi mu xvinaj ta kʼelele, pe ti oy yipe xchiʼuk ti chbakʼe. Li Vivliae chalbe skʼoplal ti Diose jaʼ jun espiritu ti mu kʼusi xkoʼolaj-oe. Li jun krixchano ti oy lek ta yoʼonton mantale tstsak ta venta Dios kʼalal oy kʼusi tsnop tspase xchiʼuk chakʼ ti akʼo xbeiltasat yuʼun li xchʼul espiritu Diose.
b Kʼalal chalbe skʼoplal Vivlia li krixchano ti jaʼ jech kuxul kʼuchaʼal tskʼan bekʼete, jaʼ skʼoplal li buchʼu jaʼ noʼox tsnop xchiʼuk tspas li kʼusi tskʼan stuke ti jaʼ muʼyuk mas tsots skʼoplal chil o ti chʼabal sbalil ta jyalel chil li ta smantaltak Diose.
c Li Vivliae chal ti jaʼ Jeova sbi li Diose (Salmo 83:18).