Li Jeovae lek xchapet tspas skotol li kʼusitike (1 Korintios 14:33). Jaʼ yuʼun, lek chapal li steklumal eke. ¿Kʼu yelan chapal li stsobobbail yajtsʼaklomtak Kristoe? ¿Kʼuxi xuʼ jkolta jbatik ek sventa lekuk xchapet skotole?

1. ¿Buchʼu jaʼ li jolil ta tsobobbaile?

«Jaʼ jolil ta stojolal tsobobbail li [Kristoe]» (Efesios 5:23). Li Jesuse te to ta vinajel tskʼel talel li kʼusitik tspas li steklumal Jeova ta spʼejel balumile. Li Jesuse la stʼuj li tukʼil xchiʼuk pʼijil mosoil ti jaʼik jtsop moletik ti ep xa kʼusitik xchanojik ti ojtikinbil kʼuchaʼal Jtsop Jbeiltasvaneje (kʼelo Mateo 24:45-47). Jech kʼuchaʼal la spasik li jtakboletik xchiʼuk moletik ta Jerusalen ta voʼnee, li Jtsop Jbeiltasvaneje jaʼ jech tsbeiltasik ek li tsobobbailetik ta spʼejel balumile (Echos 15:2). Pe li viniketik taje maʼuk me jnitvanejetik li ta j˗organisasionkutike. Tskʼelik ta Vivlia sventa snaʼik li kʼusi tskʼan Jeova akʼo spasike xchiʼuk ta sjunul yoʼonton chchʼunik li kʼusi chal Jesuse.

2. ¿Kʼusi tspasik li moletike?

Li moletik ti jaʼik yajtsʼaklomtak Kristo ti ep xa kʼusi xchanojike chakʼik ta chanel li kʼusi chal Vivliae, tskoltaik xchiʼuk tspatbeik yoʼonton li ermanoetike. Li moletik taje muʼyuk tskʼan stojolik ta sventa li kʼusi tspasike. Yuʼun ‹ta slekil yoʼonton tspasik li kʼusi tskʼan yoʼonton Diose, maʼuk ta skoj ti tskʼanik takʼin sventa xloʼlavanike, moʼoj, ta sjunul yoʼonton tspasik› (1 Pedro 5:1, 2). Li moletike ta xichʼik koltael yuʼun li siervo ministerialetike. Ta mas tsʼakale, li siervo ministerialetike xuʼ xkʼotik ta moletik ek mi pas yuʼunik li kʼusitik chichʼ kʼanele.

Li Jtsop Jbeiltasvaneje tstʼuj junantik moletik sventa xtunik ta jkʼelvanejetik ta sirkuito. Li ermanoetik taje tsvulaʼanik jayibuk tsobobbailetik sventa sbeiltasik xchiʼuk spatbeik yoʼonton li ermanoetike. Jech xtok, jaʼ tskʼelik mi chakʼ ta xkuxlejalik kʼusi chal Vivlia junantik ermanoetik sventa xtunik ta moletik o ta siervo ministerial (1 Timoteo 3:1-10, 12; Tito 1:5-9).

3. ¿Kʼusi tspasik ta jujuntal li stestigotak Jeovae?

Skotolik tskʼupil kʼoptabeik «sbi Jeova» kʼalal chal sloʼilik, chetʼes sparteik xchiʼuk kʼalal chkʼejinike. Jech tspasik xtok kʼalal chcholik mantal ti bu kʼalal xuʼ yuʼunike (kʼelo Salmo 148:12, 13).

JCHANTIK TO BATEL MAS

4. Toj lek chbeiltasvan li Jesuse

¿Kʼusitik chalbutik Jesus ti akʼo jpastike? Kʼelik Mateo 11:28-30 xchiʼuk albeik skʼoplal li sjakʼobiltak liʼe:

• ¿Kʼu yelan stalelal li Jesus ti jaʼ jnitvanej kuʼuntike? ¿Kʼu yelan tskʼan ti akʼo xkaʼi jbatik yuʼune?

VIDEO: Li moletike koltavanik kʼalal echʼ nikel ta Nepale (4:56)

Li Vivliae chalbutik ta jamal kʼu yelan skʼan spas yabtelik li moletike.

Kʼelik Isaias 32:2 xchiʼuk 1 Pedro 5:1-3 xchiʼuk albeik skʼoplal li sjakʼobiltak liʼe:

• Li Jesuse jun noʼox yoʼonton yuʼun li yantike xchiʼuk chakʼik persa spasel jech li moletik eke. ¿Kʼu yelan chavaʼi aba ti jech tspasike?

• ¿Kʼuxitik yan chchanbeik stalelal Jesus li moletike?

5. Chakʼ ta xkuxlejalik kʼusi chakʼik ta chanel li moletike

VIDEO: Moletik, ¡skʼan me jbabeoxuk ta spasel li abtelale! (7:39)

Li Jesuse jamal laj yal kʼu yelan stalelal skʼan xakʼik ta ilel li ermanoetik ti jaʼik jbabe li ta tsobobbaile. Kʼelik Mateo 23:8-12 xchiʼuk albeik skʼoplal li sjakʼobiltak liʼe:

• Jech kʼuchaʼal chal li Vivliae, ¿kʼu la yelan skʼan spas yabtelik li moletike? ¿Mi jaʼ jech tspasik ek li paleetik xchiʼuk li jnitvanejetik ta relijione?

1. Li moletike chchan Svivliaik xchiʼuk tskolta yutsʼ yalalik sventa jechuk spasik ek.

2. Li moletike tskʼelik skotol li ermanoetike.

3. Nopolik noʼox chcholik mantal li moletike.

4. Li moletik ta tsobobbaile chchanubtasvanik. Jech xtok, chkoltavanik ta xchʼubael li salone xchiʼuk yan kʼusitik.

6. Jchʼunbetik smantal li moletike

Li Vivliae chalbutik ti kʼu yuʼun skʼan jchʼunbetik smantal li moletike. Kʼelik Ebreos 13:17 xchiʼuk albeik skʼoplal li sjakʼobiltak liʼe:

• ¿Kʼu yuʼun chal Vivlia ti skʼan jchʼunbetik smantal xchiʼuk ti xkakʼ jbatik ta ventainel ta stojolalik li buchʼutik jbabe kuʼuntike? ¿Kʼu yelan chavil ti jech ta jpastike? ¿Kʼu yuʼun ti jech chavale?

Kʼelik Lukas 16:10 xchiʼuk albeik skʼoplal li sjakʼobil liʼe:

• ¿Kʼu yuʼun skʼan jchʼunbetik smantal li moletik akʼo mi muʼyuk mas tsots skʼoplal yileluk li kʼusi chalike?

¿KʼUSI LA ACHAN?

Li Jesuse jaʼ tsbeiltas li tsobobbailetike. Ta skoj ti jaʼ pasbilik ta mantal yuʼun Jesus li moletike, li voʼotike ta sjunul koʼontontik ta jchʼuntik li kʼusi chalbutike, yuʼun chchabiutik xchiʼuk chakʼ ta ilel ta xkuxlejalik li kʼusi chakʼik ta chanele.

Svulesobil ta joltik

• ¿Buchʼu jaʼ li jolil ta tsobobbaile?

• ¿Kʼuxi chkoltavanik ta tsobobbail li moletike?

• ¿Kʼusi tspasik ta jujuntal li stestigotak Jeovae?

XUʼ TO XAKʼEL LIʼE

Kʼelavil kʼu yelan skʼanoj yermanoik li Jtsop Jbeiltasvanej xchiʼuk li yan moletike.

Tstsatsubtas yermanoik kʼalal chichʼik nutsele (4:22)

Kʼelavil kʼusi tspasik li jkʼelvanejetik ta sirkuitoe.

Xkuxlejal jun jkʼelvanej ta sirkuito ti tsvulaʼan parajeetike (4:51)

Kʼelavil kʼusi tspasik ta tsobobbail li antsetike.

«¿Mi xuʼ xchanubtasvan li antsetik ti jaʼik stestigotak Jeovae?» (Li Jkʼel-osil ta toyole, xchanobil)

Kʼelavil kʼuxi chakʼik persa moletik sventa spatbeik yoʼonton li yermanotakike.

«Li moletike chkoltavanik sventa xkuxet noʼox koʼontontik» (Li Jkʼel-osil ta toyole, 15 yuʼun enero ta 2013)

1. ¿Kʼusi tojobtasel chal Vivlia ta sventa li malalile?

Li Jeovae laj yakʼ kʼotuk ta jolil ta yutsʼ yalal li malalile (kʼelo Efesios 5:23). Li Jeovae tskʼan ti jaʼuk snop malalil li kʼusitik skʼan spasike xchiʼuk ti stabeuk sbalil li yutsʼ yalale. Li Vivliae xi chalbe mantal li malaliletike: «Jechuk-o me xakʼan avajnilik» (Efesios 5:25). ¿Kʼusi skʼan xal taje? Li malalil ti skʼanoj yajnile lek chkʼuxubin akʼo mi ta stuk oyik o mi te skʼeloj yantik. Chchabi, chakʼ persa ti xmuyubajuk noʼox yuʼune xchiʼuk chakʼbe skotol li kʼusitik chtun yuʼune (1 Timoteo 5:8). Jech xtok, jaʼ oy ta sba ti xlokʼ ta yoʼonton stuk ti xakʼbe li kʼusitik chtun yuʼun ta mantal li yajnile (Mateo 4:4). Jech kʼuchaʼal liʼe, xuʼ jmoj spasik orasion xchiʼuk jmoj tskʼel Svivliaik. Mi lek chkʼuxubin yajnil li malalile, lek˗o me chil sba xchiʼuk li Jeovae (kʼelo 1 Pedro 3:7).

Li Jesuse jaʼ jolil li ta tsobobbaile (Efesios 5:23). Li avie jaʼ tstunes li tukʼil xchiʼuk pʼijil mosoil sventa sbeiltas li yajtsʼaklomtak ti li’ oyik ta balumile (kʼelo Mateo 24:45). Jaʼ la stʼuj stuk Jesus li mosoil taje xchiʼuk jaʼ laj yakʼbe yabtel. Akʼo mi jech, li mosoile chakʼ sba ta ventainel yuʼun li Kristoe xchiʼuk chtun ta stojolal li yermanotak Kristoe. ¿Buchʼu jaʼ li mosoil taje xchiʼuk kʼuxi chchabiutik?