Kʼalal lik ajvalilajuk ta Israel li Salomone, xi albat yuʼun li Jeovae: «¿Kʼusi chakʼan ti akʼo xkakʼbote?». Vaʼun, xi la stakʼ li Salomone: «Akʼbun jpʼijil, yuʼun jech xuʼ kuʼun spasel lek li avabtele, yuʼun toj keremun to». Xi la stakʼ li Jeovae: «Ta xkakʼbot li kʼusi la akʼanbune. Ta xkakʼbot lek apʼijil. Muʼyuk buchʼu yan jech staoj spʼijil. Maʼuk noʼox, yuʼun chkakʼbot li kʼusi muʼyuk la akʼanbune, ta xkakʼbot ep akʼulejal. Xchiʼuk mi chachʼun skotol li jmantale, ep jabiletik chakuxi».

Vaʼun, li Salomone lik svaʼan li temploe. La stunes oro, plata, teʼ xchiʼuk tonetik, jaʼ la stunesan li kʼusitik mas lekike. Ta smilal xa noʼox viniketik xchiʼuk antsetik abtejik ta svaʼanel li temploe, vaʼun tsuts yuʼunik ta vukub jabil. Ta tsʼakale, laj yakʼbeik ta skʼob Jeova li temploe xchiʼuk laj yakʼik matanaletik li ta skajleb matanale. Li Salomone te la skejan sba li ta yeloval skajleb matanale, vaʼun xi laj yalbe li Jeovae. «Kajval Jeova, mas mukʼ xchiʼuk mas kʼupil sba jechuk li atemploe. Pe avokoluk, aʼibun li jkʼopkutike xchiʼuk chʼamo li ichʼel ta mukʼ chkakʼbotkutike». ¿Mi la skʼupin Jeova li templo la svaʼan Salomone? Xchiʼuk, ¿mi aʼibat xanaʼ li s-orasione? Kʼalal laj xa ox yoʼonton spasel orasion li Salomone, yal tal kʼokʼ ta vinajel xchiʼuk kʼakʼ li matanale. Jaʼ jech laj yakʼ ta ilel Jeova ti lek laj yil li templo la svaʼan li Salomone. Kʼalal laj yilik li j-israeletik taje, solel xkuxet tajek yoʼontonik.

Ta skoj ti toj pʼij li ajvalil Salomone, laj yichʼ ojtikinel ta sjunul Israel xchiʼuk li ta namal lumetike. Jaʼ yuʼun, li krixchanoetike chbat skʼanbeik koltael li Salomon sventa xchapanbat li skʼopike. Jun velta li meʼ ajvalil ta Sebae bat skʼel li Salomon sventa skʼel mi xtakʼ yuʼun li kʼusitik tsjakʼbee. Kʼalal laj yaʼi kʼuxi la stakʼ li Salomone, xi laj yale: «Jaʼ melel li kʼusi laj kaʼi ta jlumal ti ep kʼusitik apasoje xchiʼuk ti toj pʼijote. Pe mu toʼox jchʼun li kʼusi laj kaʼie, jaʼ to ti tal jkʼel ta jsat jtuke. Laj yakʼbot bendision li Adios Jeovae». Lek toʼox xkuxlejalik li ta Israele xchiʼuk xmuyubajik toʼox. Pe chjel skotol maʼ taje.

Ti kʼu sjalil laj yichʼ ta mukʼ Jeova li Salomone xmuyubajik noʼox li krixchanoetik ta Israele. Pe ta tsʼakale, li Salomone laj yikʼ epal antsetik ti yan slumalike xchiʼuk ti chichʼik ta mukʼ jecheʼ diosetike. Jaʼ yuʼun, ta kʼunkʼun lik namajuk ta stojolal Jeova li Salomone xchiʼuk lik yichʼ ta mukʼ li jecheʼ diosetik eke. Li Jeovae ilin tajek ta stojolal li Salomone, jaʼ yuʼun xi laj yalbee: «Ta jpojbot li avabtel ta ajvalilale xchiʼuk ta jchʼak ta chib. Jaʼ ta xkakʼbe sventain lajuneb nitilulal junuk amoso, jaʼ noʼox chib nitilulal ta xkakʼbe sventain li avutsʼ avalale».

Li Jeovae oy kʼusi la spas sventa xaʼibeik smelolal krixchanoetik li kʼusi laj yale. Jun veltae, li yajtunel Salomon ti Jeroboan sbie lokʼ batel ta xanbal, vaʼun la sta sbaik xchiʼuk li j-alkʼop Aiyae. Li j-alkʼope la slokʼ li skʼuʼ slapoj batel ta sbae, vaʼun la sjat ta 12 ta lik. Ta tsʼakale, xi laj yalbe li Jeroboane: «Ichʼo lajunlikuk, yuʼun xi chalbot li Jeova Diose: ‹Ta jtuchʼbe yabtel ta ajvalilal li Salomone xchiʼuk ta jchʼak ta chib li ajvalilale, voʼot chkakʼbot aventain lajunchop nitilulal›». Kʼalal laj yaʼi Salomon li kʼusi laj yal Aiyae, ilin tajek ta stojolal li Jeroboane xchiʼuk la snop tsmil. Jaʼ yuʼun, jatav batel ta Ejipto li Jeroboane. Ta mas tsʼakale, cham li Salomone, vaʼun jaʼ och ta ajvalil li xnichʼone ti jaʼ li Reoboame. Kʼalal laj yaʼi li Jeroboane, sut batel li ta Israele, yuʼun la snop ti muʼyuk xa xibal sbae.

Vaʼun, li Reoboame xi albat yuʼun li moletike: «Mi lek chakolta li jchiʼiltaktike xchiʼuk mi chapasbe li kʼusi tskʼanike, chchʼunik li amantale». Pe xi albat yuʼun yamigotak Reoboam ti keremik toe: «Skʼan tsots xapas ta mantal li j-israeletike xchiʼuk sujo yoʼ ep x-abtejik». Li Reoboame la xchʼun li kʼusi albat yuʼun yamigotake, jaʼ yuʼun toj chopol kʼusitik lik spas. Ta skoj taje, li krixchanoetike lik stoy sbaik ta stojolal xchiʼuk jaʼ xa lik stʼujik ta ajvalil li Jeroboane. Li ajvalilal taje lik sventain lajunchop nitilulal, ajvalilal ta Israel laj yichʼ ojtikinel. Yan li Reoboame jaʼ lik sventain li chaʼchop nitilulale, ajvalilal ta Juda laj yichʼ ojtikinel xchiʼuk tukʼ laj yakʼ sbaik ta stojolal. Taje jaʼ jech la svokʼ sbaik li 12 ta chop nitilulal ta Israele.

Li Jeroboane mu skʼan ti akʼo te xbat yichʼik ta mukʼ Jeova ta Jerusalen li j-israeletike. ¿Mi xanaʼ kʼu yuʼun? Yuʼun chiʼ mi jaʼ xa xchʼunbeik smantal li Reoboame. Jaʼ yuʼun, la spas chaʼkot chʼiom tot vakax ta oro xchiʼuk xi laj yalbe li krixchanoetike: «Toj nom to li Jerusalene, jaʼ lek liʼ noʼox xavichʼik ta mukʼ li chʼiom tot vakaxetike». Li krixchanoetike la xchʼunbeik li kʼusi laj yale, vaʼun jaʼ jech la skomtsanik yichʼel ta mukʼ yan velta li Jeovae.