• ¿Mi lek chil Dios skotol li kʼinetike?
    ¡Kʼupino akuxlejal ta sbatel osil! Li Vivliae xuʼ skoltaot ta stael

    • Kʼelik Efesios 5:10 xchiʼuk albeik skʼoplal li sjakʼobiltak liʼe:

      • ¿Kʼusi skʼan jtsaktik ta venta mi ta jtikʼ jbatik ta spasel kʼin o mi muʼyuk?

      • ¿Kʼusitik kʼinal tspasik ti bu nakalote?

      • ¿Mi lek van chil xanaʼ li Jeovae?

      Kalbetik skʼoplal liʼe, ¿mi lek van chil xanaʼ Jeova li kumpleanyoe? Li Vivliae muʼyuk chal mi oy la spas skumpleanyo junuk yajtunel Dios, jaʼ noʼox chalbe skʼoplal chaʼvoʼ krixchanoetik ti la spas skumpleanyoik ti muʼyuk chtunik ta stojolal Diose. Kʼelik Jenesis 40:20-22 xchiʼuk Mateo 14:6-10. Mi laje, albeik skʼoplal li sjakʼobiltak liʼe:

      • ¿Kʼusi kʼot ta pasel ta skumpleanyoik li chaʼvoʼ krixchanoetik la jkʼeltik ta tekstoe?

      • Vaʼun chaʼa, ¿kʼu yelan chil Jeova li kumpleanyoe?

      Pe xuʼ van xi to chajakʼbe abae: «¿Mi ta melel chopol chil Jeova ti jpas jkumpleanyoe o ti xibat ta junuk kʼin ti chal Vivlia ti muʼyuk leke?». Kʼelik Eksodo 32:1-8. Mi laje, kʼelik li VIDEOE xchiʼuk albeik skʼoplal li sjakʼobiltak liʼe:

      VIDEO: Kʼinetik ti muʼyuk lek chil li Diose (5:07)

      • ¿Kʼu yuʼun skʼan jkʼeltik lek ti lekuk xil Jeova li kʼusi ta jpastike?

      • ¿Kʼuxi xuʼ jpastik taje?

      ¿Kʼuxi xuʼ jnaʼtik mi lek chil Dios junuk kʼin?

      • ¿Mi chal Vivlia ti muʼyuk leke? Sventa xanaʼe, sabo skʼoplal kʼuxi lik talel.

      • ¿Mi tstoybe skʼoplal krixchanoetik, organisasionetik o kʼusitik sventa xichʼik-o ta mukʼ li jlumaltike? Muʼyuk kʼusi yan chkichʼtik ta mukʼ, jaʼ noʼox Jeova xchiʼuk jpatoj koʼontontik ti jaʼ tslajesbe skʼoplal li jvokoltike.

      • ¿Mi chal Vivlia ti chopol li kʼusitik tspasik tey une? Teuk ta joltik ti muʼyuk ta jpastik li kʼusi chopole.

  • Muyubajuk avuʼun Jeova li kʼusi chachʼay-o avoʼontone
    ¡Kʼupino akuxlejal ta sbatel osil! Li Vivliae xuʼ skoltaot ta stael
    • Xchanobil 53. Jun nupultsʼakal xchiʼuk stsebik yakal chkʼuxik palomita kʼalal jaʼo tskʼelik televisione.

      XCHANOBIL 53

      Muyubajuk avuʼun Jeova li kʼusi chachʼay-o avoʼontone

      Li Jeovae jaʼ ‹li Dios ti xmuyubaj› noʼoxe (1 Timoteo 1:11). Jaʼ yuʼun, tskʼan ti xijmuyubajuk noʼox eke xchiʼuk ti jkʼupin li jkuxlejaltike. Lek tajek chil ti jkuxtik jutuke xchiʼuk ti jchʼakbetik yorail sventa jchʼay koʼontontike. Li ta xchanobil liʼe, ta jkʼeltik kʼuxi xuʼ jkʼupintik lek kʼalal ta jchʼay koʼontontike xchiʼuk kʼalal ta jkuxtike xchiʼuk ti lekuk xil li Jeovae.

      1. ¿Kʼusi skʼan jtsaktik ta venta kʼalal ta jtʼuj kʼusi ta jchʼay-o koʼontontike?

      ¿Kʼusi chakʼupin spasel sventa chachʼay-o avoʼonton o chakuxe? Junantike te noʼox chkom skʼel slivro ta snaik, chaʼi smusikaik, tskʼel spelikulaik o ch˗ochik ta Internet. Yantik xtoke lek chaʼiik chlokʼik batel ta xanbal xchiʼuk yamigoik, chbatik ta nux o chtajinik. Kʼusiuk noʼox ti lek chkaʼitik spasele, tsots skʼoplal ti jaʼuk jpastik «li kʼusi lek chil Kajvaltike» (Efesios 5:10). Jech xtok, tsots skʼoplal ti jtʼujtik lek li kʼusi ta jchʼay-o koʼontontike, yuʼun jutuk mu skotoluk li kʼusi chchʼay-o yoʼonton li krixchanoetike muʼyuk lek chil li Jeovae, jech kʼuchaʼal li majbaile, li mulivajele o li espiritismoe (kʼelo Salmo 11:5). ¿Kʼusi tskoltautik sventa jtʼujtik lek li kʼusi ta jchʼay-o koʼontontike?

      Jaʼ ti jtʼuj lek li kamigotaktike. Mi skʼanojik Jeova li kamigotaktike, jaʼ tskoltautik sventa jtʼujtik lek li kʼusi ta jchʼay-o koʼontontike. Jech kʼuchaʼal la jchantik li ta xchanobil 48, mi jaʼ ta jchiʼintik li buchʼutik pʼijike, chijpʼijub ek, yan mi jaʼ ta jchiʼintik li buchʼutik muʼyuk chchʼunbeik smantal li Jeovae, ‹muʼyuk kʼusi lek chkʼot ta jtojolaltik› (Proverbios 13:20).

      2. ¿Kʼu yuʼun skʼan oyuk noʼox spʼisol ti kʼu sjalil ta jchʼay koʼontontike?

      Akʼo mi lekik li kʼusi ta jchʼay-o koʼontontike, skʼan me xkichʼ jpʼijiltik xtok ti mu jaʼuk xbat ta koʼontontike, yuʼun mi muʼyuk la jkʼel jbatike, mu xa xakʼ yorail kuʼuntik sventa jpastik li kʼusitik mas tsotsik skʼoplale. Li Vivliae chal ti ‹skʼan jtunestik lek li jujun kʼakʼal chjelave› (kʼelo Efesios 5:15, 16).

      JCHANTIK TO BATEL MAS

      Jkʼeltik batel kʼusi xuʼ xapas sventa xatojobuk stʼujel li kʼusi chachʼay˗o avoʼontone.

      3. Mu xachʼay˗o avoʼonton li kʼusi xuʼ sokes atalelale

      ¿Kʼu yuʼun skʼan jtʼujtik lek li kʼusi ta jchʼay˗o koʼontontike? Kʼelik li VIDEOE xchiʼuk albeik skʼoplal li sjakʼobiltak liʼe:

      VIDEO: ¿Kʼusi xuʼ jchʼay-o koʼonton? (4:39)

      • ¿Kʼuxi xkoʼolaj li tajimoletik oy avi xchiʼuk li tsalbail tspasik ta voʼneal Romae?

      • Jech kʼuchaʼal laj kiltik ta videoe, ¿kʼusi laj yaʼibe smelolal Danny ta sventa li chʼayob oʼontonale?

      Kʼelik Romanos 12:9 xchiʼuk albeik skʼoplal li sjakʼobil liʼe:

      • Li teksto liʼe, ¿kʼuxi tskoltautik sventa xijtojobuk stʼujel li kʼusi ta jchʼay˗o koʼontontike?

      ¿Kʼusitik spʼajoj li Jeovae? Kʼelik Proverbios 6:16, 17 xchiʼuk Galatas 5:19-21. Kʼelik ta jujun li tekstoe, mi laje albeik skʼoplal li sjakʼobil liʼe:

      • Li ta tekstoetik la jkʼeltike, ¿kʼusitik mas te chvinaj o chalbeik skʼoplal li ta chʼayob oʼontonaletik oy avie?

      ¿Kʼuxi xuʼ jtʼujtik lek li kʼusi ta jchʼay˗o koʼontontike?

      Nopbo skʼoplal liʼe:

      • ¿Kʼusi chalbe skʼoplal? ¿Mi oy kʼusitik yichʼoj ti chopol chil Jeovae?

      • ¿Kʼusi ora? ¿Mi jaʼ xa tsmakot˗o ta spasel li kʼusitik mas tsotsik skʼoplale?

      • ¿Buchʼutik? ¿Mi jaʼ xa chlik kamigoin li buchʼutik muʼyuk skʼanojik Jeova ta skoj li kʼusi ta jchʼay˗o koʼontone?

      Sventa mu kʼusi chopol xkʼot ta jtojolaltike, skʼan xijnamaj ti bu xibal sbae. Jaʼ jech ta sventa li kʼusi ta jchʼay˗o koʼontontik eke. Skʼan jpʼajtik akʼo mi mu jamaluk xvinaj mi xuʼ xakʼ jvokoltik.

      Jkot karo stiʼil xa be stamoj batel. Jutuk xa mu chpʼaj yalel li ta varankoe.

      4. Tuneso lek li jujun kʼakʼal chjelave

      Kʼelik li VIDEOE xchiʼuk albeik skʼoplal li sjakʼobil liʼe:

      VIDEO: ¿Kʼusi ch˗echʼ˗o kʼakʼal avuʼun? (2:45)

      • Akʼo mi muʼyuk chopol li kʼusitik chchʼay˗o yoʼonton li ermanoe, ¿kʼusi yakal tsnuptan ta skoj ti jaʼ xa batem˗o ta yoʼontone?

      Kʼelik Filipenses 1:10 xchiʼuk albeik skʼoplal li sjakʼobil liʼe:

      • Li tekstoe, ¿kʼuxi tskoltautik sventa jnaʼtik kʼu sjalil ta jchʼakbetik yorail li kʼusitik ta jkʼupintik spasele?

      5. Lekuk li kʼusi chachʼay˗o avoʼontone

      Akʼo mi oy chʼayob oʼontonaletik ti muʼyuk lek chil li Jeovae, pe oy onoʼox ti lek chile xchiʼuk ti xuʼ jkʼupintik spasele. Kʼelik Eklesiastes 8:15 xchiʼuk Filipenses 4:8 xchiʼuk albeik skʼoplal li sjakʼobil liʼe:

      • ¿Kʼusi chʼayob oʼontonal chakʼupin spasel ti lek chil Jeovae?

      Li lokʼoletike: Oy kʼusi lek chchʼay˗o yoʼontonik: 1. Jun kʼox tseb yakal chchikinta smusika kʼalal jaʼo tspas divujoe. 2. Oxvoʼ keremetik yakal chtajinik ta básquet. 3. Chaʼvoʼ keremetik yakal chanavik ta bicicleta. 4. Yakal tspas skarro ta teʼ jun kʼox kerem. 5. Yakal tstij stambor jun vinik. 6. Jmoj chtajinik ta videojuego xchiʼuk skerem li jun totile. 7. Yakal chlokʼtavan jun ants.

      Ep kʼusitik xuʼ jchʼay˗o koʼontontik ti lek chil Jeovae.

      JUNANTIKE XI CHALIKE: «Muʼyuk chopol mi yichʼoj espiritismo, majbail o mulivajel li kʼusi ta jchʼay˗o koʼontontike, jaʼ noʼox venta mi muʼyuk ta jpastike».

      • ¿Kʼusi chaval voʼote?

      ¿KʼUSI LA ACHAN?

      Li Jeovae tskʼan ti jtʼujtik lek li kʼusi ta jchʼay˗o koʼontontike xchiʼuk ti jkʼupintike.

      Svulesobil ta joltik

      • ¿Kʼusi chʼayob oʼontonaletik skʼan jpʼajtik?

      • ¿Kʼu yuʼun skʼan jkʼeltik ti kʼu sjalil ta jchʼay koʼontontike?

      • ¿Mi jaʼ chakʼan chachʼay˗o avoʼonton li kʼusi lek chil Jeovae? ¿Kʼu yuʼun?

      Paso liʼe

      XUʼ TO XAKʼEL LIʼE

      Kʼelavil buchʼu oy ta sba stʼujel li kʼusi ta jchʼay˗o koʼontontike.

      «¿Mi oy slistail yuʼunik kʼusi pelikulail, livroetik o sonetik stakʼ xchikintaik o skʼelik li stestigotak Jeovae?» (Xuʼ te xata ta jw.org)

      Kʼelavil kʼuxi xuʼ xatʼuj lek li kʼusi chachʼay˗o avoʼontone.

      «¿Mi ta jtabetik sbalil li kʼusi ta jchʼay-o koʼontontike?» (Li Jkʼel-osil ta toyole, 15 yuʼun oktuvre ta 2011)

      Akʼo avil venta kʼu yuʼun laj yikta komel junantik chʼayob oʼontonal jun vinik li ta sloʼil: «Muʼyuk xa chopol kʼusi la jnop ta stojolal li yantike».

      «Jelbat˗o xkuxlejalik yuʼun li Vivliae» (Li Jkʼel-osil ta toyole, xchanobil)

      Kʼelavil kʼu yuʼun laj yikta skʼelel jtos chʼayob oʼontonal jun ants ta skoj ti yichʼoj espiritismoe.

      Mu jaʼuk xachʼay˗o avoʼonton li kʼusitik yichʼoj espiritismoe (1:59)