-
¿Kʼusi chal Vivlia ta sventa li chiʼinejbail ta vayele?¡Kʼupino akuxlejal ta sbatel osil! Li Vivliae xuʼ skoltaot ta stael
-
-
XCHANOBIL 41
¿Kʼusi chal Vivlia ta sventa li chiʼinejbail ta vayele?
Epal krixchanoetike kʼexlal sba chaʼiik k’alal chalbeik skʼoplal li chiʼinejbail ta vayele. Akʼo mi jech, li Skʼop Diose jamal chalbe skʼoplal xchiʼuk ta smelolal no’ox. Li kʼusi ta xal ta sventa taje jtunel tajek kuʼuntik. Sta˗o ti jech chkaltike, yuʼun likem talel ta stojolal Jeova li Vivliae. Jaʼ la spasutik xchiʼuk snaʼoj li kʼusi chtun kuʼuntike. Jaʼ chalbutik kʼusi skʼan jpastik sventa xmuyubaj kuʼuntik xchiʼuk sventa jkʼupintik li kuxlejal ta sbatel osile.
1. ¿Kʼu yelan chil Jeova li chiʼinejbail ta vayele?
Jaʼ jun matanal yakʼoj Jeova li chiʼinejbail ta vayele. Yuʼun oy ta yoʼonton ti akʼo skʼupinik li jun ants xchiʼuk jun vinik ti nupunemike. Li chiʼinejbail ta vayele maʼuk noʼox sventa xil˗o yalab xnichʼnabik li nupultsʼakaletike, yuʼun jaʼ sventa xakʼbe sbaik ta ilel ti skʼanoj sbaike xchiʼuk ti xkuxet˗o yoʼontonike. Jaʼ yuʼun, xi chal li Skʼop Diose: «Muyubajan noʼox xchiʼuk li avajnil ta akeremale» (Proverbios 5:18, 19). Li Jeovae oy ta yoʼonton ti mu smukul sati sbaik ta snupunelik li yajtsʼaklomtak Kristoe. Jech oxal, muʼyuk tsloʼla li snup xchiʼilike (kʼelo Ebreos 13:4).
2. ¿Kʼusi smakojbe skʼoplal li mulivajele?
Xi chakʼ ta chanel li Vivliae: «Li jmulivajeletike [...] muʼyuk bu chuʼuninik li Ajvalilal yuʼun Diose» (1 Korintios 6:9, 10). Kʼalal laj yalbeik skʼoplal mulivajel li buchʼutik la stsʼibaik Vivliae, la stunesik jpʼel kʼop ta griego ti jaʼ li porneia. Taje te tsakal skʼoplal 1) li buchʼutik chchiʼin sbaik ta vayel ti muʼyuk nupunemike,a 2) ti chchiʼinik ta vayel xchiʼilik ta vinikal o ta antsile xchiʼuk 3) ti chchiʼinik ta vayel chonbolometike. Kʼalal muʼyuk chijmulivaje, xmuyubaj kuʼuntik li Jeovae xchiʼuk ta jtabetik sbalil (1 Tesalonisenses 4:3).
JCHANTIK TO BATEL MAS
Jkʼeltik batel mas kʼusi xuʼ xapas sventa mu xayal ta mulivajel xchiʼuk ti kʼusitik xuʼ xakʼupin mi muʼyuk chamulivaje.
3. Jatavan lokʼel ta stojolal li mulivajele
Jun tukʼil vinik ta voʼne ti Jose sbie muʼyuk xmulivaj. Kʼelik Jenesis 39:1-12 xchiʼuk albeik skʼoplal li sjakʼobiltak liʼe:
¿Kʼu yuʼun jatav lokʼel li Josee? (Kʼelik li versikulo 9).
¿Mi lek van xanaʼ ti jech la spas li Josee? ¿Kʼu yuʼun ti jech chavale?
Li kerem tsebetike, ¿kʼuxi xuʼ xchanbeik Jose xchiʼuk ti xjatavik ta stojolal li mulivajele? Kʼelik li VIDEOE.
Li Jeovae tskʼan ti jpʼajtik li mulivajele. Kʼelik 1 Korintios 6:18 xchiʼuk albeik skʼoplal li sjakʼobiltak liʼe:
¿Kʼusitik van ti xuʼ xijyal˗o yuʼun ta mulivajele?
¿Kʼuxi xuʼ xajatav lokʼel ta stojolal li mulivajele?
4. Xuʼ me stsal avuʼun li akʼel ta prevae
¿Kʼusitik van ti xuʼ vokol˗o chkaʼitik stsalel li mulivajele? Kʼelik li VIDEOE xchiʼuk albeik skʼoplal li sjakʼobil liʼe:
Li ermano laj kiltik ta videoe, ¿kʼusi la spas kʼalal laj yakʼ venta ti xuʼ smukul sati˗o yajnil li kʼusi tsnop o tspase?
Bakʼintike, li yajtsʼaklomtak Kristoe skʼan xakʼik persa ti lekuk noʼox li kʼusi tsnopike. ¿Kʼusi xuʼ skoltaot venta mu teuk xanopnun˗o ta sventa li mulivajele? Kʼelik Filipenses 4:8 xchiʼuk albeik skʼoplal li sjakʼobiltak liʼe:
¿Kʼusitik skʼan jnopbetik skʼoplal?
¿Mi ta van stsal kuʼuntik akʼel ta preva mi ta jchan Jvivliatik xchiʼuk mi chijtun ta stojolal Jeovae? ¿Kʼu yuʼun ti jech chavale?
5. Ta jtabetik sbalil li smantaltak Jeovae
Li kʼusi chal Jeovae jaʼ sventa jlekilaltik. Jaʼ yuʼun, chalbutik kʼuxi xuʼ jchabi jbatik xchiʼuk kʼusi sbalil ta jtabetik mi muʼyuk xijmulivaje. Kʼelik Proverbios 7:7-27 o kʼelik li VIDEOE xchiʼuk albeik skʼoplal li sjakʼobiltak liʼe:
¿Kʼusi kʼot ta stojolal li kerem ti te bat ti bu toj xibal sbae? (Kʼelik Proverbios 7:8, 9).
Jech kʼuchaʼal chal Proverbios 7:23, 26, chakʼ ep jvokoltik li mulivajele. ¿Kʼusitik van vokoliletik muʼyuk ta jnuptantik mi muʼyuk chijmulivaje?
¿Kʼuxi xuʼ jkʼupin jkuxlejaltik ta sbatel osil mi ta jchabi jbatik ta sventa li mulivajele?
Ta skoj li kʼusi chal Vivliae, oy buchʼutik tsnopik ti muʼyuk kʼanbilik yuʼun Dios li buchʼutik lek chil xchiʼilik ta vinikal o ta antsile. Pe li Jeovae jaʼ jun Dios ti chkʼanvane xchiʼuk oy ta yoʼonton ti jkʼupin jkuxlejaltik ta sbatel osile. Sventa jkʼupintik taje, skʼan jchʼunbetik skotol li smantaltake. Kʼelik 1 Korintios 6:9-11 xchiʼuk albeik skʼoplal li sjakʼobil liʼe:
¿Mi jaʼ noʼox chopol chil Dios kʼalal lek chil sbaik li buchʼutik xchiʼil noʼox sbaik ta vinikal o ta antsile?
Sventa lekuk xilutik li Diose, jkotoltik oy onoʼox kʼusi skʼan jel ta jkuxlejaltik. ¿Mi oy van sbalil mi jech la jpastike? Kʼelik Salmo 19:8, 11 xchiʼuk albeik skʼoplal li sjakʼobiltak liʼe:
¿Mi toj tsotsik ta chʼunel li mantaletik chakʼbutik Jeovae? ¿Kʼu yuʼun ti jech chanope?
Li mantaletik yakʼoj Jeova ta sventa li chiʼinejbail ta vayele ep tajek buchʼu skoltaoj, xuʼ me skoltaot ek.
JUNANTIKE XI CHALIKE: «Muʼyuk chopol mi chchiʼin sbaik ta vayel li chaʼvoʼ krixchanoetike, jaʼ noʼox venta mi skʼanoj sbaike».
¿Kʼu xachi voʼote?
¿KʼUSI LA ACHAN?
Li chiʼinejbail ta vayele jaʼ matanal yakʼoj li Jeovae xchiʼuk tskʼan ti jaʼ akʼo skʼupinik li jun vinik xchiʼuk jun ants ti nupunemike.
Svulesobil ta joltik
¿Kʼusi smakojbe skʼoplal li mulivajele?
¿Kʼusi xuʼ skoltautik sventa mu xijtsʼuj li ta mulivajele?
¿Kʼuxi ta jtabetik sbalil mi ta jchʼunbetik li smantaltak Jeova ta sventa li chiʼinejbail ta vayele?
XUʼ TO XAKʼEL LIʼE
Kʼelavil kʼu yuʼun tskʼan Dios ti xnupunik li jun vinik xchiʼuk jun antse.
Li kʼusi chal Vivlia ta sventa li buchʼutik lek chil xchiʼilik ta vinikal o ta antsile muʼyuk tstij koʼontontik sventa xijpʼajvan. Kʼelavil kʼu yuʼun ti jech chkaltike.
Kʼelavil kʼuxi xuʼ xchabiutik li mantaletik ta Vivlia ta sventa li chiʼinejbail ta vayele.
«¿Mi jaʼ chiʼinejbail ta vayel kʼalal chixtolan skʼunilik ta yeike?» (Xuʼ te xata ta jw.org)
Kʼelavil kʼusi tijbat˗o yoʼonton jun vinik ti lek toʼox chil xchiʼil ta vinikal sventa sjel xkuxlejale. Kʼelbo avil sloʼil xkuxlejal, «Oy jbalil laj yilikun».
«Jelbat˗o xkuxlejalik yuʼun li Vivliae» (Li Jkʼel-osil ta toyole, julio-septiembre ta 2011)
a Li mulivajele te smakojbe skʼoplal kʼalal chixtolanbe sba skʼunilik ta yeike, kʼalal tstunes bu chlokʼ yikʼobalik sventa chmulivajike o kʼalal tspikbe skʼunil yan krixchano sventa stsan li sbekʼtalike xchiʼuk kʼalal chchiʼin sbaik ta vayele.
-
-
¿Kʼusi chal Vivlia ta sventa li buchʼu nupunem xchiʼuk li buchʼu muʼyuke?¡Kʼupino akuxlejal ta sbatel osil! Li Vivliae xuʼ skoltaot ta stael
-
-
XCHANOBIL 42
¿Kʼusi chal Vivlia ta sventa li buchʼu nupunem xchiʼuk li buchʼu muʼyuke?
Ta junantik lumetike, chalik ti jaʼ to la xijmuyubaj mi lijnupunutike. Pe mu skotolikuk xmuyubajik li buchʼutik nupunemike xchiʼuk mu skotolikuk chat yoʼontonik li buchʼutik muʼyuk nupunemike. Li Vivliae chal kʼusi sbalil tstabeik li buchʼutik nupunemike xchiʼuk li buchʼutik muʼyuke.
1. ¿Kʼusitik sbalil tstabeik li buchʼutik muʼyuk nupunemike?
Xi chal li Vivliae: «Li buchʼu chnupune lek ti jech tspase, pe li buchʼu muʼyuk chnupune mas to lek ti jech tspase» (kʼelo 1 Korintios 7:32, 33, 38). ¿Kʼusi skʼan xal ti «mas to lek» li buchʼu muʼyuk chnupune? Li yajtsʼaklomtak Kristo ti muʼyuk to nupunemike muʼyuk to mas kʼusi tsvul-o yoʼontonik xchiʼuk mas to ep kʼusi spas yuʼunik. Junantike xuʼ to mas xtunik ta stojolal Jeova, yuʼun xuʼ xbat xcholik mantal ta yan lumetik. Pe li kʼusi mas to leke, jaʼ ti oy yorail yuʼunik sventa masuk to xnopajik ta stojolal li Jeovae.
2. ¿Kʼusitik sbalil tstabeik li buchʼutik nupunemike?
Oy sbalil tstabeik ek li buchʼutik nupunemike. Li Vivliae chal ti «mas lek mi chaʼvoʼike, jaʼ mu sta mi jun noʼoxe» (Eklesiastes 4:9). Mas to me jech chil ta xkuxlejalik li nupultsʼakaletik ti chakʼ ta xkuxlejalik li beiltaseletik ta Vivliae. Li buchʼutik nupunemike chalbe sbaik ta jamal ti skʼanoj sbaike, ti chichʼ sbaik ta mukʼe xchiʼuk ti chkʼuxubin sbaike. Jaʼ yuʼun, mas jun yoʼontonik ti jaʼ mu sta li buchʼutik muʼyuk nupunemik ta registro civile. Jech xtok, mas jun yoʼonton chchʼi talel li yalab xnichʼnabike.
3. ¿Kʼu yelan chil Jeova li nupunele?
Kʼalal laj yakʼ nupunuk Adan xchiʼuk Eva li Jeovae, xi laj yale: «Ta xikta komel stot xchiʼuk smeʼ li vinike, jaʼ xa chchiʼin-o ta naklej li yajnile» (Jenesis 2:24). Li Jeovae oy ta yoʼonton ti skʼan sbaik xchiʼuk ti mu xchʼak sbaik li nupultsʼakaletike. Jaʼ noʼox xuʼ xtuchʼ snupunelik ta registro civil mi oy buchʼu mulivaj yuʼunike. Kʼalal jech chkʼot ta pasele, li Jeovae jaʼ chakʼbe snop stuk li jun malalil o ajnilal mi chtuchʼ snupunel li buchʼu muʼyuk smule (Mateo 19:9).a Li Jeovae muʼyuk lek chil li buchʼu oy jayvoʼ yajnil o smalale (1 Timoteo 3:2).
JCHANTIK TO BATEL MAS
Jkʼeltik batel kʼuxi xuʼ xamuyubaj xchiʼuk kʼuxi xuʼ xmuyubaj avuʼun Jeova akʼo mi nupunemot o mi muʼyuk.
4. Ep kʼusi xuʼ xapas ti muʼyuk to nupunemote
Jaʼ jun matanal laj yil Jesus ti muʼyuk nupune (Mateo 19:11, 12). Kʼelik Mateo 4:23 xchiʼuk albeik skʼoplal li sjakʼobil liʼe:
¿Kʼusitik la spas Jesus sventa xtun ta stojolal Stot xchiʼuk ti skolta li yantike?
Li yajtsʼaklomtak Kristo ti muʼyuk nupunemike xuʼ xmuyubajik mi jech tstunes xkuxlejalik kʼuchaʼal li Jesuse. Kʼelik li VIDEOE xchiʼuk albeik skʼoplal li sjakʼobil liʼe:
¿Kʼusitik mas xuʼ spasik li buchʼutik muʼyuk nupunemike?
¿Mi chakʼan to chachan mas?
Li Vivliae muʼyuk ta xal jayib jabilaltik skʼan xijnupun. Pe chal ti jaʼ mas lek ti jaʼ to xnupun li jun kerem o jun tseb kʼalal «echʼem xa li xnichimal skerem stsebale». Taje jaʼo kʼalal echʼem xa ox li yorail kʼalal tskʼan tajek chchiʼinvanik ta vayele, yuʼun mi muʼyuk to echʼeme, xuʼ muʼyuk lek kʼusi chkʼot ta nopel yuʼunik (1 Korintios 7:36).
5. Tʼujo lek anup achiʼil
Jtos ti kʼusi mas tsots skʼoplal skʼan jnoptike, jaʼ ti buchʼu chijnupun jchiʼuktike. Kʼelik Mateo 19:4-6, 9 xchiʼuk albeik skʼoplal li sjakʼobil liʼe:
¿K’u yuʼun skʼan xchotan sba lek ta snopel jun yajtsʼaklom Kristo mi tskʼan xa chnupune?
Li Vivliae jaʼ tskoltaot sventa xanaʼ k’u yelan stalelal skʼan li jun malalil o ajnilale. Pe li kʼusi mas tsots skʼoplale, jaʼ ti skʼanojuk Jeovae.b Kʼelik 1 Korintios 7:39 xchiʼuk 2 Korintios 6:14. Mi laje, albeik skʼoplal li sjakʼobiltak liʼe:
Mi la snop chnupun li jun yajtsʼaklom Kristoe, ¿kʼu yuʼun skʼan koʼol kʼusi xchʼunojik xchiʼuk li buchʼu chkʼot ta snup xchiʼile?
Mi jaʼ lijnupun xchiʼuk li buchʼu muʼyuk skʼanoj Jeovae, ¿kʼu van yelan chaʼi sba kuʼuntik li Jeovae?
Mi chichʼ akʼbel skʼatlom teʼik chaʼkot chonbolom ti jelel stsʼunobale, chil svokolik. Jaʼ jech chil svokol ek li jun yajtsʼaklom Kristo mi jaʼ chikʼ li buchʼu muʼyuk skʼanoj Jeovae.
6. Tsotsuk skʼoplal xavil li nupunele
Li j˗israeletik ta voʼnee ta jsetʼ juteb noʼox tsutes˗o li yajnilike. Kʼelik Malakias 2:13, 14, 16 xchiʼuk albeik skʼoplal li sjakʼobil liʼe:
¿K’u yuʼun chopol chil Jeova li buchʼu tsutes-o snup xchiʼil ti muʼyuk jech chal Vivliae?
Li buchʼu chmulivaje xchiʼuk ti chtuchʼ snupunele chakʼbe svokol li snup xchiʼile xchiʼuk li yalab xnichʼnabe.
Kʼelik li VIDEOE xchiʼuk albeik skʼoplal li sjakʼobil liʼe:
Mi muʼyuk skʼanoj Jeova li buchʼu nupunemot xchiʼuke, ¿kʼusi xuʼ xapas sventa xamuyubaj noʼoxe?
7. Chʼunbo smantal Jeova ta sventa li nupunele
Junantike xuʼ van vokol chaʼiik ta xchʼunbel smantal Jeova ta sventa li nupunele.c Pe chakʼbe bendision li buchʼu chakʼ persa xchʼunele. Kʼelik li VIDEOE.
Kʼelik Ebreos 13:4 xchiʼuk albeik skʼoplal li sjakʼobiltak liʼe:
¿Mi vokol ta chʼunel li mantaletik yakʼoj Jeova ta sventa li nupunele? ¿Kʼu yuʼun ti jech chavale?
Li Jeovae tskʼan ti spasbeik lek svunal ta registro civil li buchʼu chnupunike xchiʼuk li buchʼutik chtuchʼ snupunelike, yuʼun jutuk mu skotoluk li ajvaliletike jaʼ jech tskʼanik. Kʼelik Tito 3:1 xchiʼuk albeik skʼoplal li sjakʼobil liʼe:
Mi nupunemote, ¿mi oy lek svunal ta registro civil?
JUNANTIKE XI TSJAKʼIKE: «¿Mi persa ti xinupunkutik xchiʼuk ti oyuk lek svunale?».
¿Kʼusi van chatakʼ li voʼote?
¿KʼUSI LA ACHAN?
Oy sbalil kʼalal nupunemutik xchiʼuk kʼalal muʼyuke. Mi ta jchʼunbetik smantal Diose, xuʼ me xijmuyubaj akʼo mi nupunemutik o mi muʼyuk.
Svulesobil ta joltik
¿Kʼusitik to mas xuʼ spasik li buchʼutik muʼyuk to nupunemike?
¿Kʼu yuʼun chal Vivlia ti jaʼ noʼox xuʼ xijnupun xchiʼuk li buchʼu koʼol kʼusi jchʼunojtike?
¿Kʼusi srasonal chal Vivlia ti xuʼ jtuchʼ jnupuneltike?
XUʼ TO XAKʼEL LIʼE
¿Kʼusi skʼan xal ti jaʼ noʼox chijnupun ta sventa Kajvaltike?
«Li kʼusitik tsjakʼ jkʼelvunetike» (Li Jkʼel-osil ta toyole, 1 yuʼun julio ta 2004)
Sventa lek kʼusi xkʼot ta nopel avuʼune, kʼelavil li chib video ti chalbe skʼoplal nupunel xchiʼuk k’alal oy buchʼu chkojtikintike.
Kʼelavil ti mas to lek kʼusi akʼbat yuʼun Jeova li ermano ti jaʼ mu sta li kʼusi laj yiktae.
Mi snopoj chtuchʼ snupunel jun yajtsʼaklom Kristo o ti chchʼak sba xchiʼuk xchiʼile, ¿kʼusi skʼan stsak ta venta?
«Kichʼtik ta mukʼ li ‹kʼusi spasoj ta jun li Diose›» (Li Jkʼel-osil ta toyole, disiembre ta 2018)
a Li ta nota 4 te chatabe mas yaʼyejal ta sventa li buchʼutik chchʼak sbaike (k’alal muʼyuk buchʼu chmulivaje).
b Ta junantik lumetike, jaʼ tsnopik li totil meʼiletik buchʼu tskʼan chakʼbeik yikʼ li skerem o li stsebike. Mi jaʼ jeche, li totil meʼiletike skʼan me skʼelik mi skʼanojik Jeova li kerem o li tsebe, ti maʼuk skʼelik mi jkʼulej o ti lek ojtikinbile.
c Mi muʼyuk nupunemot xchiʼuk li buchʼu achiʼuk ta nakleje, voʼot chanop atuk mi chanupunik o mi chavikta abaik.
-