Oy van aviloj chcholik mantal ta naetik, ta kaye, tspukik vunetik lokʼem ta Vivlia xchiʼuk chakʼik matanal chanubtasel. Xuʼ van jaʼ yakʼojbot junuk stestigo Jeova li revista te atsakoje. Pe jech kʼuchaʼal la sjakʼbe sbaik li krixchanoetik ti laj kalbetik tal skʼoplale, yikʼaluk van oy jech ajakʼojbe aba ek.

Mi oy kʼusi chakʼan chanaʼ ta sventa li stestigotak Jeovae, ¿kʼusi xuʼ xapas? ¿Kʼuxi xuʼ xanaʼ ta sventa li kʼusi xchʼunojike, ti bu tstaik takʼin ta sventa li abtelal tspasik o kʼalal tsvaʼanik li bu ta stsob sbaike xchiʼuk kʼu yuʼun chbat yalik mantal ta ana o ti chchiʼinot ta loʼil ta bee?

Li Cecilie, ti laj xa kalbetik tal skʼoplal ta akʼole, xi chale: «Ep tajek la jchanbe skʼoplal ta Internet li stestigotak Jeovae. Laj kaʼi junantik loʼiletik xchiʼuk epal nopbil kʼopetik ta stojolalik, ta skoj taje chopol kʼusi lik jnop ta stojolalik». Pe kʼalal la xchiʼin ta loʼil li stestigotak Jeovae, laj yaʼibe lek smelolal li kʼusi toʼox snopoj ta stojolalike.

Mi chakʼan chanaʼ mas ta sventa li stestigotak Jeovae, ¿kʼu yuʼun mu xachiʼin ta loʼil? Jaʼik li buchʼutik tstsʼibaik li revista liʼe xchiʼuk ta sjunul yoʼontonik tstakʼik li kʼusi chakʼan chanaʼ ta stojolalike; muʼyuk chloʼlavanik (Proverbios 14:15). Li ta yan mantaletik chtale, xuʼ van skoltaot ta snaʼel buchʼu jaʼ li stestigotak Jeovae, kʼusi xchʼunojik xchiʼuk kʼusitik tspasik.

Jaʼunkutik jun organisasion ti jventainoj jba jtukutike, ta jeltos lumetik likemunkutik xchiʼuk muʼyuk jmoj jolkutik xchiʼuk yan relijionetik. Li smeʼ nail abtelal kuʼunkutike te oy ta Estados Unidos. Akʼo mi jech, li yan kermanotakutike ta jeltos lumetik bu nakajtik. Li ta spʼejel Balumile oyunkutik van jutuk mu vaxakibuk miyon xchiʼuk chkakʼkutik chanubtasel ta Vivlia mas ta 230 mukʼtik lumetik. Taje jaʼ jech ta jchʼunkutik li kʼusi laj yal komel Jesukristo liʼe: «Li lekil aʼyejetik ta sventa li Ajvalilal liʼe ta xichʼ cholel ta spʼejel balumil sventa xaʼi skotol li jteklumetike» (Mateo 24:14).

Mu ventauk bu nakalunkutik, ta jchʼunkutik xchiʼuk chkichʼkutik ta mukʼ li smantaltak ajvalil ta jujun lume, pe jaʼ noʼoxe muʼyuk ta jtikʼ jbakutik ta politikaetik. Vaʼun jaʼ jech ta jchʼunkutik li mantal ti xi laj yal komel li Jesuse: «Li voʼoxuke maʼuk te akʼoplalik ta balumil». Jaʼ yuʼun muʼyuk ta jtikʼ jbakutik ta politika xchiʼuk ta paskʼop (Juan 15:19; 17:16). Ta skoj taje ep stestigotak Jeova laj yichʼik tikʼel ta chukel, laj yilik tsatsal vokoliletik xchiʼuk lajik ta milel li ta Xchibal Mukʼta Paskʼop ta spʼejel Balumile. Li pasaro ovispo ti likem ta Alemaniae, laj yal ti jaʼik noʼox li buchʼutik muʼyuk la spasik li kʼusi mu x-akʼbat spas yuʼun sjol yoʼontonik kʼalal jaʼo yorail ch-ajvalilaj ta Alemania li Adolfo Hitlere.

Pe taje maʼuk skʼan xal ti muʼyuk ta jchiʼinkutik ta loʼil li krixchanoetike. Li Jesuse xi laj skʼanbe Dios ta stojolal li yajchankʼoptake: «Maʼuk ta jkʼanbot vokol ti akʼo xalokʼes ta balumile» (Juan 17:15). Jaʼ yuʼun, jech kʼuchaʼal tspasik li jlakʼnatakutike chi-abtejkutik, chibatkutik ta manolajel xchiʼuk chibatkutik ta chanun.

Li stestigounkutik Jeovae jchʼunojkutik ti jaʼ yakʼoj ta naʼel Dios «skotol li Tsʼibetike xchiʼuk toj jtunel» (2 Timoteo 3:16). Ta jtuneskutik li Vivlia sventa xkojtikinkutik-o li Jpasvaneje xchiʼuk chkakʼkutik akʼo sbeiltasunkutik sventa xkuxetuk noʼox koʼontonkutik.

Xi chal li Tsʼibetike: «Xata-o albel amukʼulal, ichʼel ta mukʼ xchiʼuk oy ajuʼel Jeova Dios kuʼunkutik, yuʼun voʼot la apas skotol li kʼusitike, oy skotol xchiʼuk laj yichʼ pasel skotol ta skoj ti jech la skʼan avoʼontone» (Apokalipsis 4:11). Jech oxal jaʼ noʼox stuk chkichʼkutik ta mukʼ li Jeova Diose. Jech xtok, ta skoj ti jaʼunkutik stestigoe chkakʼkutik persa yakʼel ta ojtikinel li sbie (Isaías 43:10-12).

Jaʼunkutik yajtsʼaklom Kristo xchiʼuk jchʼunojkutik ti jaʼ ‹Xnichʼon Dios› li Jesuse,a ti tal ta Balumile xchiʼuk ti jaʼ kʼot ta Mesiase (Juan 1:34, 41; 4:25, 26). Kʼalal cham li Jesuse, laj yichʼ chaʼkuxesel xchiʼuk sut batel ta vinajel (1 Korintios 15:3, 4). Ta mas tsʼakale laj yichʼ biiltasel ta Ajvalil sventa spas mantal li ta Ajvalilal yuʼun Diose (Apokalipsis 11:15). Li Ajvalilal taje yakal xa tspas mantal xchiʼuk jaʼ tskʼatajes yan velta ta paraiso li Balumile (Daniel 2:44). Xi chal li Vivliae: «Li bochʼotic biqʼuit chacʼ sbaique jaʼ chuʼuninic o li yosilalique; jun noʼox yoʼnton te oyic o» (Salmo 37:11, 29).

Li stestigounkutik Jeovae jchʼunojkutik ti xuʼ xkoltaatik-o krixchanoetik li kʼusi chal Vivliae (Isaías 48:17, 18). Jaʼ yuʼun chkakʼkutik persa yakʼel ta jkuxlejalkutik li kʼusitik chale. Jech kʼuchaʼal liʼe, li Vivliae chal ti mu jsokes jbekʼtaltik xchiʼuk jnopbentike, jaʼ yuʼun muʼyuk chisikʼolajkutik xchiʼuk muʼyuk ta jlajeskutik drogaetike (2 Korintios 7:1). Jech xtok, muʼyuk chiyakubkutik, muʼyuk chimulivajkutik xchiʼuk muʼyuk chi-elkʼajkutik, yuʼun li Vivliae chal ti muʼyuk leke (1 Korintios 6:9-11).

Li ta jujun jabile ta sienal noʼox miyon ta jpaskutik imprimir xchiʼuk ta jpukutik Vivliaetik xchiʼuk vunetik ti lokʼemik ta Vivliae. Ta jvaʼankutik Beteletik, oy jlom ti yakal ta abtele xchiʼuk oy kuʼunkutik imprentaetik ta spʼejel Balumil. Lek chapalunkutik ta epal tsobobbailetik xchiʼuk ta jtsob jbakutik ta uni naetik ti lekik ta kʼelel ti Salonetik sventa Tsobobbail sbi kuʼunkutike. ¿Bu ta jtakutik takʼin sventa ta jpaskutik skotol taje?

Skotol li abtelal ta jpaskutike jaʼ ta matanal takʼin (2 Korintios 9:7). Leʼ xa onoʼox tal ta sjabilal 1879, li ta xchibal revista, ti Zion’s Watch Tower toʼox sbie xi laj yale: «[Li revista liʼe jchʼunojkutik ti] jaʼ chkoltaat yuʼun li JEOVAE, yoʼ to jech taje mi jaʼuk tskʼan jutuk limoxna mi jaʼuk tskʼanbe koltael li krixchanoetike». Li kʼusi laj yichʼ alel taje, jech-o chichʼ pasel li avie.

Li matanal takʼine xuʼ tukʼ xichʼ takel batel li ta Beteletike o xuʼ xichʼ akʼel ta Salonetik sventa Tsobobbail ta xkaxail matanal takʼin. Muʼyuk ta jkʼankutik diesmo, muʼyuk ta jtsobkutik takʼin, muʼyuk ta jkʼan jtojolkutik xchiʼuk muʼyuk ta jkʼanbekutik stojol li jvunkutike. Muʼyuk buchʼu tstojunkutik kʼalal ta jcholkutik mantale, kʼalal ta jelubtaskutik mantal ta tsobobbaile xchiʼuk kʼalal ta jkolta jbakutik ta svaʼanel naetik ti bu ta jtsob jbakutike. Yuʼun xi onoʼox laj yal li Jesuse: «Ta moton la-akʼbatik, jaʼ jech ta moton xavakʼik ek» (Mateo 10:8). Li buchʼutik ch-abtejik ta smeʼ nail abtelal kuʼunkutike xchiʼuk li ta Beteletike mi junuk buchʼu chichʼ stojolik, mi jaʼuk li Jtsop Jbeiltasvanej kuʼunkutike.

Li matanal takʼine chichʼ tunesel xtok sventa jkoltakutik-o li kermanotakutik ti chil svokolike. Li yajtsʼaklomtak Kristo ta baʼyel sigloe ta sjunul yoʼonton la skoltaik li buchʼutik laj yil svokolike (Romanos 15:26). Li avi eke ta jkoltakutik li buchʼutik chil svokolik ta nikel, nojelal ta voʼ o yan kʼusitike: ta jchaʼvaʼanbekutik snaik, chkakʼbekutik sveʼelik, skʼuʼ spokik xchiʼuk xpoxilik. Jech xtok li ta lumetik ti bu sokemik kom li Salonetik sventa Tsobobbaile ta jchaʼmeltsankutik.

Ta skoj ti ta jcholkutik mantale xuʼ van jaʼ mas ojtikinbilunkutik-o. Ta jcholkutik mantal ta naetik, ti bu chjelav epal krixchanoetike xchiʼuk ta buyuk noʼox. ¿Kʼu yuʼun ti jech ta jpaskutike?

Li stestigounkutik Jeovae ta jcholkutik mantal sventa jmuyubtakutik-o Dios xchiʼuk sventa xkakʼkutik-o ta ojtikinel li sbie (Evreos 13:15). Jech xtok jaʼ sventa ta jchʼunkutik li mantal laj yakʼ Kristo liʼe: «Batanik, bat pasik ta jchankʼop li krixchanoetik ta skotol jteklumetike, [...] chanubtasik ta xchʼunel skotol li kʼusitik laj kalboxuke» (Mateo 28:19, 20).

Jech xtok, jaʼ ta skoj ti jkʼanojkutik li krixchanoetike (Mateo 22:39). Jnaʼojkutik ti jutuk mu skotoluk li krixchanoetike oy srelijionik xchiʼuk mu skotolikuk oy ta yoʼontonik chchikintaik li mantal ta jcholkutike. Akʼo mi jech, jchʼunojkutik ti xuʼ sta-o skolebalik mi la xchanik li kʼusi melel ta Vivliae. Ta skoj taje jaʼ tstij koʼontonkutik sventa jechuk jpaskutik kʼuchaʼal li baʼyel yajtsʼaklomtak Kristo ti «muʼyuk bu laj yikta sbaik ta chanubtasvanej xchiʼuk ta yalbel skʼoplal li lekil aʼyejetik ta sventa li Kristo Jesuse» (Echos 5:41, 42).

Jutuk mu skotoluk li buchʼutik tskʼelik li jvunkutike maʼuk stestigotak Jeova. Jech xtok ta smiyonal noʼox krixchanoetik chkakʼbekutik chanubtasel ta Vivlia ti yan-o srelijionike xchiʼuk tstojik ta vokol ti chvulaʼanatik yuʼun li stestigotak Jeovae.

Ta melel oy to van kʼusi chakʼan chanaʼ ta jtojolalkutik. Oy ep ta tos kʼuxi xuʼ xavojtikinunkutik mas:

• Jakʼbo junuk stestigo Jeova.

• Ochan ta jpajinakutik ta Internet ta www.jw.org/tzo.

• Batan ta junuk jtsobajelkutik. Muʼyuk me tojbil xchiʼuk buchʼuuk noʼox xuʼ x-och.