Li spukel vun liʼe jaʼ jtos abtelal sventa chanubtasel ta Vivlia ta spʼejel balumil ti ta matanal takʼin chichʼ pasele. Maʼuk sventa chichʼ chonel.

Mi chakʼan chavakʼ matanal takʼine, ochan ta donate.jw.org.

Li tekstoetike te laj yichʼ lokʼesel ta Xchʼul Kʼop Dios sventa Achʼ Balumil. Mi laj yichʼ tunesel yan Vivliae, te chichʼ alel kʼusi sbi.

Impresión de diciembre de 2019

Tzotzil (ll-TZO)

© 2011, 2019 WATCH TOWER BIBLE AND TRACT SOCIETY OF PENNSYLVANIA

Li Diose skʼanojutik kʼuchaʼal jun jkʼanvanej totil (1 Pedro 5:6, 7).

Ta skoj ti jaʼ Jpasvanej kuʼuntik li Diose, kʼotem ta Jtotik. Li jun lekil totile oy ta yoʼonton li xnichʼnabe xchiʼuk chchanubtas sventa lek xbat xkuxlejalik. Li Dios eke oyutik ta yoʼonton. Jech oxal, yakal chchanubtas skotol krixchanoetik sventa snaʼik kʼuxi xuʼ skʼupin lek xkuxlejalik.

Li Diose chakʼ jchantik li kʼusitik melel ti xijmuyubaj yuʼune xchiʼuk ti tspat koʼontontike.

Mi chachikinta li kʼusi chal Diose, tsbeiltasot, chchabiot xchiʼuk tskoltaot.

Jech xtok, chalbutik ti xuʼ xijkuxi sbatel osile.

Xi chalbutik li Diose: «Laʼik ta jtojolal. Chikintaik, vaʼun chakuxiik» (Isaias 55:3).

Li Diose tstunes Vivlia sventa tskʼoponutik (2 Timoteo 3:16).

Li melel Diose la stunes viniketik sventa stsʼibaik ta jlik chʼul livro li kʼusitik tsnope. Li livro taje jaʼ li Vivliae. Yichʼoj tal aʼyejetik ti tsotsik skʼoplale. Li Diose tskʼan ti akʼo jnabetik skʼoplale.

Li Diose snaʼoj kʼusi jaʼ sventa jlekilaltik xchiʼuk jaʼ snioʼal pʼijilal. Mi chachikinta li kʼusi chale, chapʼijub ta melel (Proverbios 1:5).

Li Diose tskʼan ti akʼo skʼelik Vivlia skotol krixchanoetike. Jaʼ yuʼun, oy ta jeltos kʼopetik.

Mi chakʼan chachikinta li kʼusi chal Diose, skʼan xakʼel xchiʼuk xavaʼibe smelolal li kʼusi chal Vivliae.

Ta buyuk noʼox yakal chchikintaik kʼusi chal Dios li krixchanoetike (Mateo 28:19).

Li stestigotak Jeovae xuʼ skoltaikot sventa xavaʼibe smelolal li Vivliae.

Chakʼik ta chanel li kʼusi melel ta sventa Dios ta spʼejel balumile.

Ta moton chchanubtasoxuk. Jech xtok, xuʼ xachanbe mas skʼoplal Dios li ta Salon sventa Tsobobbail yuʼun stestigotak Jeova ti bu nakalote.

Jun noʼox melel Dios oy, Jeova sbi (Salmo 83:18). Li Diose mu xvinaj ta kʼelel. Skʼanojutik xchiʼuk tskʼan ti akʼo jkʼantik eke. Jech xtok, tskʼan ti akʼo jkʼan li jchiʼiltaktike (Mateo 22:35-40). Jaʼ noʼox stuk toj toyol oy, yuʼun jaʼ spasoj skotol li kʼusitik oye.

Li baʼyel spasbene jaʼ jun tsatsal anjel. Avie, ojtikinbil kʼuchaʼal Jesukristo. Li Jeovae la spas yan anjeletik xtok.

Li Jeovae jaʼ la spas skotol li kʼusitik oy ta vinajele... xchiʼuk li kʼusitik oy ta balumile (Apokalipsis 4:11).

Li Jeovae jaʼ la spas li kʼanaletike. Jaʼ la spas xtok li balumile xchiʼuk li kʼusitik oy tee (Jenesis 1:1).

Jaʼ la spas li baʼyel vinik ti Adan sbie, ta lum la spas (Jenesis 2:7).

Li Jeovae ep kʼusitik lek laj yakʼbe li Adan xchiʼuk Evae (Jenesis 1:28).

Li Jeovae jaʼ la spas li baʼyel ants ti Eva sbie, vaʼun jaʼ kʼot ta yajnil li Adane (Jenesis 2:21, 22).

Tukʼ pasatik yuʼun Jeova li Adan xchiʼuk Evae, chʼabal xchopolil li snopbenik xchiʼuk sbekʼtalike.

Te nakiik ta nichimaltik Eden, ta jun kʼupil sba osil ti oy ukʼum tee, teʼetik ti chakʼ sate xchiʼuk chonbolometik.

Chkʼoponatik toʼox yuʼun li Jeovae xchiʼuk oy kʼusitik akʼbat xchanik. Mi tskʼan chkuxiik sbatel osil li ta Paraisoe, skʼan xchikintaik xchiʼuk xchʼunik li kʼusi ch-albatik yuʼun Diose.

Li Diose laj yal ti mu stakʼ lobel sat li jpets teʼe (Jenesis 2:16, 17).

Pe oy jun anjel ti la stoy sba ta stojolal Diose. Li chopol anjel taje jaʼ li Diablo Satanase.

Li Jeovae laj yalbe Adan xchiʼuk Eva ti oy jpets teʼ ta nichimaltik ti mu stakʼ slobeik sate, yuʼun mi la sloʼike, chchamik.

Li Satanase mu skʼan ti xchʼunbeik smantal Jeova li Adan xchiʼuk Evae. Jech oxal, la stunes jkot kiletel chon sventa xalbe Eva ti muʼyuk chchame xchiʼuk ti chkʼot kʼuchaʼal Dios mi la sloʼ li sat teʼe. Pe mu meleluk li kʼusi albate (Jenesis 3:1-5).