«Jaʼ pas ta jnakleb li bebetike»

LI JKUXLEJAL TOʼOXE

Jlom krixchanoetike vokol chaʼiik ti stukʼibtas batel xkuxlejalike. Jaʼ jech laj kaʼi jba ek. Te livokʼ xchiʼuk te lichʼi ta Barcelona, ti jaʼ li xchibal mukʼta jteklum ta Españae. Te nakalik ta Somorrostro li kutsʼ kalale, ti jaʼ jun lum ta yeloval nabe. Pe muʼyuk bu lek ilbil li lum taje, yuʼun ep buchʼutik chchonik droga xchiʼuk toj echʼem jpaschoplejal.

Balunvoʼunkutik ta vokʼel, voʼon li bankilalune. Ta skoj ti toj abol tajek jbakutike la stakun batel ta abtel jtot ta jun club de tenis, naka tam pelota ta jpas. Akʼo mi lajuneb to jabilal, lajuneb ora chi-abtej jujun kʼakʼal. Jaʼ yuʼun mu jechuk jkuxlejal kʼuchaʼal li yan ololetik ti chkʼotik ta chanune. Laje lik abtejkun ta jun tayer ti bu naka jepelul takʼin chkabtelankutik kʼalal kichʼoj xa ox 14 jabile.

Li ta 1975, la stakikun ta ikʼel ta soltaroal, yuʼun oy spersail ti akʼo jech jpaskutik ta España li vaʼ kʼakʼale. Jaʼ xa ta jkʼan laj kaʼi sventa xkuxetuk noʼox koʼonton, jaʼ yuʼun la jtsak jbi li ta jvokʼ soltaroal La Legión española sbi ta Melilla ti jaʼ ta yosilal Españae, ti te xkom ta snorteal Africae. Jaʼo lik jtambe slajesel drogaetik xchiʼuk lik jtambe uchʼ pox. Taje toj echʼ xa noʼox tsokes jkuxlejaltik.

Kʼalal lilokʼ ta soltaroale lisut batel ta Barcelona, vaʼun lik jtsob jpandiya. Sventa oyuk jtakʼinkutike jaʼ ti kʼusiuk noʼox xkelkʼankutik yoʼ jman li jdrogakutike. Lik jlajes jtos droga ti LSD sbie, anfetamina, lik mulivajkun ta bu xa noʼox kʼalal, lik kuchʼ pox xchiʼuk lek xkaʼi tajimol ta takʼin. La sokesun ta jyalel xchiʼuk lek xkaʼi majvanej. Xkuchet noʼox jkuchilu, kekʼel o junuk jmachita, yuʼun mi skʼan chkile ta ora noʼox ta jtunes.

Jun velta xchiʼuk li jpandiyae la jkelkʼankutik jkot karo, vaʼun lik snutsunkutik li polisiae. Jaʼ jech kʼuchaʼal jun pelikula ti kʼu yelan lijatavkutike. Kʼalal te xa ox van 30 kilometrouk xibatkutike, lik stukʼaunkutik li polisiae. Laj kakʼkutik choke, laje la jtambekutik jatvil. Kʼalal laj yaʼi jtote la snutsun lokʼel ta jnakutik.

Kʼalal lilokʼ ta jnae te van voʼob jabil pas ta jnakleb li bebetike. Yuʼun te chivay ta tiʼtiʼ mukʼta naetik, ta sba mukʼta karoetik, ta uni xilaetik ta parke xchiʼuk ta ba mukinal. Jech xtok, te van kʼuk sjalil ti linaki ta chʼene. Muʼyuk noʼox smelol yaʼel maʼ kuxlejale xchiʼuk muʼyuk buchʼu sventa yaʼel mi kuxulun to. Xvul to ta jol kʼalal jaʼo ta jlajes drogae la jtuchʼ snukʼtak jkʼob xchiʼuk steʼel jkʼob. Xkiltik to li yavtake.

TI KʼU YELAN LA SJEL JKUXLEJAL LI VIVLIAE

Kʼalal kichʼoj xa ox 28 jabile, tal saʼun li jmeʼe xchiʼuk laj yalbun ti akʼo xisut ta jnakutike. «Jechuk», xkut xchiʼuk laj kalbe ta jamal ti ta jel jtalelale. Pe muʼyuk bu xkʼot ta pasel kuʼun ta ora li kʼusi laj kale.

Te kʼot ta cholmantal ta jnakutik jun mal kʼakʼal chaʼvoʼ stestigotak Jeova. Kʼalal yakal ta jchikintabeik sloʼilike, xi tsots laj yalbun tal li jtote: «¡Bajo xa li tiʼnae!». Pe ta skoj ti chopol chkaʼi ti tspasikun ta mantale, muʼyuk bu jchʼun. Laj yakʼbeikun komel oxlik uni livroetik li ermanoetike. Ta sjunul koʼonton la jchʼam xchiʼuk la jakʼbeik bu tstsob sbaik. Te van jayibuk kʼakʼal ta mas tsʼakale, libat li ta Salon sventa Tsobobbaile.

Ti kʼusi toj labal sba laj kile jaʼ ti lek tajek skʼuʼ spokʼ slapojike. Yan li voʼone solel natik jol, kʼokʼ sba kisim xchiʼuk mol xa tajek li jkʼuʼ jpokʼ jlapoje. Mu jta-o xi-och laj kaʼi, jaʼ yuʼun te noʼox velelun ta stiʼ. ¡Pe labal to sba laj kil ti te oy jun vinik ti jaʼ toʼox jun pandiyeroe! Juan sbi, kamigo toʼox jbakutik. ¡Pe lek tajek skʼuʼ spokʼ slapoj! Laje laj kaʼi ti lokʼ xa jun jabil yochel ta stestigo Jeovae. Kʼalal laj kile jaʼ la skoltaun sventa ta sjunul koʼonton xi-och li ta tsobajele. Jaʼ jech lik jeluk li jkuxlejale.

Lik kichʼ chanubtasel ta Vivlia, vaʼun laj kakʼ venta ti skʼan xkikta ti toj echʼem xi-ilin xchiʼuk ti skʼan xkikta li mulivajele. Mu kʼunuk laj kaʼi. Pe sventa xmuyubaj kuʼun li Jeova Diose, laj kakʼ venta ti skʼan jel li jkuxlejale xchiʼuk ti jel jnopbene (Romanos 12:2). Batsʼi chkʼot ta koʼonton li xkʼuxul yoʼonton Diose. Yuʼun akʼo mi toj echʼ xa noʼox jpasoj jmul, oy ta yoʼonton ti jlikes ta achʼ li jkuxlejale. Kʼot ta koʼonton li kʼusi la jchan ta sventa Jeovae. Laj kaʼibe smelolal ti oyun ta yoʼonton ta melel li Jpasvanej kuʼuntike (1 Pedro 5:6, 7).

Jaʼ la stij koʼonton sventa oyuk kʼusitik xkikta. Jech kʼuchaʼal liʼe, kʼalal jaʼo yakal chkichʼ chanubtasele te laj yakʼik kil kʼusi chal Vivlia ta sventa li sikʼolajele, vaʼun xi la jnope: «Mi tskʼan Jeova ti jsakubtas jbatik xchiʼuk ti muʼyuk lek chil ti ta jsokes jkuxlejaltike, skʼan xkikta li sikʼolajele» (2 Korintios 7:1). Jaʼ yuʼun la jip skotol ta kʼaʼep.

Jech xtok, skʼan xkikta slajesel li drogae xchiʼuk ti xkikta jba xchonele. Mas to tsots laj kaʼi taje. Sventa xkom kuʼune skʼan xkikta li kamigotake, yuʼun jaʼ mu xichʼi-o ta mantal. Ta kʼunkʼun lik jpat koʼonton ta stojolal li Diose xchiʼuk ta stojolal li kamigotak ta tsobobbaile. Ta melel, muʼyuk bu xkil-o jech ti kʼanbilun tajek xchiʼuk ti oyun ta yoʼontonike. Te van jayibuk u ta mas tsʼakale, kom kuʼun ta vokol li drogaetike xchiʼuk jaʼ xa lik ‹jlap li achʼ talelale›, ti jaʼ tskoltaun sventa xmuyubaj kuʼun li Jeovae (Efesios 4:24). Vaʼun li ta agosto ta 1985, laj kichʼ voʼ, li-och ta stestigo Jeova.

KʼUSITIK SBALIL JTAOJAN

Toj ep la skoltaun li Vivliae. Jaʼ la skoltaun sventa oyuk jbalil xkaʼi jba xchiʼuk sventa mu xkakʼ jba ta vokol, yuʼun jaʼ la skoltaun sventa mu jnuptan jtosuk xibal sba chamel. Yuʼun mas ta 30 ta voʼ chamem li kamigotak ta voʼnee, kerem to chamik ta skoj sida o ta yan chameletik ta skoj li drogae. Koliyal li beiltaseletik ta Vivliae kuxulun to, muʼyuk bu jech xkil jvokol kʼuchaʼal taje.

Kʼalal toj echʼem toʼox xi-iline jaʼ toʼox xikuchet xchiʼuk li jkuchilue xchiʼuk li kekʼele. Ta melel, muʼyuk bu la jnop mi jaʼ xa chlik jkuch jlikuk Vivlia sventa jkolta li krixchanoetike. Pe avie, mas xa jal jchʼakojbekutik yorail cholmantal xchiʼuk li kajnile.

Akʼo mi muʼyuk x-ochik ta stestigo Jeova li jtot jmeʼe, laj yakʼik venta ti toj ep la skoltaun li Vivliae. Jech, li jtote tspakbe skʼoplal stestigotak Jeova ta stojolal li yamigotake xchiʼuk snaʼoj lek ti jaʼ koliyal Vivlia ti la jel tajek jkuxlejale. Jechtik chal li jmeʼ eke, chal ti kʼu la chaʼal mu voʼneuk la jchan li Vivliae. ¡Jech yaʼuk!

Li kʼusitik laj kil ta jkuxlejale jaʼ la skoltaun sventa xkakʼ venta ti maʼuk chakʼ jmuyubajeltik li drogae o li kʼusitik chopol chnop chkaʼitik spasele. Li kʼusi chakʼ xkuxetel koʼonton ta melele jaʼ ti jkolta li krixchanoetik sventa xchanik li kʼusitik melel ta Skʼop Diose, ti jaʼ koliyal ti kuxulune.