Mukʼta natil tsatsal krixchanoetik ta Balumil

TI CHTALUK ta tojolal jun natil krixchanoe, ti chkʼot kʼalal to ta sjol ana li sjole, ¿kʼusi van cha nop? ¡Ta melel cha val ti jaʼ jun mukʼta natil tsatsal krixchanoe! Ta voʼne, ta skʼakʼalil Noee, oy toʼox ta melel mukʼta natil tsatsal krixchanoetik ta Balumil. Li Vivliae chalbutik ti stotik li krixchanoetik taje, jaʼ anjeletik ta vinajel. Pe ¿kʼuxi van kʼot ta pasel taje?

Vuleso ta ajol, li Satanase jaʼ li chopol anjel ta slikesan kʼope. Yuʼun kʼalal to ta yaj-anjeltak Dios tsokesanbe sjol yoʼonton sventa tspas ta chopol anjeletik. Ta tsʼakal ne, jlom anjeletik lik xchikintabeik li sloʼil Satanase. La jyikta li yabtelik ta vinajel ti akʼbilik yuʼun Diose. Talik ta Balumil xchiʼuk la jyichʼbeik yelanil sbekʼtal krixchanoetik. ¿Mi xa naʼ kʼu yuʼun?

Li Vivliae ta xalbutik ti yuʼun la toj kʼupil sba la jyilik li antsetik ta Balumile xchiʼuk och la ta yoʼontonik ta xchiʼinel ta naklej. Jech oxal talik ta Balumil, nupunik xchiʼuk li antsetike. Li Vivliae ta xal ti kʼusi la spasike toj chopol, yuʼun li anjeletike pasbilik yuʼun Dios sventa chkuxiik ta vinajel.

Kʼalal ayan yun neneʼik li anjeletik xchiʼuk li yajnilike, li neneʼetike jelelik. Ti kʼalal un neneʼik toʼox tajeke, mu xvinaj lek mi jelelik li ta yan neneʼetike. Pe lik chʼiikuk xchiʼuk lik tsatsubikuk ta jyalel, vaʼun ikʼatajik ta mukʼta natil tsatsal krixchanoetik.

Li mukʼta natil tsatsal krixchanoetik liʼe toj chopolik. Ta skoj ti toj echʼ noʼox mukʼtik xchiʼuk ti toj tsotsike, la jyakʼbeik svokol li krixchanoetike. La sujik ta persa li krixchanoetik ti akʼo spas sbaik ta chopol jech kʼuchaʼal li stukike.

Chamem xaʼox ti Enoque, pe tana ne oy jun vinik ta Balumil ti lek yoʼontone. Li vinik taje jaʼ sbi Noé. Li Noee la spasilan li kʼusi tskʼan Dios ti akʼo spase.

Jun kʼakʼal ti Diose la jyalbe Noé ti kʼot xa skʼakʼalil ti chakʼbe slajeb li chopol krixchanoetike. Pe ti Diose kuxul ta xikta Noé xchiʼuk li yutsʼ yalale xchiʼuk epal chonetik. Jkʼeltikik kʼuxi la jyut.