ACHʼUBUK BATEL LI KʼUSI TA JNOPTIKE

7. ¿Kʼusi xuʼ jpastik yoʼ jeltik li kʼusi oy ta yut koʼontontik xchiʼuk ta jnopbentike?

⁷ Pe ¿mi xuʼ xjel ta melel li kʼusi oy ta yut koʼontontik xchiʼuk ta jnopbentike? Xi tstakʼbutik li Skʼop Diose: «Skʼan jechuk-o achʼubuk batel ti kʼu yelan chanopike, xchiʼuk skʼan xalapik li achʼ talelal ti jech laj yichʼ pasel jech kʼuchaʼal la skʼan yoʼonton li Diose, ti laj yichʼ pasel ta batsʼi tukʼilal xchiʼuk ta stukʼil oʼontonale» (Efes. 4:23, 24). Taje chakʼ ta ilel ti xuʼ xijelutike, jaʼ noʼoxe xuʼ van vokol chkaʼitik spasel, yuʼun mu baluk noʼox ti mu jpastik li kʼusi chopol ta jkʼantike. Skʼan x-achʼub batel ti kʼu yelan ta jnoptike, jaʼ xkaltik, ti jkomtsantik li kʼusi ta jkʼantike, li kʼusi nopem xkaʼitik spasele xchiʼuk li kʼusitik tstij koʼontontike. Sventa spas kuʼuntike, skʼan jech-o xkakʼ kipaltik.

8, 9. Li kʼusi kʼot ta stojolal jun ermanoe, ¿kʼuxi chakʼ kiltik ti skʼan jeltik li kʼusi oy ta yut koʼontontik xchiʼuk ta jnopbentike?

⁸ Kalbetik skʼoplal jun ermano ti chuchʼ toʼox pox, ti simaron tajek xchiʼuk ti lek chaʼi tstikʼ sba ta kʼopetike. Pe la sjel xkuxlejal xchiʼuk laj yichʼ voʼ, vaʼun li krixchanoetik ta slumale laj yakʼik venta ti xuʼ sjel jkuxlejaltik li Vivliae. Pe oy kʼusi kʼot ta pasel kʼalal mu toʼox jaluk yichʼoj voʼe, yuʼun jun bat kʼakʼale, kʼot jun jyakubel ta sna ti tskʼan chmajvan yaʼie. Li ermanoe tsʼik toʼox yuʼun sventa mu stsak ta majel li jyakubele. Pe kʼalal laj yaʼi ti la xchopol kʼoptabe sbi Jeovae, xvaʼvun lokʼel ta sna xchiʼuk la stsak ta majel. ¿Kʼu yuʼun ti jech kʼot ta pasele? Yuʼun muʼyuk toʼox sjeloj li snopbene akʼo mi stsaloj xa li xchopol talelal koliyal ti chchan li Skʼop Diose. Ta jpʼel chaʼpʼel noʼoxe, jaʼ ti muʼyuk to sjeloj ta melel li kʼusi oy ta yut yoʼonton xchiʼuk ta snopbene.

⁹ Pe muʼyuk xchibaj li ermano kʼalal jech kʼot ta pasele (Prov. 24:16). Li moletike la skoltaik sventa jech-o xchʼi batel ta mantal, vaʼun pas yuʼun li kʼusi chichʼ kʼanel yoʼ xkʼot ta mol ta tsobobbaile. Pe oy to kʼusi la snuptan ti xkoʼolajtik li kʼusi kʼot ta stojolal ta slikebale, jun velta kʼalal ikʼ xa ox osile xchiʼuk ti jaʼo te oy ta stiʼ Salon sventa Tsobobbaile, te tal jun jyakubel ti tskʼan ox tsmaj jun mol ta tsobobbaile. ¿Kʼusi la spas li ermanoe? Ta slekil yoʼonton nopaj batel ta stojolal li jyakubele, rasonaj xchiʼuk, vaʼun bat yakʼ komel ta sna. ¿Kʼu yuʼun ti jech la spase? Yuʼun sjeloj xa ox ti kʼu yelan li snopbene. Xuʼ xkaltik ti pas ta jun achʼ krixchano ti oy smalael yuʼun xchiʼuk ti bikʼit yakʼoj sbae. Ti vaʼ yelan la sjel li xkuxlejale laj yichʼ-o ichʼel ta mukʼ li Jeovae.

10. ¿Kʼusi skʼan xal ti ta jeltik li kʼusi oy ta yut koʼontontik xchiʼuk ta jnopbentike?

¹⁰ ¿Mi jaʼ van skʼan xal ti xuʼ xjel jkuxlejaltik ta jun noʼox kʼakʼale? Moʼoj. Xuʼ van skʼan xkakʼtik persa jayibuk jabil yoʼ jechuk xkʼot ta pasele (2 Ped. 1:5). Maʼuk me tskoltautik mi oy xa jayibuk jabil kocheltik ta mantale. Yuʼun skʼan xkakʼtik persa sjelel li kʼusi oy ta yut koʼontontik xchiʼuk ta jnopbentike. ¿Kʼusi van xuʼ skoltautik? Jkʼeltik batel jaytosuk kʼusi xuʼ jpastik.

¿KʼUXI XUʼ JELTIK LI KUSI TA JNOPTIKE?

11. Li orasione, ¿kʼuxi tskoltautik ta sjelel li kʼusi ta jnoptike?

¹¹ Li kʼusi baʼyel xuʼ skoltautike jaʼ li orasione. Jechuk jkʼanbetik Jeova li kʼusi laj yal li jtsʼibajom yuʼun salmo liʼe: «Dios kuʼun, sakubtasbun koʼonton xchiʼuk achʼubuk li kʼusi oy ta koʼonton sventa skoltaun yoʼ tukʼuk xkakʼ jbae» (Sal. 51:10, TNM). Skʼan me teuk ta joltik ti persa skʼan x-achʼub li kʼusi ta jnoptike xchiʼuk ti jkʼanbetik koltael li Jeovae. ¿Mi xuʼ jpat koʼontontik ti tskoltautik li Jeovae? Xuʼ. Kʼalal jaʼo kuxi li Esekiele, li Jeovae xi laj yalbe ta jamal li j-israeletik ti pimik ta mantale: «Ta jelbe yoʼntonic; ta xcacʼbe achʼ stalelic [...]; ta xcacʼbe lec cʼun yoʼntonic» (Ezeq. 11:19). Tspat tajek koʼontontik li kʼusi laj yal Jeovae, yuʼun oy ta yoʼonton tskolta li j-israeletik yoʼ sjel li stalelalike. Jaʼ me jech li avi eke, yuʼun oy ta yoʼonton tskoltautik ek.

12, 13. 1) Jech kʼuchaʼal chal li Salmo 119:59, ¿kʼusi skʼan jnopbetik skʼoplal? 2) ¿Kʼusitik skʼan jakʼbe jbatik?

¹² Li xchaʼtosal kʼusi tsots skʼoplal skʼan jpastike jaʼ ti jnopbetik skʼoplal li kʼusi ta jchantike. Skʼan me jchantik sil kʼakʼal li Skʼop Diose xchiʼuk ti jchʼakbetik yorail sventa jnopbetik skʼoplal mi skʼan jel jnopbentik xchiʼuk li kʼusi oy ta koʼontontike (kʼelo Salmo 119:59; Evr. 4:12; Sant. 1:25). Jkʼeltik mi jaʼ jech ta jnoptik kʼuchaʼal li spʼijil krixchanoetike. Teuk ta joltik ti oy onoʼox kʼusitik vokol chkaʼitik stsalele xchiʼuk ti skʼan xkakʼtik persa yiktaele.

¹³ Xuʼ xi jakʼbe jbatike: «¿Mi oy kʼusi xpichʼet-o koʼonton yuʼun o mi jnaʼ xi-itʼixaj jutuk?» (1 Ped. 2:1). «¿Mi xitoyet chkaʼi jba ta skoj li kʼusi echʼem ta jkuxlejale, ti chanunajemun leke o ta skoj li kʼusi x-ayan kuʼune?» (Prov. 16:5). «¿Mi mas pekʼel skʼoplal chkil li buchʼutik mas jutuk kʼusi x-ayan yuʼunike o ti yan-o slumalike?» (Sant. 2:2-4). «¿Mi chpichʼaj-o koʼonton yuʼun li kʼusitik oy ta balumile?» (1 Juan 2:15-17). «¿Mi ta jkʼupin li chʼayob oʼontonaletik ti chakʼ ta ilel mulivajel xchiʼuk majbaile?» (Sal. 97:10; 101:3; Amós 5:15). Li sjakʼobiltak taje jaʼ tsvinajes ti bu skʼan xijelutike. Ta me jmuyubtabetik yoʼonton Jeova mi ta jiptik lokʼel li kʼusitik muʼyuk lek ti yakʼoj «tsots yibeltake» (Sal. 19:14).

14. ¿Kʼu yuʼun toj tsots skʼoplal ti jtʼujtik lek li kamigotaktike?

¹⁴ Li yoxtosal kʼusi xuʼ skoltautike jaʼ ti jtʼujtik lek li kamigotaktike. Yuʼun li buchʼu ta jchiʼintike xuʼ xjel yuʼun jtalelaltik akʼo mi mu xkakʼtik lek venta (Prov. 13:20). Toj ep krixchanoetik ta jchiʼintik li ta kabteltik o ta chanun ti muʼyuk bu tskoltautik sventa jechuk jnopbentik kʼuchaʼal li Jeovae. Pe li ta tsobajeletike xuʼ jtatik lekil amigoiletik ti tstij «koʼontontik sventa jkʼan jbatik xchiʼuk ti jpastik li kʼusitik toj leke» (Evr. 10:24, 25).