Kʼuxi xuʼ xakolta akerem o atseb yoʼ xlekub li skalifikasione

Yileluke, li akerem o atsebe muʼyuk lek chil li chanune xchiʼuk mu skʼan spas li stareae. Li kʼusi chopole yantik xyal li skalifikasione xchiʼuk chchopolib batel li stalelale. ¿Kʼusi xuʼ xapas sventa xakolta li akerem o atseb yoʼ xlekub li skalifikasione?

• Li kʼusi skʼan xanaʼe

• Li kʼusi xuʼ xapase

Li kʼusi skʼan xanaʼe

Mi chasuje, solel tstsatsaj li kʼope. Mi chasuj li avun kerem o tsebe, solel mu junuk yoʼonton chaʼi sba li ta chanob june xchiʼuk li ta anae. Sventa mu toj sujbiluk chaʼi sbae, yikʼaluk van sjutbot kʼop, snakʼ li skalifikasione, tslokʼta batel afirma li ta sboletae o xuʼ van mu xbat ta chanun. Solel ta stsatsaj-o li kʼope.

Yikʼaluk mu lekuk kʼusi chkʼot ta pasel mi chavakʼbe smotone . Xi chal jun totil ti Andrew sbie: «Sventa jtijbekutik yoʼonton li kun tsebkutike, lik kakʼbekutik smoton mi lek skalifikasion la slokʼese, pe ikilkutik ti jaʼ noʼox chakʼbe yipal ta skoj li smotone. Kʼalal muʼyuk lek skalifikasion tslokʼese, solel jaʼ noʼox chat-o yoʼonton ti muʼyuk la sta-o smotone maʼuk ta skoj li muʼyuk lek li skalifikasione».

Muʼyuk me yakal chakolta akerem o atseb mi jaʼ chavakʼbe ta smul li smaestroe. Li achʼamale xuʼ van snop ti mu persauk xakʼbe yipal sventa lekuk kʼusi tstae. Xuʼ van xchan xtok ti jaʼ chakʼbe ta sba yantik li kʼusitik muʼyuk lek kʼusi tspase xchiʼuk ti tsmala akʼo xchapan yantik li kʼusi tsnuptane. Muʼyuk bu chchan ti jaʼ oy ta sba stuk li kʼusitik tspase.

Li kʼusi xuʼ xapase

Pajtsano aba. Mi ilinemote, maʼuk me yorail sventa xachiʼin ta loʼil ta sventa li skalifikasione. Jun totil ti Brett sbie xi chale: «Li voʼon xchiʼuk kajnile kakʼojkutik venta ti jaʼ mas lek kʼusi chkʼot ta pasel kʼalal jun koʼontonkutik xchiʼuk chkaʼibekutik smelolal kʼu yelan chaʼi sbaik li kalab jnichʼnabkutike».

Akʼo venta kʼusi ti vokol chaʼie. Jutuk mu skotoluk velta kʼalal yalel skalifikasion chlokʼ li ololetik jaʼ ta skoj ti chlajik ta ilbajinel ta chanob june, ti chjel xchanob junike, ti chiʼik kʼalal oy eksamene, li kʼopetik ta yutsʼ yalalike, ti mu x-och svayelike, ti muʼyuk chchʼakbeik lek yorail sventa xchanunajike xchiʼuk ti ta kʼusiuk noʼox chchʼay yoʼontonike. Mu xanop ta anil ti toj chʼaj li avun kerem o atsebe.

Sabo lek smelolal sventa xuʼ xchan. Akʼbeik yorail sventa xchanunaj xchiʼuk sventa spas li stareae. Sabeik yavil bu xchanunaj, jaʼ ti bu muʼyuk kʼusi xuʼ xchʼaybat yoʼontone jech kʼuchaʼal television o selular. Chʼakulanbo li stareae sventa mu xchʼay yoʼonton li akerem o stsebe. Jun totil ta Alemania ti Hector sbie xi chale: «Kʼalal nopol xa jun eksamene, ta jchankutik jlikel jujun kʼakʼal, maʼuk ti chkiktakutik skotol ta slajebe».

Chʼiesbo ta yoʼontonik ti skʼan xchanike. Mi yaʼibe smelolal akerem o atseb ti kʼuchaʼal skʼan xchanunajik avi ta jun chanob june, xuʼ van mas xakʼbeik yipal. Jech kʼuchaʼal liʼe, te ta xchan ti xuʼ xkoltaat ta xchapel lek stakʼin mi la xchan matematikae.

Tojobtasel: Koltao li akerem o atseb ta spasel li stareae, pe mu me joʼotuk xapasbe li stareae. Xi chal Andrew: «Jaʼ spatoj yoʼonton ta jchinabkutik li jtsebkutike, vaʼun ta stupʼ li xchinab stuke». Chanubtaso sventa akʼo spas stuk li stareae.