-
¿Kʼusi kʼot ta stojolalik ta skoj ti la xchikintabeik li Satanase?Chikintao kʼusi chal Dios sventa chakuxi sbatel osil
-
-
XCHANVOKʼAL
¿Kʼusi kʼot ta stojolalik ta skoj ti la xchikintabeik li Satanase?
Muʼyuk la xchʼunbeik kʼusi laj yal Dios li Adan xchiʼuk Evae, vaʼun chamik (Jenesis 3:6, 23).
Li Evae la xchikinta li kʼusi laj yal kiletel chone xchiʼuk la sloʼ li sat teʼe. Ta tsʼakale, laj yakʼbe li smalale, vaʼun la sloʼ ek.
Chopol li kʼusi la spasike, jaʼ jun mulil. Li Diose la snutsan lokʼel li ta Paraisoe.
Tsots laj yil svokolik xchiʼuk li yalab xnichʼnabike. Malubik xchiʼuk chamik. Muʼyuk batik ta vinajel o ta yan bu jotukal, laj-o skʼoplalik.
Li animaetike chpasik ta pukuk xchiʼuk muʼyuk xa kʼusi xuʼ spasik (Jenesis 3:19).
Ta skoj ti jaʼ snitilulutik li Adan xchiʼuk Evae, chijcham. Li buchʼutik chamemike mu kʼusi xilik, mu kʼusi xaʼiik mi jaʼuk kʼusi xuʼ spasik (Eklesiastes 9:5, 10).
Li Jeovae muʼyuk ta yoʼonton ti xcham li krixchanoetike. Poʼot xa xchaʼkuxes li buchʼutik chamemike. Chkuxiik sbatel osil mi la xchikintaik li kʼusi chal Diose.
-
-
¿Buchʼutik la xchikintabeik Dios kʼalal tal li Nojelal ta voʼe?Chikintao kʼusi chal Dios sventa chakuxi sbatel osil
-
-
SVOʼVOKʼAL
¿Buchʼutik la xchikintabeik Dios kʼalal tal li Nojelal ta voʼe?
Jutuk mu skotoluk li krixchanoetik ta skʼakʼalil Noee chopol kʼusitik tspasik (Jenesis 6:5).
Li Adan xchiʼuk Evae laj yil yalab xnichʼnabik, vaʼun epaj li krixchanoetik ta balumile. Ta mas tsʼakale, lik stoy sbaik jlom anjeletik jech kʼuchaʼal la spas li Satanase.
Li anjeletik taje talik ta balumil xchiʼuk laj yichʼ sbekʼtalik sventa chikʼik antsetik. Li antsetike laj yil yalabik ti mu jechuk kʼuchaʼal li krixchanoetike, yuʼun toj chopolik xchiʼuk toj tsots yipik.
Li balumile noj ta krixchanoetik ti naka chopol kʼusi tspasike. Xi chal li Vivliae: «Epajem li xchoplejal krixchanoetik li ta balumile xchiʼuk ti skotol ora chopol li kʼusi oy ta yoʼontonik xchiʼuk ta snopbenike».
La xchikinta kʼusi laj yal Dios li Noee xchiʼuk la spas jun arka (Jenesis 6:13, 14, 18, 19, 22).
Jaʼ jun lekil vinik echʼ li Noee. Li Jeovae laj yalbe ti chakʼbe slajeb li chopol krixchanoetik ta jun mukʼta nojelal ta voʼe.
Li Diose laj yalbe Noe ti akʼo spas jun arka sventa te stikʼ ochel li yutsʼ yalale xchiʼuk li jujutos chonbolometike.
Li Noee laj yalbe krixchanoetik ti chtal nojelal ta voʼe, pe muʼyuk la xchikintaik. Jlome la stseʼintaik, li yantike la spʼajik.
Kʼalal tsutsem xa ox li arkae, la stikʼ ochel chonbolometik li Noee.
-
-
¿Kʼusi xuʼ jchantik ta sventa li Nojelal ta voʼe?Chikintao kʼusi chal Dios sventa chakuxi sbatel osil
-
-
SVAKVOKʼAL
¿Kʼusi xuʼ jchantik ta sventa li Nojelal ta voʼe?
Li Diose la slajes li chopol krixchanoetike, pe kuxul laj yikta li Noe xchiʼuk yutsʼ yalale (Jenesis 7:11, 12, 23).
Laj yakʼ voʼ 40 kʼakʼal xchiʼuk 40 akʼobal. Mukul kom ta voʼ li balumile. Cham skotol li chopol krixchanoetike.
Li jtoyba anjeletike laj yiktaik komel li sbekʼtalike xchiʼuk pasik ta pukujetik.
Li buchʼutik te oyik ta yut arkae kuxul komik. Akʼo mi cham ta tsʼakal li Noe xchiʼuk yutsʼ yalale, chchaʼkuxesatik yuʼun Dios, vaʼun chkuxiik sbatel osil.
Li Diose tslajes yan velta li buchʼutik chopolike xchiʼuk kuxul chikta li lekil krixchanoetike (Mateo 24:37-39).
Li Satanas xchiʼuk pukujetike yakal-o tsloʼlaik li krixchanoetike.
Jech kʼuchaʼal ta skʼakʼalil Noee, li avie, ep buchʼutik mu skʼanik li lekil beiltasel chakʼ Jeovae. Poʼot xa slajes skotol chopol krixchanoetik li Jeovae (2 Pedro 2:5, 6).
Pe oy jlom krixchanoetik ti jechik kʼuchaʼal li Noee. Chchikintaik xchiʼuk tspasik li kʼusi chal Diose. Taje jaʼik li stestigotak Jeovae.
-