¿Mi xibal sbaik li stestigotak Jeova ta Nueva Zelandae?

Li ta 21 yuʼun oktuvre ta 1940, li ajvalil ta Nueva Zelandae laj yal ti stestigotak Jeovae jaʼik la jun organisasion ti jtoybaetike xchiʼuk ti xibal sbaik ta stojolal li krixchanoetike. Akʼo mi laj yil˗o svokolik taje, muʼyuk xiʼik˗o li stestigotak Jeovae. Jech˗o la stsob sbaik sventa xichʼik ta mukʼ li Jeovae akʼo mi xichʼik ilbajinel o xtikʼatik ta chukel yuʼun li j˗abteletike.

Li smalal ermana Mari ti Andi Clarke sbie laj yakʼ venta ti solel jpʼel ta yoʼonton ti muʼyuk chikta sba ta tsobajeletik li yajnile akʼo mi yichʼojik sibtasel. Ta skoj ti chiʼ mi xichʼ tikʼel ta chukel li yajnile, li Andie bat xchiʼin li ta tsobajeletike akʼo mi mu nopemuk xaʼi jech tspas, xi laj yalbee: «Mi lavichʼ chukele, akʼo xchukikun batel ek». Jaʼ yuʼun, lik batuk˗o ta skotol tsobajeletik li Andie. Ta tsʼakale, laj yichʼ voʼ. Li Marie maʼuk noʼox stuk laj yakʼ ta ilel ti tsots yoʼontone, yuʼun ep stestigotak Jeova li ta Nueva Zelandae laj yakʼik ta ilel ti tsots yoʼontonik kʼalal jaʼo yakal li Xchibal Mukʼta Paskʼop ta spʼejel Balumile.

Muʼyuk buchʼu tspajtsanatik akʼo mi tikʼajtik ta chukel

Jun kʼakʼal kʼalal jaʼo yakal chchol mantal li ermano John Murray ti 78 sjabilale, laj yichʼ tsakel batel yuʼun jun polisia. Laj yichʼ albel ti sta˗o xichʼ tikʼel ta chukel ta skoj ti te tsakal skʼoplal ta jun organisasion ti tstoy sbaike. Pe mu stukuk jech la snuptan, yuʼun laj yichʼik ikʼel batel yan testigoetik li ta snail chapanobbaile. Junantike laj yichʼik kʼanbel multa, li yantik xtoke oy jayib velta laj yichʼik chukel; oy buchʼutik oxib to u laj yichʼik chukel.

Ta skoj ti chanubtasbil ta Vivlia li sjol yoʼontonike, li stestigotak Jeovae muʼyuk ochik ta soltaroal (Isaias 2:4). Ta skoj taje, kʼalal laj yichʼik ikʼel sventa xbatik ta paskʼope, ep tajek laj yil svokolik. Ta skoj ti muʼyuk xbatik ta paskʼope, te van 80 stestigotak Jeova laj yichʼik takel batel sventa spasik tsatsal abtelal. Akʼo mi sik tajek xchiʼuk laj yichʼik ilbajinel, li ermanoetike jech-o xmuyubajik laj yichʼik ta mukʼ li Jeovae.

Ta anil noʼox lik xchapan sbaik sventa stsob sbaik xchiʼuk xcholbeik mantal li yan jchukeletike. Li ta junantik ti bu tspasik tsatsal abtelaletike laj yetʼesik asambleaetik jaʼ noʼox venta mi oy buchʼu te chchabiatike. Junantik jchukeletike te laj yojtikinik mantal xchiʼuk te laj yichʼik voʼ.

Li Bruce ti jaʼ xkʼox keremik li Mari xchiʼuk Andi ti laj xa onoʼox kalbetik skʼoplale laj yakʼ venta ti xuʼ xchʼi-o mas ta mantal ti kʼu sjalil ayik ta spasel li tsatsal abtelale. Xi chale: «Xkoʼolaj ti li-ay ta chanob vun yaʼeluke. Yuʼun xuʼ jchiʼin ta loʼil ermanoetik ti lek tsotsik ta mantale xchiʼuk ti ep kʼusi xuʼ jchanbeike».

Li ta 1944, li ajvalile laj yal ti xuʼ van xichʼik koltael lokʼel junantik stestigotak Jeova ti te oyik ti bu tspasik tsatsal abtelale. Akʼo mi jech, li soltaroetike muʼyuk lek laj yaʼiik. Yuʼun snaʼojik ti jech-o chalik batel li kʼusi xchʼunojik mi laj yichʼik lokʼesel ta chukele. Xi laj yal li ajvalile: «Ta onoʼox xpajik jutuk mi laj yichʼik chukele, pe mu kʼusi stakʼik utel sventa jelbetik snopbenik».

Muʼyuk xibal sbaik ta stojolal li krixchanoetike

Toj ep laj yichʼ pukbel skʼoplal kʼalal la spajesbeik yabtel li stestigotak Jeovae. Jaʼ yuʼun, oy junantik krixchanoetike tskʼan tsnaʼik kʼusi kʼot ta pasel. Ta mas tsʼakale, ep buchʼutik laj yakʼik venta ti muʼyuk xibal sbaike. Laj yilik ti jaʼik noʼox antsetik xchiʼuk viniketik ti mu snaʼ saʼik kʼope xchiʼuk ti muʼyuk kʼusi tspasbeik li yantike. Ta skoj taje, epaj li stestigotak Jeova ta Nueva Zelandae. Li ta 1939 jaʼ toʼox 320, pe li ta 1945 oy xa ox 536.

Bateltike, tukʼ snaʼ xchapanvanik li junantik jchapanvanejetike xchiʼuk chalik ti muʼyuk lek ti xichʼ pajesbel yabtel li stestigotak Jeovae. Jun veltae, jun jchapanvaneje muʼyuk lek laj yil ti kʼu yelan la stikʼbeik smul jun ermano ti muʼyuk laj yikta cholmantale. Kʼalal laj yaʼi kʼusitik smul li ermanoe, xi laj yale: «Toj kʼexlal sba. Mu jchʼun chkaʼi ti chichʼ tikʼbel smul jun krixchano ta skoj noʼox ti tspuk Vivliae. Mu sta-o chkaʼi xchiʼuk li mantaletik jchanoj sventa chapanvaneje».

Kʼalal laj li paskʼope xchiʼuk kʼalal laj yichʼ alel ti xuʼ xa ox xcholik mantal li stestigotak Jeovae, mas to ta sjunul yoʼontonik laj yalbeik batel skʼoplal li Ajvalilal yuʼun Diose. Li ta 1945, li Betele la stakbe batel jlik karta li tsobobbailetik ta Nueva Zelandae, xi chale: «Skʼan lekuk koʼontontik ta stojolal skotol krixchanoetik xchiʼuk ti xij˗ichʼvan ta mukʼe. Mu jsaʼtik kʼop. Teuk ta joltik ti kʼotem tajek ta yoʼontonik kʼusi xchanoj ta srelijionik li krixchanoetike xchiʼuk ti tskʼan chakʼ ta xkuxlejalike [...]. Ep li krixchanoetik taje jaʼik ‹xchijtak› Kajvaltik, jaʼ yuʼun skʼan xkikʼtik talel ta stojolal Jeova xchiʼuk li Ajvalilal yuʼune».

Avie, li stestigotak Jeova ta Nueva Zelandae chcholbeik-o mantal li slakʼnatakike xchiʼuk li buchʼutik chkʼotik ta paxyale. Jun velta li ta Turangie, chanvoʼ testigoetik la xcholbeik mantal 67 jpaxyaletik ti likemik tal ta 17 jeltos lumetike. Taje ta junchib noʼox ora.

Li krixchanoetik ta Nueva Zelandae yakʼojik lek venta ti mu snaʼ saʼik kʼop li stestigotak Jeovae, ti muʼyuk xibal sbaike xchiʼuk ti jaʼik melel yajtsʼaklomtak Kristo ti chakʼ ta xkuxlejalik li kʼusi chal Vivliae. Ta jujun jabile, ta sienal xa noʼox krixchanoetik chkʼotik ta stestigo Jeova. Li ta 2019, oy xa ox mas ta 14 mil testigoetik ti xmuyubaj chtunik ta stojolal Jeova li ta Nueva Zelandae.