LI KUXLEJALE ep ta velta ti kʼux ch-echʼe, ti mu jechuk chkʼot ta pasel ti kʼuyelan ta jkʼantike xchiʼuk ti jtuk ta xkaʼi jbatike, ti xuʼ ta anil noʼox jvul koʼontontik yuʼune xchiʼuk noxtok xuʼ ti mu xa xmalaj kuʼuntike. Ti kʼalal jech chkʼot ta pasel taje xuʼ van ta jakʼbe jbatik mi oy buchʼu xuʼ xi skoltautik. Li ta 2 Corintios 1:3, 4, li jtakbol Pabloe ta xalbutik bu ta tael li patob oʼontonal ti mu snaʼ spas paltae: li jDiostik, Jeovae.

Li ta versikulo 3 jaʼ te chalbe skʼoplal Jeova kʼuchaʼal «li Totil ti ep chcʼuxubinvane». ¿Kʼusi chakʼ ta naʼel taje? Li jpʼel kʼop «ep chcʼuxubinvan[...]», xie, jaʼ noʼox jpʼel kʼop li ta griego ti jaʼ chakʼ ta aʼyel li xkʼuxul oʼontonal kʼalaluk oy buchʼu yan chil svokole.a Jaʼ yuʼun, jlom pʼijil viniketike ta xalik ti lek xkʼot-o ti jech xichʼ alel kʼuchaʼal liʼe: «Li Totil ti kʼuxutik ta yoʼontone» o «li Totil ti tsvul yoʼonton ta jtojolaltike». Ti vaʼ «ep chcʼuxubinvane» maʼuk noʼox ta yutil yoʼonton chkom, yuʼun ta xtijbat yoʼonton sventa akʼo xakʼ ta ilel. Mu ta naʼeteluk, ti vaʼ yelan stalelal taje tstij koʼontontik sventa akʼo xi jnopajutik mas ta stojolal, ¿mi mu jechuk?

Li Pablo eke ta xal ti Jeovae jaʼ «Dios ti chispatbutic coʼntontique». Jun vinik ti chchanbe skʼoplal li Vivliae, chal ti jpʼel kʼop ta griego ti jelubtasbil kʼuchaʼal «chispatbutic coʼntontique», ti xie, jaʼ la skʼan xal ti «chichʼ tsatsubtasbel yoʼonton li buchʼu yakal ta vul oʼonton o chat yoʼontone, xchiʼuk noxtok ti skʼan xichʼ patbel yoʼonton o koltaele». Li livro The Interpreterʼs Bible, xi ta xale: «Yakʼbel spatobil yoʼonton li buchʼu chil svokole jaʼ skʼan xal ti chkakʼbetik stsatsal yoʼonton sventa xkuch batel yuʼun li xkʼuxul yoʼontone».

Pe xuʼ van xi jakʼbe jbatike: «¿Kʼuxi chakʼbutik stsatsal koʼontontik li Diose? ¿Kʼuxi tspatbutik koʼontontik sventa xkuch batel kuʼuntik li xkʼuxul koʼontontike?». Jaʼ te chakʼbutik li ta sKʼope, li Vivliae, xchiʼuk ti xuʼ jkʼopontik ta orasione. Jaʼ noʼox jech xtok, li Pabloe chi yalbutik ti Diose ta xi yakʼbutik li sKʼope sventa «jech chpat coʼntontic, jech jun coʼntontic ta jmalatic li cʼusi ta jmalatique». Jech noxtok chakʼ ta ilel ti jtos sbalil kʼalal ta jpastik orasion ta sjunul koʼontontike jaʼ liʼe: «Jech chaspasboxuc o ta jun avoʼntonic li Diose. Li jun oʼntonal chacʼ Diose echʼem to xjelov jech chac cʼu chaʼal ta jnop ta jcʼantic li vuʼutique» (Romanos 15:4; Filipenses 4:7).