Tspas ta mantal epal pukujetik

Kʼalal echʼ xaʼox tal yuʼunik li kʼusi toj xibal sba la snuptanik li jchankʼopetike vulik ta tiʼ nab, pe oy to kʼusi toj xibal sba la snuptanik xtok. Te lokʼ tal chaʼvoʼ xibal sba viniketik ta stsʼel mukinal ti uʼuninbilik yuʼun pukuje, ¡te tal snupik ta be li Jesuse! Jun ti toj echʼ xa noʼox xibal sbae, jaʼ van ta skoj ti toj echʼ xa noʼox simarone xchiʼuk ti jal xa uʼuninbil yuʼun li pukujetike.

Toj abol xa noʼox sba li vinike, yuʼun tʼanal chanav. Ta kʼakʼal-akʼobal «te x-avet ta mukinal xchiʼuk ta vitstik, te tsbojilan sba ta ton» (Markos 5:5). Batsʼi toj echʼ xa noʼox xibal sba, jaʼ yuʼun tsjoy sbeik li krixchanoetik ta skoj ti chiʼik tajeke. Oy buchʼutik spasoj preva chchukbeik yok skʼob ta kadena, pe xchakʼlajet noʼox yuʼun ta tuchʼel xchiʼuk solel chchʼuchʼulta li kadena ti chukbil-o yok skʼobe. Muʼyuk buchʼu stabe yip sventa tspas ta manxo.

Kʼalal nopaj batel ta stojolal Jesus li vinik taje, te kʼot skejan sba ta yok xchiʼuk xi x-avet laj yal li pukujetik ti ochem ta stojolale: «¿Kʼusi chasaʼ liʼ eke Jesus, Xnichʼon Mukʼul Dios? Jamal xaval ta sat Dios ti muʼyuk chavakʼ jvokole». Laj yakʼ ta ilel Jesus ti oy sjuʼel sventa tslokʼes pukuj kʼalal xi la spas ta mantale: «Ibal sba pukuj, lokʼan ta yoʼonton li vinike» (Markos 5:7, 8).

Ta melel, toj ep pukuj ochem ta stojolal li vinik taje. Yuʼun kʼalal «¿kʼusi abi?», x-utat yuʼun li Jesuse, xi la stakʼe: «Lejion, yuʼun epunkutik» (Markos 5:9). Li jun lejion ta Romae ta smilal noʼox soltaroetik smakoj, jech oxal toj echʼem chil svokol yuʼunik li vinik taje, yuʼun toj ep pukuj ochem ta stojolal. La skʼanbeik vokol Jesus «ti akʼo mu xjipatik yalel ta xabe» (Lukas 8:31). Kʼuchaʼal chkiltike, snaʼojik yilel li kʼusi chkʼot ta stojolalik xchiʼuk li bankilal yuʼunik ti jaʼ li Satanase.

Te nopol lamal chveʼ jutuk mu chaʼmiluk chitom. Taje ibal sba ch-albat skʼoplalik li ta Mantale, jaʼ yuʼun maʼuk yuʼun judaetik. Xi laj yal li pukujetike: «Takunkutik batel ta stojolal li chitometike, sventa xi-ochkutik ta yoʼontonik» (Markos 5:12). Albatik yuʼun Jesus ti xuʼ xbatike, vaʼun ochik ta stojolal li epal chitome. Te une ta anil noʼox bat xchaʼmilal chitom ta tayal chʼentik, la sjip sbaik yalel ta nab, vaʼun te jikʼavik.

Kʼalal laj yilik li jchabichitometik ti kʼusi kʼot ta pasele, bat yalik ta anil li ta jteklume xchiʼuk li ta stiʼiltak jteklume. Vaʼun tal skʼelik kʼusi kʼot ta pasel li krixchanoetike. Jaʼ to chilik kʼalal kʼotike, lek xa li vinik ti uʼuninbil toʼox yuʼun pukujetike xchiʼuk talem xa lek xchʼulel. Maʼuk noʼox, ¡yuʼun slapoj xa skʼuʼ spokʼ xchiʼuk te chotol ta yok Jesus!

Batsʼi xiʼik tajek li krixchanoetik kʼalal laj yaʼiik o kʼalal laj yilik li kʼusi naka to kʼot ta pasele, yuʼun mu snaʼik kʼu yuʼun ti jeche. Jaʼ yuʼun laj yalbeik Jesus ti akʼo xlokʼ batel li ta slumalike. Vaʼun kʼalal yakal xa chmuy ta varko li Jesuse, te tijil tal li vinik sventa tskʼanbe vokol Jesus ti xuʼuk xbat xchiʼine. Pe xi laj yalbe vinik li Jesuse: «Batan ta ana yoʼ bu oy li avutsʼ avalale xchiʼuk albo yaʼi skotol li kʼusitik la spas Jeova ta atojolale xchiʼuk ti kʼu yelan la xkʼuxubinote» (Markos 5:19).

Nopem onoʼox xaʼi chal Jesus ti akʼo mu xalik echʼel kʼu yelan chpoxta li krixchanoetike, yuʼun mu skʼan ti jaʼ xakʼ-o xchʼunel yoʼontonik ta skoj li kʼusitik labalik sba chalik tspase. Pe li vinik liʼe laj yaʼi xchiʼuk laj yil ta sat stuk ti kʼu yelan sjuʼel li Jesuse xchiʼuk xuʼ xcholbe mantal li krixchanoetik ti mu sta ta chiʼinel ta loʼil stuk li Jesuse. Jech xtok, kʼalal chcholbe batel skʼoplal ti kʼu yelan poxtaj li vinike jaʼ me chkoltavan mi oy buchʼu chopol kʼusi chal ta skoj ti ep cham chitometike. Vaʼun bat ta sjunul Dekapolis li vinik taje, bat yalbe skʼoplal ti kʼu yelan poxtaat yuʼun li Jesuse.