Li slajel Cristoe

OY XA ta oxib jabil xchiʼuk oʼlol ti yakal chchol mantal li Jesuse xchiʼuk snaʼoj ti jutuk xa skʼan xchame. Li jnitvanejetik ta srelijion judioetike yakal sabeik smelolal kʼuxi tsmilik, pe chiʼik ta skoj ti kʼusi xuʼ spas li krixchanoetike, yuʼun chalik ti jaʼ j-alkʼope. Vaʼun, li Satanase la stijbe yoʼonton Judas —ti jaʼ toʼox jun li ta lajchaʼvoʼ jtakbole— sventa chakʼ ta kʼabal li Jesuse. Li jnitvanejetik ta relijione laj yakʼbeik 30 ta sep sakil takʼin.

Li ta slajeb akʼobal liʼ oy ta Balumil li Jesuse la stsob sba xchiʼuk yajtakboltak sventa tspasik li kʼin Koltaele. Kʼalal yalojbe xaʼox Judas ti akʼo xlokʼ batele, li Cristoe oy kʼusi achʼ laj yakʼbe slikeb: li Veʼlil ta bat kʼakʼal yuʼun Kajvaltike. La stsak jxut pan, la spas orasion xchiʼuk laj yetʼesbe batel li buluchvoʼ yajtakboltake. Vaʼun xi laj yale: «Liʼi jaʼ jbecʼtal, yuʼun ta xcacʼ jba ta milel ta acojic. Jech me xapasilanic, yuʼun jech chanaʼilanicun o». Kʼalal laj xaʼox spas jeche la stsak jun kopa ti noj ta yaʼlel tsʼusube xchiʼuk xi laj yale: «Li yaʼlel tsʼusub liʼi jaʼ li jchʼichʼale, jaʼ sventa li cʼusi achʼ chapanbile» (Lucas 22:19, 20).

Li ta akʼobal taje, toj ep kʼusitik laj yakʼbe xchan li yajtakboltake. Laj yal jun achʼ mantal: ti akʼo skʼan sbaik ta sjunul yoʼontonike. Xi laj yale: «Jaʼuc me jech chacʼanan abaic li voʼoxuque [...] jech ta snaʼic o scotol cristianoetic ti voʼoxuc cajchancʼopoxuque» (Juan 13:34, 35). Laj yal xtok ti akʼo mu xchibaj yoʼontonik ta skoj li kʼusitik jutuk xa skʼan xkʼot ta stojolale, ta tsʼakale tsots la spas orasion ta stojolal li yajtakboltake. Ta slajebe, la skʼejintaik kʼejojetik sventa Dios, vaʼun batik ta nichimaltik Getsemaní.

Te la skejan sba li Jesuse xchiʼuk laj yalbe ta orasion Jeova skotol li kʼusi oy ta yoʼontone. Pe ta jlikel noʼoxe, kʼot jtsop soltaroetik, viniketik ti yichʼoj yabtejebik xchiʼuk paleetik sventa chchukik batel li Jesuse. Sventa tsnaʼik buchʼue, li Judase nopaj batel ta stojolal Jesús xchiʼuk la stsʼutsʼbe xokon sat. Li soltaroetike la xchukik batel li Jesuse, pe li jtakboletike jatavik batel.

Li Jesuse laj yal ta stojolal nail chapanobbail yuʼun judioetik ti jaʼ xNichʼon Diose. Li jchapanvanejetike laj yalik ti jaʼ jun chopol kʼoptael ta stojolal Diose, jun mulil ti xuʼ xichʼ-o milele. Vaʼun laj yikʼik batel ta stojolal Poncio Pilato, jun ajvalil ta Roma. Laj yakʼ venta ti muʼyuk smul li Jesuse, akʼo mi jech jaʼ la spas li kʼusi tskʼan jteklume, ti x-avetik noʼox tskʼanik akʼo xichʼ milele.

Li Jesuse laj yikʼik batel ta jun osil ti Gólgota sbie, li jromail soltaroetike te la sjokʼanik ta jtel teʼ. Ta anil noʼox ikʼub li osile. Li ta bat kʼakʼal taje, kʼalal cham li Jesuse tal tsatsal nikel. La yichʼ mukel ta jun pasbil mukinal ta ton, ta yokʼomale, li paleetike la smakbeik lek li stiʼe xchiʼuk laj yakʼik jchabivanejetik. ¿Mi te van chkom-o? Muʼyuk, yuʼun chkʼot xa ta pasel li skʼelobil juʼelal ti mas tsots skʼoplal ta skotole.

(Lokʼem ta kapitulo 26 xchiʼuk 27 yuʼun Mateo, ta kapitulo 14 xchiʼuk 15 yuʼun Marcos, ta kapitulo 22 xchiʼuk 23 yuʼun Lucas xchiʼuk ta kapitulo 12 kʼalal ta 19 yuʼun Juan.)