¿Mi oy srason David ti spatoj yoʼonton ti tstsakat ta venta yuʼun li Diose? Li voʼote, ¿mi oyot van ta yoʼonton li Diose? Ta skoj ti skotol xuʼ yuʼun li Diose oy buchʼutik toj vokol chaʼiik xchʼunel ti oyutik ta yoʼontone. ¿Kʼu yuʼun?

Jun srasonale jaʼ ti jaʼ jun kuxlejal ti mu xa noʼox albajuk smukʼulal li Diose. Yuʼun «li stuque xcoʼlaj xchiʼuc jtsʼuj ta voʼ chil li jujun banamile; xcoʼlaj xchiʼuc jbej ta sat pucuc yalal chil» (Isaías 40:15). Jun jtsʼibajom ti mu xchʼun mi oy Diose, xi chale: «Mukʼ xa tajek chkaʼi jbatik ti mi la jnoptik ti oy jun Dios ti oy ta yoʼonton li kʼusi ta jpastike».

Jlom krixchanoetik xtoke tsnopik ti muʼyuk lek ch-ilatik yuʼun Dios ta skoj ti kʼusitik spasojike. Jun skʼelobile jaʼ ta sventa jun vinik ti Jim sbie, xi laj yale: «Nopajtik noʼox ta jkʼanbe Dios yoʼ skoltaun ta spajtsanel ti toj echʼ noʼox xi-iline, pe mu jaluk chjelav ti chlik kapuk jol xtoke. Ta tsʼakale la jnop ti solel toj chopolune xchiʼuk ti mu xuʼ skoltaun li Diose».

¿Mi toj nom van oy li Dios ti muʼyuk chakʼ ta venta ti liʼ oyutike? ¿Kʼu yelan chil li krixchanoetik ti muʼyuk stukʼilike? Jaʼ noʼox Dios xuʼ xkoltavan ta stakʼel li sjakʼobiltak taje. Li ta Skʼop ti yakʼoj ta naʼele, li Vivliae, chalbutik ta jamal ti mu nomuk oy ta jtojolaltike xchiʼuk oyutik ta yoʼonton. Xi chal li Vivliae: «Li Diose mu nomuc oy ta jtojoltic jujunutic» (Hechos 17:27). Li ta chanib mantal chtale ta jchantik kʼu yelan chilutik li Diose xchiʼuk ti kʼutik yelan yakʼoj ta ilel ti oyutik ta yoʼonton ta jujuntale.

KʼU YUʼUN MU XCHʼUNIK LEK LI YANTIKE: Li achʼtik toe laj yichʼ chanbel skʼoplal ti xuʼ van oy sien mil miyon planetaetik li ta galaxia ti bu oyutike. Ta skoj ti toj echʼ noʼox mukʼ li vinajelbalumile, ep buchʼutik xi tsjakʼbe sbaike: «Li Jpasvanej ti skotol xuʼ yuʼune, ¿kʼu yuʼun tskʼel talel li kʼusitik ta jpastik ti solel bikʼitutik xijvinaj liʼ ta Balumile?».

LI KʼUSI CHAL LI SKʼOP DIOSE: Li Jeovae maʼuk noʼox ti laj yakʼbutik li Vivliae, vaʼun la xchʼayutik ta sjol. Moʼoj, yuʼun li stuke xi chalbutik ta melele: «Scotol cʼacʼal te oy o jsat ta atojol» (Salmo 32:8).

Jnoptik ta sventa li Agare, jun ants ti likem ta Egipto ti kuxi ta siglo 20 kʼalal maʼuk toʼox jkʼakʼaliltike. Li Agare oy jun velta ti muʼyuk laj yichʼ ta mukʼ li smeʼ ajval ti Sarai sbie. Jaʼ yuʼun li Saraie la stak batel li Agare, vaʼun jatav batel ta takixokol balumil. ¿Mi muʼyuk xa van lek ilat yuʼun Dios li Agar ta skoj ti chopol kʼusi la spase? Xi chal li Vivliae: «Li Agare te itaat yuʼun yajʼalmantal Mucʼul Dios». Li anjel taje la spatbe yoʼonton Agar kʼalal xi laj yalbe: «Li Mucʼul Diose laj yaʼay ti oy ep avocole». Vaʼun li Agare xi laj yal ta stojolal li Jeovae: «Jaʼ Dios ti chiyilune» (Génesis 16:4-13).

Li Diose chilot ek. ¿Kʼuxi taje? Kalbetik junuk skʼelobil yoʼ xkaʼitike. Li jun meʼile ta slekil yoʼonton chchabi lek li yuni alabtake, pe jaʼ mas chchabi li uni kʼoxik to tajeke, yuʼun jaʼ mas kʼunik xchiʼuk tskʼanik chabiel. Jaʼ jech li Jeova eke, mas chchabiutik kʼalal kʼunutike xchiʼuk kʼalal ta jnuptantik vokolile. Xi chal li Jeovae: «Vuʼun te nacalun ta toyol, ta chʼul vinajel, xchiʼuc te oyun ta stojol noxtoc li bochʼotic biqʼuit chacʼ sbaique, xchiʼuc li bochʼotic abul sba chaʼyique; te ta xcacʼbeic lec stsatsal yoʼntonic, ta jmuqʼuibtasbe yoʼntonic» (Isaías 57:15).

Akʼo mi jech, xuʼ van xi chajakʼbe abae: «¿Kʼu yelan chilun li Diose? ¿Mi jaʼ noʼox van tskʼel li jpat xokone o mi ta van skʼel xtok li kʼusi oy ta koʼontone? ¿Mi snaʼ van lek kʼu kelan?».

KʼU YUʼUN MU XCHʼUNIK LEK LI YANTIKE: Ep buchʼutik xchʼunojik ti jaʼ noʼox jpasmuliletik ch-ilatik yuʼun li Diose, ti mu la staik-o ti lek ch-ilatike. Li Kendra ti ip ta at-oʼontone oy smul laj yaʼi sba ta skoj ti mu xchʼun yuʼun skotol li smantaltak Diose. Xi chvul ta sjole: «Jaʼ yuʼun laj kikta jba ta spasel orasion».

LI KʼUSI CHAL LI SKʼOP DIOSE: Li Jeovae maʼuk noʼox tskʼel li jpaltailtike yuʼun snaʼoj lek kʼu kelantik. Li Vivlia xi chale: «Yuʼun snaʼoj ti cʼu xʼelan pasbilutique; snaʼ ti lum achʼelutic noʼoxe». Jech xtok, «mu sta jech ch-ilin ta jtojoltic jech chac cʼu chaʼal yepal li jmultique», yuʼun chakʼ ta ilel xkʼuxul yoʼonton ta jtojolaltik mi la jsutes koʼontontike (Salmo 103:10, 14).

Jnoptik ta sventa li ajvalil David ti laj kalbetik skʼoplal ta slikebal mantale. Li stuke xi laj yalbe Dios ta orasione: «Aviloj cʼu xʼelan ilic nabuc tal li jbecʼtale; [...] tsacal ta vun avuʼun scotol [...]. Qʼuelun lec avil cʼu xiʼelan, Dios cuʼun; otquino lec li cʼusi oy ta coʼntone» (Salmo 139:16, 23). Akʼo mi la saʼ smul li Davide —li jlome toj tsots la spas—, pe xchʼunoj lek ti chakʼ venta Jeova ti sutesoj xa yoʼontone.

Xuʼ xachʼun ta melel ti stuk noʼox snaʼ kʼu kelantik li Jeovae. Li Vivliae xi chale: «Li cristianoetique jaʼ noʼox tsqʼuel ti bu lec chilique, pero li vuʼune jaʼ ta jqʼuelbe cʼu xʼelan yut yoʼnton» (1 Samuel 16:7). Li Diose snaʼoj kʼu yuʼun ti jelelutik xchiʼuk li yantike, jaʼ ta skoj ti kʼu yelan kichʼojtik tsʼitesele, ti bu lijchʼie, li jtalelaltike xchiʼuk li kʼusi la jkuchinbetik li jtot jmeʼtike. Li Diose chakʼ venta xchiʼuk oy sbalil chil kʼalal chavakʼ persa slekubtasel li akuxlejale akʼo mi oy kʼusi muʼyuk lek chbat avuʼun ta pasel.

Pe, ¿kʼuxi tspat avoʼonton Dios ta skoj ti snaʼoj lek kʼu avelane?

KʼU YUʼUN MU XCHʼUNIK LEK LI YANTIKE: Akʼo mi chtun yuʼunik koltael li jlom krixchanoetike, pe mi tskʼanbeik koltael Dios yoʼ stsal yuʼunik li svokolike tsnopik ti jaʼ noʼox tsaʼ li kʼusitik tskʼan stukike. Oy jun ants ti Raquel sbie, xi chale: «Kʼalal ta jnop ti solel ep krixchanoetik liʼ ta Balumile xchiʼuk li tsatsal vokoliletik tsnuptanike solel bikʼit chkom li jvokoltake, ta skoj taje muʼyuk xa ta jkʼanbe koltael Dios».

LI KʼUSI CHAL LI SKʼOP DIOSE: Li Diose oy xa kʼusi tsots skʼoplal spasoj yoʼ tskolta xchiʼuk tspatbe yoʼonton li krixchanoetike. Skotol krixchanoetik ti liʼ nakalik ta Balumile xkuchojik li mulile, jech oxal mu xchʼunbe yuʼunik skotol li smantaltak Diose. Akʼo mi jech, li Diose la «stac tal li Xnichʼone; jaʼ milbil matanal icʼot ta sventa jmultic» (1 Juan 4:10). Ta skoj ti laj yakʼ ta matanal xkuxlejal li Jesuse, li Diose chakʼ ti jtatik perton yuʼun li jmultike, ti sakuk li jol koʼontontike xchiʼuk xuʼ jtatik spatobil koʼontontik sventa xijkuxi sbatel osil ta jun achʼ balumil ti bu chʼabal vokolile.a Li matanal laj yakʼ Jesuse, ¿mi jaʼ noʼox van chakʼ ta ilel ti oy ta yoʼonton skotol krixchanoetik li Diose o mi chakʼ ta ilel ti oyutik ta yoʼonton ta jujuntale?

Jnoptik ta sventa li jtakbol Pabloe. Li stuke laj yakʼ ta ilel ti solel ep sbalil laj yil li matanal laj yakʼ Jesús kʼalal xi la stsʼibae: «Li Xnichʼon Diose, jaʼ li Bochʼo ep la scʼanune, ti laj yacʼ sba ta milel ta jcoje» (Gálatas 2:20). Melel onoʼox ti baʼyel cham Jesús kʼalal skʼan toʼox xkʼot ta jchʼunolajel li Pabloe, akʼo mi jech, li Pabloe laj yil kʼuchaʼal jun matanal ta stojolal Dios ti laj yakʼ xkuxlejal Jesús ta stojolale.

Li xkuxlejal laj yakʼ Jesuse jaʼ jun matanal laj yakʼ Dios ta atojolal ek. Taje jaʼ svinajeb ti toj ep abalil chil li Diose. Li matanal taje xuʼ chakʼbutik «spatubil coʼntontic sventa sbatel [osil], xchiʼuc [...] laj yacʼ ti jech jun coʼntontic ta jmalatic ti cʼusi yalojbutique», vaʼun ‹jech j-echʼel jun koʼontontik ta jpastik-o, chkaltik-o li kʼusitik leke› (2 Tesalonicenses 2:16, 17).

Akʼo mi jelavem xa chaʼmil jabil ti laj yakʼ xkuxlejal kʼuchaʼal matanal li Jesuse, ¿kʼuxi xuʼ jnaʼtik ti oyutik-o ta yoʼonton Dios li avie?

KʼU YUʼUN MU XCHʼUNIK LEK LI YANTIKE: Ep ti buchʼutik xchʼunojik Diose nom chaʼi sbaik ta stojolal. Li Christina ti likem ta Irlanda ti chkʼotilan jujun xemana ta chʼulnae, xi chale: «Jnaʼoj ti jaʼ spasoj skotol kʼusitik oy li Diose, pe mu xkojtikin jsetʼuk. Mi junuk velta ti nopol laj kaʼi jba ta stojolale».

LI KʼUSI CHAL LI SKʼOP DIOSE: Akʼo mi nom chkaʼi jbatik ta stojolal li Diose, pe li stuke muʼyuk chchʼayutik ta sjol. Li Jesuse la stunes jun lokʼolkʼop sventa chal kʼu yelan chchabiutik li Diose: «Me oy jun vinic chcʼot ta voʼvinic (100) ta cot xchije, pero me chchʼay jcotuque, ¿me mu teuc ta scomtsan li balunlajuneb yoʼvinic (99) ta cote, yuʼun jaʼ chbat stʼun tal li jcot ichʼaye?». ¿Kʼusi chakʼ jchantik taje? Xi laj yalbe smelolal li Jesuse: «Li Jtotic te oy ta vinajele, mu scʼan me chchʼay junuc li ololetic liʼi» (Mateo 18:12-14).

Ta jujuntal «li ololetic» taje toj ep sbalil chil li Diose. ¿Kʼuxi ti ‹chbat stʼun tal li buchʼutik chʼayemike›? Jech kʼuchaʼal chal li teksto ta slikebale, li Jeovae chikʼ tal ta stojolal li krixchanoetike.

Li Diose chikʼ talel ta stojolal li lekil krixchanoetike. Li ta baʼyel sigloe la stak batel jun yajtsʼaklom Cristo ti Felipe sbi yoʼ xbat sta ta be jun j-abtel ta Etiopía sventa chchapbe smelolal li kʼusi yakal tskʼele (Hechos 8:26-39). Ta mas tsʼakale, li Diose la sbeiltas batel jtakbol Pedro sventa chbat svulaʼan ta sna jun bankilal yuʼun jtsob soltaro ti Cornelio sbie, yuʼun tspasilan orasion xchiʼuk yakʼoj persa chtun ta stojolal Dios (Hechos 10:1-48). Jech xtok, li Diose la sbeiltas batel jtakbol Pablo xchiʼuk xchiʼiltak ta jun ukʼum ti te xkom ta spat xokon lum Filipose, te la staik jun ants ti «lec yichʼoj ta mucʼ Dios» ti Lidia sbie xchiʼuk «ijambat yoʼnton yuʼun Cajvaltic, jech scotol yoʼnton laj yaʼay» (Hechos 16:9-15).

Li kʼusitik kʼot ta pasel ta stojolal li krixchanoetik taje, oy kʼusi la spas Jeova sventa xuʼ x-ojtikinat. ¿Buchʼutik ti chcholbeik mantal krixchanoetik ta snaik xchiʼuk ta kayeetik li avie? Jaʼ li stestigotak Jeovae. Pe xi xajakʼbe abae: «¿Mi jaʼ van ta stunes Dios sventa xuʼ xinopaj ta stojolal?». Kʼanbo koltael Dios sventa xanopaj ta stojolal.a