¿Kʼu yuʼun skʼan jchantik li Vivliae?
¿Mi xavojtikin lek li Vivliae? Jaʼ li livro ti bu mas pukbil ta spʼejel Balumile. Skotol li krixchanoetike te staoj spatobil yoʼontonik li ta yaʼyejal yichʼoj tale xchiʼuk staojbeik sbalil li lekil tojobtaseletik chakʼe. Akʼo mi jech, oy ep buchʼutik muʼyuk skʼelojik. Manchuk mi oy srelijionik o mi muʼyuk, oy van ta yoʼontonik chojtikinik mas. Mi jaʼ jech ta atojolale, li foyeto liʼe tskoltaot sventa cha kʼel jutuk li kʼusi chal Vivliae.
YOʼ TO mu xlik akʼel li Vivliae, xuʼ tskoltaot ti xavojtikin jutuk ti kʼuyelan chapale. Li Vivliae, ti ojtikinbil kʼuchaʼal sKʼop Dios xtoke, yichʼoj tal 66 livroetik, ti chlik ta Génesis xchiʼuk chlaj ta Apocalipsis o Revelación.
¿Buchʼu ta stojolal likem tal li kʼusi chal Vivliae? Labal sba li sjakʼobil taje. Te van 40 ta voʼ viniketik la stsʼibaik ti jalij 1,600 jabile. Akʼo mi jech, tsots skʼoplal ta kʼelel ti mu junuk laj yal ti jaʼ snopben stuk li kʼusi la stsʼibae. June xi la stsʼibae: «Scotol li scʼop Dios tsʼibabil comele jaʼ laj yacʼ ta naʼel ta sventa svuʼel stuc li Diose» (2 Timoteo 3:16). Yan jtsʼibajome xi laj yale: «Li espíritu yuʼun Mucʼul Diose icʼopoj ta jventa, ivul ta que ti scʼope» (2 Samuel 23:2). Jech kʼuchaʼal chkiltike, li jtsʼibajometik yuʼun Vivliae laj yalik ti jaʼ ta stojolal Jeova Dios, li Mukʼul Ajvalil ta vinajel-balumil, likem tal li Vivliae. Li Diose laj yakʼbe yil li jtsʼibajometik ti stuke tskʼan akʼo xnopaj ta stojolal li krixchanoetike.
Tsots skʼoplal skʼan jnaʼtik xtok kʼusi jaʼ ti mas chalbe skʼoplal li Vivliae: li sderecho Dios yoʼ tsventain li krixchanoetik ta stojolal li Ajvalilal yuʼun ta vinajele. Mi cha kʼel batel li vun liʼe te chavakʼ venta ti jaʼ li kʼusi snitoj-o sba batel ta sliklejal Vivliae, ta Génesis kʼalal ta Apocalipsis.
Chkalbotkutik ti jaʼ oyuk ta ajol kʼalal yakal cha kʼel batel li aʼyej ti yichʼoj li livro mas tsots skʼoplal ti mu xkoʼolaj-o ta yane.
a Oy ep ta tos kʼuxi ta albel skʼoplal li fechaetike. Li ta foyeto liʼe ta jtunestik batel li kʼop kʼalal maʼuk toʼox jkʼakʼaliltike (kʼ.m.jkʼ.), xchiʼuk li ta jkʼakʼaliltik (t.jkʼ.), xie. Li ta skʼelobil fechaetik ti te oy ta yolon jujun pajinae komkom tsʼibabil cha ta.