Li kʼusitik tsjakʼ jkʼelvunetike

Li kʼusi chal Eklesiastes 5:8, ¿mi jaʼ skʼoplal li ajvaliletike o mi jaʼ li Jeovae?

Li Eklesiastes 5:8 oy kʼusi chakʼ jnoptik, xi chale: «Mu toj labaluk sba xavil mi laj avakʼ venta ti chichʼ ilbajinel li buchʼu povree xchiʼuk ti muʼyuk xa chichʼ pasel li kʼusi leke xchiʼuk li kʼusi tukʼ ta alumale. Yuʼun li bankilal j-abtel ti jech tspas taje kʼelbil yuʼun li buchʼu mas to tsots yabtele, pe oy to yantik ti mas to tsots yabtelik kʼuchaʼal li stukike».

Ta sat krixchanoetike, li versikulo liʼe chal kʼu yelan stalelal li yaj-abteltak ajvalile. Pe maʼuk noʼox, yuʼun oy kʼusi chakʼ jchantik ta stojolal Jeova ti tspat koʼontontike.

Li Eklesiastes 5:8 chalbe skʼoplal jun ajvalil ti chilbajin li buchʼutik povreike xchiʼuk ti muʼyuk stukʼil yoʼonton ta stojolalike. Skʼan svules ta sjol jechuk ti chkʼelat yuʼun li buchʼu mas to tsots yabtele. Yuʼun xuʼ onoʼox van oy buchʼu ti mas tsots yabtel kʼuchaʼal li stuke. Pe xuʼ van muʼyuk lek tspas yabtelik skotol li ajvaliletike, vaʼun jaʼ xa chil svokol li yan krixchanoetike.

Akʼo mi oy kʼusi tsots yakal ta jnuptantik, tspat koʼontontik ti te sat Jeova ta stojolal li j-abteletik yuʼun ajvalile. Xuʼ xkalbetik Jeova ti akʼo skoltautike xchiʼuk ti xkakʼbetik sbain li kikatstike (Sal. 55:22; Filip. 4:6, 7). Jnaʼojtik lek liʼe: «Li sat Jeovae skʼeloj sjunul li balumile, yuʼun tskʼan chakʼbe ta ilel stsatsal sventa skolta li buchʼu ta sjunul yoʼonton tukʼ chakʼ sba ta stojolale» (2 Kron. 16:9).

Jaʼ yuʼun, li Eklesiastes 5:8 jamal chakʼ kiltik liʼe: jaʼ ti oy to buchʼu mas tsots yabtel yuʼunik li ajvaliletik liʼ ta balumile. Li kʼusi mas tsots skʼoplal chakʼ kiltike jaʼ ti jaʼ noʼox stuk Jeova mas tsots yabtel ta sjunul vinajel balumile. Li avie, yakal tspas mantal, yuʼun stsakoj xa yabtel ta Ajvalil li Xnichʼone, li Jesukristoe. Li Jeova ti skotol xuʼ yuʼune yiloj skotol li kʼusi chkʼot ta pasele xchiʼuk lek tukʼ li kʼusi tspase, jaʼ jech stalelal ek li Xnichʼone.