¿Jayvoʼ stestigotak Jeova xavojtikin? Xuʼ van nopol nakalunkutik ti bu oy anae, achiʼilunkutik ta abtel o ta chanun; xuʼ van jchiʼinojotkutik ta loʼil junuk velta ta sventa li Vivliae. ¿Buchʼuunkutik ta melel xchiʼuk kʼu yuʼun ta jpukbekutik skʼoplal li kʼusitik jchʼunojkutike?

Jechunkutik kʼuchaʼal li yan krixchanoetike. Li jchiʼiltakutike kapal ta viniketik xchiʼuk antsetik, jeltos bu likemunkutik tal, jlome abol jbakutik, li yane oy kʼusi mas x-ayan kuʼunkutik. Jlome oy toʼox yan jrelijionkutik, yantik xtoke muʼyuk toʼox jchʼunojkutik Dios. Akʼo mi jech, la jchʼakbekutik lek yorail xchanbel skʼoplal li Skʼop Dios kʼalal maʼuk toʼox stestigounkutik Jeovae (Echos 17:11). La jchʼunkutik li kʼusi la jchankutike xchiʼuk la jnopkutik ti jaʼ chkichʼkutik ta mukʼ li Jeova Diose.

Ta jtabekutik sbalil xchanel li Vivliae. Oy jvokolkutik xchiʼuk oy kʼusi tsots chkaʼikutik spasel jech kʼuchaʼal li yan krixchanoetike; pe ta skoj ti chkakʼkutik persa yakʼel ta jkuxlejalkutik jujun kʼakʼal li beiltasel chakʼ Vivliae, mas xa lekubem li jkuxlejalkutike (Salmo 128:1, 2). Taje jaʼ jun srasonal ti chkalbekutik batel krixchanoetik li kʼusitik kʼupil sba jchanojkutik ta Vivliae.

Chkakʼ ta jkuxlejalkutik li kʼusi chal Skʼop Diose. Li mantaletik sventa talelal ta Vivliae tskoltaunkutik sventa xkuxet noʼox koʼontonkutik, tstij koʼontonkutik sventa xkichʼkutik ta mukʼ yantik, sventa jamal chikʼopojkutik o sventa mu jtsakutik li kʼusi maʼuk kuʼunkutike xchiʼuk ti oyuk slekil koʼontonkutike. Tskoltaunkutik sventa jaʼuk lekil krixchanounkutik xchiʼuk ti lek jnaʼ xi-abtejkutike, jaʼ tskoltaunkutik xtok sventa lekuk jmoj tsobol li kutsʼ kalalkutike xchiʼuk ti lekuk jtalelalkutike. Jchʼunojkutik lek ti «mu snaʼ xtʼujvan li Diose». Jech oxal, oyunkutik ta spʼejel balumil, mu jnaʼ jpʼajkutik li buchʼu jelel stsʼunbalik o slumalike. Manchuk mi jechunkutik kʼuchaʼal li yan krixchanoetike, jaʼunkutik jun jteklum ti stuk noʼox jeche (Echos 4:13; 10:34, 35).

• ¿Kʼuxi xikoʼolajkutik xchiʼuk yan krixchanoetik li stestigounkutik Jeovae?

• ¿Kʼusi mantaletik sventa talelal jchanojkutik li ta Vivliae?

Epal krixchanoetike yalojik ti achʼ to li jrelijionkutike. Pe oy xa mas ta 2,700 jabil ti «voʼoxuk jtestigooxuk» x-utatik li yajtuneltak melel Diose (Isaias 43:10-12). Kʼalal skʼan toʼox xkʼot li jabil 1931, Jchanolajeletik ta Vivlia toʼox jbikutik. Vaʼun chaʼa, ¿kʼu yuʼun stestigo Jeova lik jbiinkutik?

Yuʼun chakʼ ta ojtikinel li Dios chkichʼkutik ta mukʼe. Li sbi Dios ti jaʼ Jeovae oy jaymiluk ta velta tsʼibabil li ta Vivliae, taje jech chakʼ ta ilel epal voʼneal tsʼibetik. Ta epal Vivliaetike sjelojik li sbi Diose, jaʼ xa noʼox chalik Dios o Kajvaltik. Akʼo mi jech, kʼalal laj yakʼ sba ta ojtikinel ta stojolal Moises li melel Diose, laj yal ti Jeova li sbie xchiʼuk xi laj yale: «Jaʼ jech jbi sbatel osil» (Eksodo 3:15). Jaʼ jech laj yakʼ ta ilel ti jelel xchiʼuk li yan diosetike. Ximuyubajkutik ti kichʼojbekutik li xchʼul bi Diose.

Yuʼun jaʼ chakʼ ta ilel li kabtelkutike. Ta voʼnee, ep buchʼutik laj yakʼ xchʼunel yoʼontonik ta stojolal li Jeovae. Li buchʼu baʼyel jech laj yakʼ ta ilele jaʼ li tukʼil Abele. Vaʼun, te lik-o talel li «epal testigo» ti te tsakal skʼoplal Noe, Abraan, Sara, Moises, David xchiʼuk yan krixchanoetike (Ebreos 11:4–12:1). Jech kʼuchaʼal jun krixchano ti chtun ta testigo ta snail chapanobbail sventa chal ta jamal kʼusitik spasoj jun krixchano ti muʼyuk smule, jaʼ jech ta sjunul koʼontonkutik chkakʼkutik ta ojtikinel li kʼusi melel ta sventa li Jdioskutike.

Yuʼun jaʼ ta jchanbekutik li Jesuse. Li Vivliae chal ti jaʼ ‹tukʼil xchiʼuk melel testigo› li Jesuse (Apokalipsis 3:14). Laj yal stuk ti jaʼ tal yakʼ ta naʼel li sbi Stote xchiʼuk ti tal ‹yalbe skʼoplal li kʼusi melel› ta sventa Diose (Juan 17:26; 18:37). Jaʼ yuʼun, li melel yajtsʼaklomtak Kristoe skʼan xichʼbeik li sbi Jeovae xchiʼuk ti xakʼik ta ojtikinele. Li stestigounkutik Jeovae chkakʼkutik persa spasel jech.

• ¿Kʼu yuʼun stestigo Jeova lik jbiinkutik?

• ¿Kʼu xa sjalil ti oy stestigotak liʼ ta balumil li Jeovae?

• ¿Buchʼu li stestigo Jeova ti mas tsots skʼoplal kʼoteme?

Li Vivliae laj onoʼox yal ti kʼalal chamem xa ox li Jesuse oy jlom baʼyel yajtsʼaklomtak ti chkʼotik ta jecheʼ jchanubtasvanejetik xchiʼuk ti chlik sokesik li kʼusi melel ta Skʼop Diose (Echos 20:29, 30). Jech onoʼox kʼot ta pasel, yuʼun li jecheʼ jchanubtasvanejetike la skapik li chanubtaseletik yuʼun Jesus xchiʼuk li jecheʼ chanubtaseletike, vaʼun jaʼ jech lik talel li relijionetik ti xchʼunojik Kristo ta alele (2 Timoteo 4:3, 4). Ta skoj taje, ¿kʼu yuʼun jchʼunojkutik ti jech ta melel chchanubtasvan Vivlia ti kʼu yelan chkaʼibekutik smelolale?

Kʼot yorail ti chakʼ ta ojtikinel kʼusi melel li Jeovae. Li Diose laj yal ti mi kʼot li slajebal kʼakʼale, «ch-epaj li melel yojtikinobile» (Daniel 12:4). Ta 1870, oy jtsop krixchanoetik ti la saʼik li kʼusi melele laj yakʼik venta ti jutuk mu skotoluk li kʼusi chchanubtasvanik li relijionetike mu jechuk kʼuchaʼal chal li Vivliae. Jaʼ yuʼun, la xchanik mas li kʼusi chal Vivliae, vaʼun li Jeovae koltavan sventa xaʼibeik smelolal li mantale.

Oy viniketik ti ta sjunul yoʼonton la xchanik lek li Vivliae. Li Jchanolajeletik ta Vivlia ti jaʼ li buchʼu baʼyel lik xchanik talel kuʼunkutike, jaʼ jech la xchanik kʼuchaʼal chichʼ chanel avie, ta jujun xchanobil chchanik. Kʼalal oy junuk teksto ti mu xaʼibeik smelolale, tsaʼik yan teksto ti xuʼ xkoltaatik ta yaʼibel smelolale, vaʼun kʼalal oy kʼusi jech chkʼot ta nopel yuʼunik ti koʼol chchanubtasvan li Vivliae, tstsakik ta vun. Jaʼ jech laj yakʼik ti akʼo stakʼ stuk li Vivliae, vaʼun laj yaʼibeik smelolal li kʼusi melel ta sventa li sbi Diose, li Ajvalilal yuʼune, li kʼusi tskʼan tspas ta sventa li krixchanoetike xchiʼuk li balumile, ti kʼu yelan oy li animaetike xchiʼuk li spatobil oʼontonal ta sventa chaʼkuxesele. Li kʼusi la xchanik ta sventa li kʼusi melele jaʼ koltaatik sventa xiktaik li kʼusitik xchʼunojik toʼoxe xchiʼuk li kʼusitik tspasik toʼoxe (Juan 8:31, 32).

Ta 1879, laj yaʼibeik smelolal ti skʼan xalbeik batel skotol krixchanoetik li kʼusi melel ta Vivliae. Li ta jabil taje, jaʼo lik slokʼesik li revista ti yakal-o chichʼ lokʼesel avie: Li Jkʼel-osil ta toyole. Yakal chalbe skʼoplal li Ajvalilal yuʼun Jeovae. Li avie, ta jcholkutik mantal mas ta 240 mukʼtik lumetik xchiʼuk bikʼtal lumetik xchiʼuk mas ta 750 kʼopetik. ¡Muʼyuk bu jech ilbil-o ti chpuk batel tajek skʼoplal li kʼusi melel ta Vivliae!

• Kʼalal chamem xa ox li Jesuse, ¿kʼusi kʼot ta pasel ta sventa li kʼusi melel chal Vivliae?

• ¿Kʼu yelan la jtakutik li kʼusi melel ta Vivliae?

Oy xa ta sjaylajunebaluk jabile, laj toʼox jpaskutik imprimir, la jtuneskutik xchiʼuk la jpukutik jeltos Vivliaetik li stestigounkutik Jeovae. Pe ta tsʼakale, laj kakʼkutik venta ti skʼan xichʼ lokʼesel yan Vivlia sventa mas kʼun ta aʼibel smelolale xchiʼuk ‹ti akʼo yojtikinik lek kʼusi melel› li krixchanoetike, ti jaʼ jech tskʼan li Diose (1 Timoteo 2:3, 4). Jaʼ yuʼun, li ta jabil 1950 lik jlokʼeskutik ta inglés jayibuk livroetik li ta Vivliae, jech laj yichʼ pasel kʼuchaʼal chkʼopojik li krixchanoetike. Li Vivlia taje jaʼ li Xchʼul Kʼop Dios sventa Achʼ Balumil sbie, lek tukʼ yichʼoj jelubtasel mas ta 130 kʼopetik.

Chtun jun Vivlia ti kʼun ta aʼibel smelolale. Ta skoj ti chjel batel li kʼopetike, ti kʼu yelan jelubtasbil epal Vivliaetike mu xa jamaluk smelolal o muʼyuk xa jech chijkʼopoj ti kʼu yelan pasbile. Jech xtok, yichʼoj tael voʼneal tsʼibetik ti mas xkoʼolaj kʼuchaʼal li orijinale, taje jaʼ koltavan sventa xichʼ aʼibel smelolal li ebreo, arameo xchiʼuk griego ti jaʼ li kʼopetik ti la stsʼibaik-o li Vivliae.

Skʼan lek tukʼ xichʼ jelubtasel jech kʼuchaʼal laj yal stuk li Diose. Li buchʼutik tsjelubtasike mu stakʼ spas sbaik ta mantal sventa stikʼik o stupʼik li kʼusi chal tsʼibetik ti jaʼ yakʼoj ta naʼel Diose; skʼan jech xiktaik kʼuchaʼal laj yichʼ tsʼibael ta voʼnee. Pe jutuk mu skotoluk li Vivliaetike muʼyuk te chal li sbi Dios ti jaʼ Jeovae.

Skʼan jun Vivlia ti chichʼ ta mukʼ li buchʼu laj yakʼ ta naʼele (2 Samuel 23:2). Li ta Xchʼul Kʼop Dios sventa Achʼ Balumile laj yichʼ chaʼtsʼibael jutuk mu vukmiluk ta velta li sbi Dios jech kʼuchaʼal oy toʼox li ta voʼneal tsʼibetik sventa Vivliae, jech kʼuchaʼal chvinaj li ta lokʼol ta olone (Salmo 83:18). Ta skoj ti ep laj yichʼ chanbel skʼoplale, xuʼ jun koʼonton jchantik li Vivlia taje, yuʼun jamal chal li snopbentak Diose. Ta jtijkutik avoʼonton sventa xanopes aba ta skʼelel jujun kʼakʼal li Skʼop Jeovae, xuʼ jaʼ xatunes li Xchʼul Kʼop Dios sventa Achʼ Balumil mi oy ta akʼope o mi muʼyuke, xuʼ xatunes yan (Josue 1:8; Salmo 1:2, 3).

• ¿Kʼu yuʼun tsots skʼoplal laj kilkutik ti skʼan xichʼ pasel yan Vivliae?

• ¿Kʼusi skʼan spas jujun kʼakʼal li buchʼu tskʼan tsnaʼ kʼusi tskʼan yoʼonton Diose?