Li Jeovae tstoyutik likel

Bakʼintike, mu xa jnaʼ kʼusi ta jpastik ta skoj li vokoliletik xchiʼuk li kʼusi ta jvul-o koʼontontik jujun kʼakʼal ti tslubtsanutik xchiʼuk ti muʼyuk xa kipaltik chijkom yuʼune. Kʼalal jech ta jnuptantike, jaʼ chakʼ kipaltik mi ta jnopbetik skʼoplal li kʼusitik akʼbat yil Esekiel ti chchaʼta yav li kʼusitike. ¿Kʼu yuʼun? Yuʼun li albil kʼop liʼe chakʼ ta ilel ti mi oy sjuʼel Dios sventa xchaʼkuxes takin baketike, oy sjuʼel xtok sventa tskoltautik ta stsalel vokoliletik akʼo mi mu xa kʼusi stakʼ pasel ta sat li krixchanoetike (kʼelo Salmo 18:29; Filip. 4:13).

Jvules ta joltik kʼalal epal siglo skʼan toʼox xkuxi li Esekiele, li j-alkʼop Moisese laj yal ti Jeovae oy ta yoʼonton tstunes sjuʼel sventa tskolta li yajtuneltake. Xi la stsʼibae: «Voʼne xa onoʼox ti jaʼ jun nakʼobbail li Diose, li skʼob ti te oy-o sbatel osile ta skoltaot» (Deut. 33:27). Mi ta jkʼanbetik koltael Jeova kʼalal mi tslubtsanutik xa li jvokoltike, xuʼ jpʼel ta koʼontontik ti chakʼbutik ta ilel ti skʼanojutike, ta slekil yoʼonton tstoyutik likel xchiʼuk tskoltautik sventa mu xa xijyal ta lum yan velta (Esek. 37:10).