8 Xchanobil

Jun kuxlejal ta utsʼ alalil ti ta slekubtasbe yoʼonton ti Diose

¿Kʼusi yavil li malalil ta utsʼ alalile? (1)

¿Kʼuxi skʼan xkʼuxubin yajnil li malalile? (2)

¿Kʼusi sbainoj li totile? (3)

¿Kʼusi yabtel ta utsʼ alalil li ajnilale? (4)

¿Kʼusi chkʼanbatik yuʼun Dios li totil-meʼiletik xchiʼuk li alab nichʼnabiletike?(5)

¿Kʼusi chal li Vivlia ta sventa li chʼakbail xchiʼuk li spasel svunal li iktaelbail ta nupunele? (6, 7)

1. Li Vivliae chal ti malalile jaʼ li jolil ta yutsʼ yalale (1 Corintios 11:3). Li vinike skʼan jun noʼox yajnil, xchiʼuk li snupunele skʼan tsʼibabil ta svunal smantal ajvaliletik (1 Timoteo 3:2; Tito 3:1).

2. Li malalile skʼan jech ta skʼan li yajnil jech kʼuchaʼal ta skʼan sba stuke. Skʼan jech ta xkʼuxubin jech kʼuchaʼal Jesus ta xkʼuxubin li stsʼaklomtake (Efesios 5:25, 28, 29). Mi jsetʼuk stakʼ smaj mi jaʼuk chakʼbe svokol. Moʼoj, skʼan ta xichʼ ta mukʼ xchiʼuk ta stsak ta mukʼ (Colosenses 3:19; 1 Pedro 3:7).

3. Sventa ta xakʼbe li kʼusitik chtun yuʼun li yutsʼ yalal li totile, skʼan tsots ch-abtej. Skʼan chakʼbe sveʼel, skʼuʼ spokʼ xchiʼuk sna bu chnaki yajnil xchiʼuk xnichʼnabtak. Jech xtok, skʼan chchanubtas ta smantaltak Dios li yutsʼ yalale (1 Timoteo 5:8). Skʼan jaʼ jbabe ta skoltael li yutsʼ yalal ta xchanel ta sventa Dios xchiʼuk ta sventa li kʼusitik tskʼan tspas ti Diose (Deuteronomio 6:4-9; Efesios 6:4).

4. Li ajnilale skʼan jaʼ lekil jkoltavanej yuʼun smalal (Génesis 2:18). Skʼan akʼo skolta smalal ta xchanubtasel ta mantal li yalab xnichʼnabike (Proverbios 1:8). Jeova tskʼan ti akʼo xkʼuxubin yutsʼ yalal li ajnilale (Proverbios 31:10, 15, 26, 27; Tito 2:4, 5). Li antse skʼan chlokʼ ta yoʼonton li ichʼel ta mukʼ chakʼbe smalale (Efesios 5:22, 23, 33).

5. Dios tskʼan ti akʼo xchʼunbeik smantal stot smeʼik li alab nichʼnabiletike (Efesios 6:1-3). Stuke tskʼan ti akʼo xchanubtasik xchiʼuk stukʼibtasik yalab xnichʼnabik li totil-meʼiletike. Li totil-meʼiletike skʼan xchʼak skʼakʼalik sventa chchiʼin li yalab xnichʼnabik sventa chchanik li Vivliae, sventa chalbeik smantal Dios xchiʼuk xchabibeik li kʼusi oy ta yoʼontonike (Deuteronomio 11:18, 19; Proverbios 22:6, 15). Mu jaʼuk ta tsatsal majel mi jaʼuk ta tsatsal tsitsel ta stukʼibtas yalab xnichʼnabik (Colosenses 3:21).

6. Kʼalal li malalil xchiʼuk li ajnilal mu xichʼ sbaik ta mukʼe, jaʼ lek ti akʼo yakʼbeik yipal ta yakʼel ta xkuxlejalik li mantaletik chal li Vivliae. Li Vivliae chi yalulanbutik ti akʼo jkʼan jbatik xchiʼuk ti akʼo jpas jbatik ta pertone (Colosenses 3:12-14). Li sKʼop Diose muʼyuk ta xal ti akʼo xchʼak sbaik sventa chchapan skʼopik ti mi muʼyuk tsots skʼoplale. Pe xuʼ van ta snop ta xchʼak sba ta smalal li ajnilal ti mi 1) liʼe mu skʼan chakʼbe li kʼusitik chtun yuʼun li yutsʼ yalale, 2) mi toj j-echʼem xmajvan xchiʼuk ti mi oy ta xiʼel xkuxlejal li antse 3) mi ta j-echʼel chkontrainvan ti mu xakʼ akʼo smuyubta ti Jeovae (1 Corintios 7:12, 13).

7. Li malalil xchiʼuk li ajnilale mu stakʼ sloʼla sbaik. Mi oy buchʼu ta sloʼla xchiʼil ta nupunele, ta spas smul ta skontra Dios xchiʼuk ta skontra xchiʼil ta nupunel (Hebreos 13:4). Li Vivliae chal ti jaʼ noʼox la xuʼ spasik svunal iktaelbail ta nupunel xchiʼuk xuʼ ta xnupunik yan velta mi oy buchʼu la slutsʼ sbaik xchiʼuk yan ti maʼuk xchiʼil ta nupunele (Mateo 19:6-9; Romanos 7:2, 3). Jeova tspʼaj ti buchʼu chikta snupunel xchiʼuk ti xnupun xchiʼuk yan krixchano mi muʼyuk loʼlabil yuʼun xchiʼil ta nupunele (Malaquías 2:14-16).

[Lokʼol ta pajina 16, 17]

Dios ta skʼan ti akʼo xchanubtasik xchiʼuk stukʼibtasik yalab xnichʼnabik li totil-meʼiletike

[Lokʼol ta pajina 17]

Li jkʼanvanej totile chakʼbe li yutsʼ yalal li kʼusitik chtun yuʼune xchiʼuk chchanubtas ta smantaltak Dios