Li Jesuse chcholbe skʼoplal li Ajvalilal yuʼun Diose

¿KʼU YUʼUN tal ta Balumil li Jesuse? Xi laj yal stuke: «Persa [...] chbat jcholbe yaʼyic li Lequil Aʼyej ta sventa ventainel yuʼun Diose. Yuʼun jaʼ ta sventa ti tacbilun tale» (Lucas 4:43). Jkʼeltik chantosuk kʼusitik melel laj yakʼ ta chanel Jesús ta sventa li Ajvalilale, ti jaʼ li kʼusi mas laj yalbe skʼoplale.

1. Jaʼ ch-ajvalilaj li Jesuse. Laj yakʼ sba ta ojtikinel stuk kʼuchaʼal Mesías (Juan 4:25, 26, Ch). Xchiʼuk laj yal xtok ti jaʼ li Ajvalil akʼbat yil yuʼun Dios li j-alkʼop Daniele. Laj yalbe yajtakboltak ti chkʼot skʼakʼalil chchoti ta jun kʼupil sba chotlebale xchiʼuk ti ch-ajvalilajik xchiʼuk eke (Mateo 19:28). Li jtsop ajvaliletik taje juteb chij laj yakʼbe sbi. Jech noxtok laj yalbe skʼoplal yan chijetik ti maʼuk te tsakal skʼoplalik li ta jtsop taje (Lucas 12:32; Juan 10:16).

2. Li ajvalilal yuʼun Diose chichʼ talel melel tukʼilal. Li Jesuse laj yal ti Ajvalilale tstukʼibtas li kʼusi mas chopol pasbile: jaʼ li kʼusi la spas Satanás ta skontra sbi Diose. ¿Kʼuxi chut? Jaʼ ti chchʼultajes o tsakubtasbe sbi Dios ta skotol li kʼusitik spasoj tal Satanás ti lik talel ta Edene (Mateo 6:9, 10). Jech noxtok, li Jesuse laj yakʼ ta ilel ti muʼyuk bu chtʼujvane, yuʼun skotol kʼakʼal la xchanubtas viniketik xchiʼuk antsetik, jkʼulejetik xchiʼuk povreetik. Akʼo mi jaʼ tal xcholbe mantal li j-israeletike, la skolta bu kʼalal xuʼ yuʼun li jsamariaetike xchiʼuk li jyanlum krixchanoetike. Mu xkoʼolaj xchiʼuk li jnitvanejetik ta relijion ta skʼakʼalile, yuʼun chchopol kʼoptaik ti buchʼu mu to xojtikinike xchiʼuk toj ven xtʼujvanik.

3. Li Ajvalilal yuʼun Diose maʼuk ta sventa li balumil liʼe. Li Jesuse jaʼo kuxi kʼalal tsots likem skʼopik li judioetike, yuʼun yan-o balumil sventainoj li slumalike. Akʼo mi jech, muʼyuk la stikʼ sba ta politika (Juan 6:14, 15). Xi laj yalbe jun ajvalile: «Li abtel quichʼoj sventa ajvalilale mu jaʼuc sventa banamil» (Juan 18:36). Xchiʼuk xi laj yalbe li yajtakboltake: «Li voʼoxuque muʼyucoxuc xa ta sventa banamil» (Juan 15:19). Jech noxtok, muʼyuk laj yakʼ akʼo stsak yespadaik, mi jaʼuk sventa tspojik li Jesuse (Mateo 26:51, 52).

4. Ta slekil yoʼonton ch-ajvalilaj li Cristoe. Li Jesuse laj yal ti chyochbe yalal yikats li yajtsʼaklomtake (Mateo 11:28-30). Jaʼ jech la spas. Laj yal jtunel mantaletik sventa at-oʼonton, saʼel kʼulejal, kʼuyelan xkil jbatik xchiʼuk yantik xchiʼuk kʼuxi ta tael muyubajel (Mateo, kapitulo 5 kʼalal ta 7). Jaʼ jun vinik ti lek xkʼanvane xchiʼuk ti xi jnopaj noʼox ta stojolale. Jaʼ yuʼun skotol krixchanoetik, akʼo mi toj abol sbaik, jun yoʼonton chbatik ta stojolal yuʼun snaʼojik ti lek ch-ilatik xchiʼuk ti ch-ichʼatik ta mukʼe. ¿Mi mu jechuk ti ta jkʼantik junuk ajvalil kʼuchaʼal taje?

Li Jesuse ep skʼelobiltak juʼel la spas, jaʼ jech laj yakʼ ta ilel li kʼusi tspas li Ajvalilal yuʼun Diose. ¿Kʼusi kʼot ta pasel ta skoj taje? Jkʼeltik.

(Lokʼem ta slivroal Mateo, Marcos, Lucas xchiʼuk Juan.)

26. chlik xcholbe skʼoplal li Ajvalilal yuʼun Diose

27. 31  t.jkʼ. Tstʼuj lajchaʼvoʼ yajtakboltak li Jesuse xchiʼuk chal li Mantaletik ta Vitse

28. 32 t.jkʼ. Chchaʼkuxes Lázaro li Jesuse

29. 14 yuʼun nisán ta 33 t.jkʼ. Chcham ta jtel teʼ li Jesuse (li yuilal nisane stsakoj jvokʼ marso xchiʼuk jvokʼ avril)

30. 16 yuʼun nisán ta 33 t.jkʼ. Chchaʼkuxi Jesús

31. 6 yuʼun siván ta 33 t.jkʼ. Ta Pentecostés; chakʼ tal xchʼul espiritu li Diose (li yuilal sivane stsakoj jvokʼ mayo xchiʼuk jvokʼ junio)

32. 36 t.jkʼ. Tspas ta yajtsʼaklom Cristo li Cornelioe

33. te van ta 47-48 t.jkʼ. Baʼyel xanbal ta misioneroal yuʼun Pablo

34. te van ta 49-52 t.jkʼ. Xchibal xanbal ta misioneroal yuʼun Pablo

35. te van ta 52-56 t.jkʼ. Yoxibal xanbal ta misioneroal yuʼun Pablo

36. 60 t.jkʼ. Chukul ta Roma li Pabloe, tstsʼibabe batel kartaetik li tsobobbailetike

37. skʼan to 62 t.jkʼ. Santiago li xchaʼitsʼin Jesuse, tstsʼiba skarta

38. 66 t.jkʼ. Tstoy sba ta stojolal Roma li judioetike

39. 70 t.jkʼ. Li jromaetike tsjinesik Jerusalén xchiʼuk li chʼulnae

40. te van ta 96 t.jkʼ. Tstsʼiba slivroal Apocalipsis li Juane

41. te van ta 100 t.jkʼ. Chcham li Juane, li slajeb jtakbole