Epal krixchanoetike mu xa bu chkʼot ta stemploik o ta xchʼulnaik ta skoj ti muʼyuk tstaik beiltasel ta mantal xchiʼuk spatobil yoʼontonike. Mi jeche, ¿kʼu yuʼun skʼan xabat li ta stsobajelik stestigotak Jeovae? ¿Kʼusi xuʼ xata te?

Xamuyubaj noʼox xchiʼuk krixchanoetik ti lek xkʼopojik xchiʼuk ti lek yoʼontonike. Li yajtsʼaklomtak Kristo ta baʼyel sigloe lek chʼakbilik ta jujun tsobobbail. Ta stsob sbaik sventa chichʼik ta mukʼ Dios, ta xchanbeik li Skʼope xchiʼuk sventa tspatbe sba yoʼontonik (Ebreos 10:24, 25). Kʼalal stsoboj sbaike, jun yoʼontonik, yuʼun toj lek xil sbaik ta melel o yamigo sbaik xchiʼuk li yermanotakike (2 Tesalonisenses 1:3; 3 Juan 14). Li voʼonkutike jech ta jpaskutik xchiʼuk jech ximuyubajkutik ek.

Chachan yakʼel ta akuxlejal li beiltaseletik ta Vivliae. Jech kʼuchaʼal tspasik toʼox ta voʼnee, ta bikʼit ta mukʼ ta jtsob jbakutik. Te une, oy jchanubtasvanejetik ti lek chanemik ti chakʼik iluk kʼuxi xuʼ xkakʼ ta jkuxlejalkutik jujun kʼakʼal li beiltaseletik ta Vivliae (Deuteronomio 31:12; Neemias 8:8). Kʼalal chichʼ jakʼel xchiʼuk chichʼ takʼel li ta tsobajele, xuʼ xkakʼ jloʼiltik xchiʼuk xuʼ xijkʼejin, jaʼ jech chkakʼtik ta ilel li kʼusi jmalaojtik chtal ta jelavele (Ebreos 10:23).

Chatsatsubtas xchʼunel avoʼonton ta stojolal Dios. Li ta voʼnee, xi la stsʼibabe batel jun tsobobbail li jtakbol Pabloe: «Oy tajek ta koʼonton ta jkʼeloxuk sventa [...] koʼoluk jtsatsubtasbe jba koʼontontik ta sventa li xchʼunel koʼontontik ta jujuntale, li xchʼunel avoʼontonike xchiʼuk li xchʼunel koʼonton eke» (Romanos 1:11, 12). Kʼalal ta jtsob jbakutik xchiʼuk li kermanotakutike, ta stsatsub xchʼunel koʼontonkutik xchiʼuk mas jpʼel ta koʼontonkutik chkakʼ ta jkuxlejalkutik li beiltaseletik ta Vivliae.

¿Kʼu yuʼun mu xabat jkojuk li ta jtsobajelkutik sventa xavakʼ venta ti jeche? Lek chʼambil chakʼot. Muʼyuk tojbil chij-och xchiʼuk muʼyuk chichʼ kʼanel takʼin te.

• ¿Bu laj yichʼ chanel ti kʼu yelan ch-echʼ li jtsobajelkutike?

• ¿Kʼusitik sbalil xuʼ xata li ta jtsobajelkutike?

Li stestigounkutik Jeovae mu xkiktakutik li jtsobajelkutike akʼo mi chixanavkutik ta teʼtikaltik o mi chakʼ voʼ o mi oy sik. ¿Kʼu yuʼun chkakʼkutik persa ta jtsob jbakutik xchiʼuk kermanotakutik akʼo mi tsots jvokolkutik xchiʼuk ti oy lubel ta skoj kabtelkutik jujun kʼakʼale?

Chkoltavan sventa lek noʼox oyunkutik. Li jtakbol Pabloe laj yal ti toj tsots skʼoplal li tsobajeletike, xi laj yale: «Skʼan me oyuk ta koʼonton jbatik ta jujuntal yoʼ jtijbe jba koʼontontik» (Ebreos 10:24). Taje jaʼ skʼan xal ti skʼan xkojtikin jbakutik ta jujuntale. Jaʼ xkaltik, li jtakbol Pabloe laj yal ti skʼan oyuk ta koʼontonkutik li yantike. Kʼalal chkojtikinkutik ta tsobobbail li yan ermanoetike, jaʼ te chkakʼkutik venta ti oy toʼox svokolik jlom kʼuchaʼal voʼonkutike xchiʼuk ti xuʼ skoltaunkutik sventa stsal kuʼunkutike.

Te ta jta kamigotakutik ta melel. Li buchʼutik chkʼotik ta jtsobajelkutike solel kamigo chkaʼi jbakutik, maʼuk ti naka noʼox xkojtikin jbakutik xchiʼukike. Jech noxtok, bakʼintike ta jtsob jbakutik sventa ta jchʼay koʼontonkutik. ¿Kʼusi sbalil ta jtabekutik taje? Tskoltaunkutik sventa masuk jkʼuxubin jbakutik xchiʼuk ti masuk jkʼan jbakutike. Ta skoj ti lek tajek xkil jbakutike, chbat jkoltakutik ta anil kʼalal oy svokolik li kermanotakutike (Proverbios 17:17). Kʼalal chkojtikin jba jkotolkutike, jech chkakʼkutik ta ilel ti oy ta koʼonton ta jchabi jbakutik ta jujuntale (1 Korintios 12:25, 26).

Ta jtijkutik avoʼonton sventa xasaʼ avamigotak ti tspasik li kʼusi tskʼan yoʼonton Diose. Xuʼ xata avamigotak ti jaʼik stestigotak Jeovae. Mu me kʼusi smakot sventa xatsob aba xchiʼuk voʼonkutik.

• ¿Kʼu yuʼun ta jtabekutik sbalil ti ta jtsob jbakutik xchiʼuk li kermanotakutike?

• ¿Bakʼin chakʼan chbat akʼel li jtsobobbailkutike?

Li yajtsʼaklomtak Kristo ta baʼyel sigloe chkʼejinik li ta tsobajele, tspasik orasion, tskʼelik xchiʼuk chchanbeik skʼoplal li Skʼop Diose. Pe muʼyuk kʼusi yan labal sba tspasik (1 Korintios 14:26). Mi latal li ta jtsobajelkutike, te chavil ti koʼoltik jech ta jpaskutike.

Ta Vivlia chlokʼ li kʼusitik chichʼ chanel tee. Li ta savado o domingoe ta jtsob jbakutik ta skotol tsobobbailetik sventa chkaʼikutik li Mantal sventa Skotol Krixchanoetik ti chjalij 30 minutoe, te chakʼ ta ilel kʼuxi xuʼ chtun ta jkuxlejalkutik li beiltaseletik ta Vivliae xchiʼuk kʼuxi tskoltaunkutik li avi kʼakʼale. Li buchʼutik te oyike chichʼik albel ti akʼo skʼel batel ta Svivlia stukik li teksto chichʼ kʼelele. Mi laje, chtal Xchanel Li Jkʼel-osil ta toyole, xuʼ xakʼ sloʼilik li buchʼutik te oyike. Taje jaʼ te chichʼ chanbel skʼoplal jun xchanobil li ta revista Li Jkʼel-osil ta toyole, jun ora chjalij. Chakʼ ta ilel kʼuxi xuʼ xkakʼ ta jkuxlejalkutik li tojobtaseletik ta Vivliae. Li mas ta 110,000 tsobobbail ti oy ta spʼejel balumile koʼol li kʼusi chichʼ chanele.

Mas chlekub ti kʼu yelan chichanubtasvankutike. Jun velta ta xokol kʼakʼal xtoke, ta jtsob jbakutik sventa ch-echʼ jun tsobajel ti ta oxvokʼ chichʼ chʼakele, jaʼ sbi Jkuxlejaltik xchiʼuk Kabteltik sventa Dios, te chichʼ lokʼesel li ta Jkuxlejaltik xchiʼuk Kabteltik sventa Dios, programa xchiʼuk bu chijtsʼibaj ti chlokʼ jujun ue. Li baʼyel parte ta tsobajel ti «Kʼusitik Kʼupil sba ta Vivlia» sbie tskoltaunkutik sventa xkojtikinkutik junchibuk kapitulo ta Vivlia ti kak xa noʼox jkʼelojkutik tale. Li jvokʼ ti jaʼ sbi «Tojobkutik mas ta Spasel li Kabteltike» chichʼ akʼel ta ilel skʼelobiltak ti kʼu yelan xuʼ xkalbekutik yan krixchanoetik ta sventa li Vivliae. Oy jun jtojobtasvanej ti chal kʼusitik xuʼ skoltaunkutik yoʼ xitojobkutik mas ta skʼelel vun o ti xitojob xikʼopojkutik ta yeloval krixchanoetike (1 Timoteo 4:13). Li slajeb parte ti jaʼ «Li Jkuxlejaltike» chalbe skʼoplal ti kʼuxi xuʼ xkakʼ ta jkuxlejalkutik li beiltaseletik ta Vivliae. Li ta jvokʼ mantal taje oy jun parte ti talem sjakʼobiltak ti chkoltavan ta yaʼibel smelolal li kʼusi mas tsotsik skʼoplal ta Vivliae.

Mi labat li ta jtsobajelkutike, labal to chavil ti kʼu yelan chkichʼkutik chanubtasel ta Vivliae (Isaias 54:13).

• ¿Kʼusi te chavil mi labat li ta stsobajel stestigotak Jeovae?

• Li ta tsobajel ta jpaskutik jujun xemanae, ¿bu van junukal chakʼan chabat?

¿Mi laj xa avakʼ venta ti lek jmeltsanoj jbakutik kʼalal chibatkutik ta jtsobajelkutik jech kʼuchaʼal xvinaj li ta lokʼoletike? ¿Kʼu van yuʼun toj tsots skʼoplal chkaʼikutik li jkʼuʼ jpokʼkutik xchiʼuk ti lek ta jmeltsan jbakutike?

Jaʼ ti chkichʼkutik ta mukʼ li Jdioskutike. Melel onoʼox ti maʼuk tstsak ta venta jpat jxokontik li Diose (1 Samuel 16:7). Pe kʼalal ta jtsob jbakutik sventa chkichʼkutik ta mukʼe, jaʼ ta jkʼankutik ti junuk yoʼontone xchiʼuk ti junuk yoʼontonik li kermanotakutik eke. Ti tauk xijbat ta stojolal jun jchapanvaneje, ¿mi mu jechuk ti lek ta jmeltsan jbatik batel ta skoj ti tsots yabtele? Jaʼ jech ek, ti kʼu yelan xvinaj li jpat jxokonkutik kʼalal chibatkutik ta tsobajele chakʼ ta ilel ti chkichʼkutik ta mukʼ li Jeovae, «li Jchapanvanej ta spʼejel balumile» xchiʼuk ti bu chkichʼkutik ta mukʼe (Jenesis 18:25).

Jaʼ sventa chkakʼkutik ta ilel ti kʼu yelan chanubtasbilunkutike. Li Vivliae chalbe yajtsʼaklomtak Kristo ti skʼan «oyuk me smelolik xchiʼuk akʼo me yichʼ spʼijilik» ti kʼu yelan tslap li skʼuʼ spokʼike (1 Timoteo 2:9, 10). Kʼalal chal ti «oyuk me smelolik» slap skʼuʼ spokʼike, jaʼ skʼan xal ti mu me xchʼaybe yoʼonton yantik ta skoj ti toyol stojole, ti tstij oʼontonal ta skoj ti toj pakʼal kʼu yelan tslapike o ti xvinaj sbekʼtalike. Jech xtok, ti «akʼo me yichʼ spʼijilik» xie jaʼ tskoltaunkutik ta stʼujel lek li kʼuʼil pokʼil ti alakʼ sbae xchiʼuk ti oyuk noʼox smelolale, ti mu yanuk xa tajek ta kʼelele. Pe li tekstoetik taje maʼuk skʼan xal ti jtos xa noʼox kʼu yelan ta jlap jkʼuʼ jpokʼkutike, yuʼun ta jujuntal skʼan jtʼujkutik. Mi lek noʼox kʼupil sba xvinaj li jpat jxokonkutike, jaʼ chkoltavan «sventa masuk to kʼupil sba xkʼot [...] li chanubtasel yuʼun li Jkoltavanej kuʼuntike, li Diose» xchiʼuk ta jtoybekutik-o skʼoplal akʼo mi muʼyuk kʼusi chlokʼ ta kekutik (Tito 2:10; 1 Pedro 2:12). Ta skoj ti kʼu yelan ta jlap batel jkʼuʼ jpokʼkutik li ta jtsobajelkutike, xuʼ chakʼik venta kʼu yelan steklumal Jeova li krixchanoetike.

Sventa lek noʼox xijvinaj xchiʼuk lekuk noʼox sakutike, mu persauk toyolik stojol li jkʼuʼ jpokʼtike o ti solel pʼijike. Jaʼ yuʼun, mu me jaʼuk smakot sventa xabat li ta Salon sventa Tsobobbaile.

• ¿Kʼu yuʼun tsots skʼoplal ti kʼu yelan ta jlap batel jkʼuʼ jpokʼkutik kʼalal chbat kichʼkutik ta mukʼ Diose?

• ¿Kʼusitik tekstoal tskoltaunkutik ta sventa ti kʼu yelan ta jlap jkʼuʼ jpokʼkutike?

Mi yakal chavichʼ chanubtasel yuʼun jun stestigo Jeovae, kak onoʼox van chachapan aba sventa li kʼusi chachanike. Sventa xatabe mas sbalile, xuʼ jaʼ jech xapas sventa li tsobajeletik eke. Mas to me chatabe sbalil mi chachʼakbe lek yoraile.

Nopo lek kʼusi ora xchiʼuk bu chachanunaj. Skʼan xavakʼ venta jayib ora ti mas lek xuʼ xachanunaje. ¿Mi jaʼ van mas xokolot kʼalal skʼan toʼox xabat ta abtele o mi jaʼo kʼalal chvayik xa ox li avalab o anichʼnab ta akʼobaltike? Manchuk mi jlikel noʼox, jaʼ lek nopo ti kʼu yepal chachane xchiʼuk mu me xavakʼ ti oy kʼusi xchʼay avoʼonton ta spasel taje. Jaʼ te xachanunaj ti bu tsʼijil noʼoxe xchiʼuk jaʼ lek tupʼo li aradioe, li atelevisione xchiʼuk li aselular sventa mu xchʼay avoʼontone. Mi chapas orasion kʼalal chlik achane, jaʼ me tskoltaot sventa xchʼay ta ajol li kʼusi chavul-o avoʼonton jujun kʼakʼale xchiʼuk ti jaʼ noʼox xavakʼ ta avoʼonton li Skʼop Diose (Filipenses 4:6, 7).

Bono ti bu mas tsotsik skʼoplale xchiʼuk chapano aba sventa xavakʼ aloʼil. Kʼelo lek baʼyel li kʼusi chalbe smelolale. Xuʼ xavakʼ venta li ta stituloal mantal o kapituloe, kʼelo kʼuxi te tsakal skʼoplal stemail li ta subtituloetike, kʼelo lek li lokʼoletike xchiʼuk takʼo li sjakʼobiltak sventa svulesobil ta joltik ti jaʼ chalbe skʼoplal li kʼusi mas skʼan jvules ta joltike. Mi laje, kʼelo jujun parafo sventa xatabe stakʼobil ta jujun li sjakʼobiltake. Saʼo ta Vivlia li tekstoetik ti muʼyuk lokʼtabile xchiʼuk akʼo venta kʼuxi tsjambe smelolal li kʼusi chichʼ chanele (Echos 17:11). Kʼalal mi la atae, bono jaypʼeluk noʼox ti bu mas tsotsik skʼoplal ti jaʼ tskoltaot ta svulesel ta ajol li stakʼobile. Kʼalal mi jech la apase, xuʼ me xatoy akʼob ta tsobajel sventa chavakʼ jlikel aloʼil ta akʼop atuk mi jech chakʼane.

Kʼalal jeltos kʼusitik chachan jujun xemana ta tsobajele, ch-epaj li akʼulejal ta sventa li kʼusi chal Vivliae (Mateo 13:51, 52).

• ¿Kʼuxi xuʼ xachʼakbe lek yorail yoʼ xachapan aba sventa li tsobajeletike?

• ¿Kʼuxi xuʼ xachapan aba sventa xavakʼ aloʼil li ta tsobajele?

Li Jeovae voʼne onoʼox ti tskʼan koʼoluk kʼusitik spasik li utsʼ alaliletik sventa stsatsubtas sbaik ta mantal xchiʼuk ti jmojuk-o tsobolike (Deuteronomio 6:6, 7). Jaʼ yuʼun, li stestigounkutik Jeovae ta jchʼakbekutik yorail jujun xemana sventa chkichʼkutik ta mukʼ Dios li ta kutsʼ kalalkutike, ta jchankutik mantaletik ti chtun kuʼunkutik ta kutsʼ kalalkutike. Li buchʼutik stuk nakalik xtoke xuʼ stabeik sbalil mi la xchʼakbeik yorail sventa chchanik jtosuk chanubtasel ta Vivlia ti lek chaʼiike.

Chinopajkutik-o mas ta stojolal Jeova. «Nopajanik ta stojolal Dios, jech chnopaj tal ta atojolalik ek» (Santiago 4:8). Kʼalal ta jchankutik ta Vivlia li stalelaltak xchiʼuk ti kʼusitik la spas li Jeovae, mas chkojtikinkutik-o. Li kʼusi xuʼ xlik apas ta avutsʼ avalale jaʼ ti xlik achanik li jayib kapitulo chichʼ chanel Vivlia li ta tsobajel Jkuxlejaltik xchiʼuk Kabteltik sventa Diose, taje xuʼ tsots xavaptaik. Xuʼ van xakʼelik jayibuk versikulo ta jujuntal, mi laje xuʼ xavalik li kʼusi la achanik ta Vivliae.

Chinopajkutik-o mas ta stojolal kutsʼ kalalkutik. Li malaliletik, ajnilaletik, totil meʼiletik xchiʼuk alab nichʼnabiletike jaʼ jech mas chnopajik ta jujuntal xchiʼuk li yutsʼ yalalik kʼalal jmoj chchanik li Vivliae. Skʼan ti ta sjunul yoʼonton xa tsmalaik ti xkʼot yoraile xchiʼuk ti xmuyubajik noʼoxe. Li totil meʼiletike xuʼ van tskʼan chchanik mantaletik ti lokʼemik ta revista ¡Vikʼiluk me jsatik!, Li Jkʼel-osil ta toyole o ta jpajinakutik ta Internet ta jw.org/tzo, tstsakik ta venta kʼu yelan sjabilal li yalab xnichʼnabike. O chchanik junuk mantal ti xuʼ van xtun yuʼunik ta chanob vun sventa stsal yuʼunik jtosuk vokolile. ¿Kʼu yuʼun mu xakʼel junuk programa ta kanal JW Broadcasting® (tv.jw.org/tzo) xchiʼuk ti jmoj xavalbeik skʼoplale? Xuʼ van xachanik li kʼejojetik chichʼ kʼejintael ta tsobajele xchiʼuk xuʼ oy kʼusi xalajesik kʼalal mi laj xa ox avoʼontonike.

Kʼalal ta jchʼakbekutik yorail sventa jmoj chkichʼkutik ta mukʼ li Jeova ta kutsʼ kalalkutike, jaʼ tskoltaunkutik sventa jkʼupinkutik xchanel li Skʼop Diose, vaʼun chakʼbunkutik sbendision Jeova mi jech ta jpaskutike (Salmo 1:1-3).

• ¿Kʼu yuʼun ta jchʼakbekutik yorail li yichʼel ta mukʼ Jeova ta kutsʼ kalalkutike?

• ¿Kʼusi xuʼ spas li totil meʼiletik sventa xuʼ skʼupinik skotolik taje?

¿Mi xavakʼ venta ti jun tajek yoʼontonik li krixchanoetik liʼe? Jech chaʼi sbaik li buchʼutik chkʼotik ta j-asambleakutike. Li yajtuneltak Dios ta voʼnee albatik mantal ti oxib velta ta jabil skʼan stsob sbaike, jech oxal li avie, ximuyubajkutik tajek ti jech ep ta jtsob jbakutike (Deuteronomio 16:16). Ta jujun jabile, oxib velta jech ta jtsob jbakutik: chib asamblea ta sirkuito ta jun kʼakʼal xchiʼuk jun asamblea rejional ta oxib kʼakʼal. ¿Kʼusi sbalil ta jtakutik?

Chinopajkutik-o mas ta stojolal li kermanotakutike. Li j-israeletike xmuyubajik tajek kʼalal chalbeik slekilal Jeova «ti bu tsobol ep krixchanoetike», jech li voʼonkutik eke ximuyubajkutik kʼalal jmoj chkichʼkutik ta mukʼ Dios xchiʼuk li kermanotakutik ta tsobajeletik ti stuk xa noʼox jech chkaʼikutike (Salmo 26:12, tsʼib ta yok vun; ; 111:1). Kʼalal ta jtsob jbakutik jech taje, xuʼ xkojtikinkutik yan stestigotak Jeova ti yan-o stsobobbailike o ti yan-o slumalike. Ta oʼlol kʼakʼale, jmoj chiveʼkutik ti bu ch-echʼ asambleae, taje jaʼ chkoltavan sventa junuk noʼox koʼontonkutik kʼalal chbat kaʼikutik mantale (Echos 2:42). Jaʼ te chvinaj ti jaʼ tstsobunkutik ti jkʼanoj jbakutik xchiʼuk ‹skotol li kermanotakutik ta chʼunolajel› ta spʼejel balumile (1 Pedro 2:17).

Tskoltaunkutik sventa xichʼikutik ta mantal. Li j-israeletike la stabeik sbalil kʼalal «laj yaʼibeik smelolal» li Skʼop Dios albatike (Neemias 8:8, 12). Li voʼonkutik eke ep sbalil chkilkutik li chanubtasel ch-echʼ ta asambleae. Oy lek jun stemail ti lokʼem ta Vivlia ti jaʼ chalbeik skʼoplal ta sjunul li asambleae. Kʼalal ch-echʼ mantaletik xchiʼuk skʼelobiltake, jaʼ jech ta jchankutik kʼuxi xuʼ jpaskutik li kʼusi tskʼan yoʼonton Diose. Jech xtok, tspat koʼontonkutik kʼalal oy buchʼu chal kʼuxi kuchem yuʼun svokol ta skoj ti jaʼ yajtsʼaklom Kristo li avi ti tsots vokole. Li ta asamblea rejionale ch-echʼ skʼelobiltak lokʼem ta Vivlia ti jech skʼuʼ spokʼik kʼuchaʼal ta voʼne li buchʼutik ch-echʼike, taje ep kʼusitik xuʼ jchankutik yuʼun. Li ta jujun asambleae oy ichʼvoʼ, taje jaʼ sventa li buchʼutik tskʼan chakʼik ta ilel ti yakʼoj xa xkuxlejalik ta stojolal Diose.

• ¿Kʼu yuʼun chakʼ tajek muyubajel li asambleaetike?

• ¿Kʼuxi xuʼ xatabe sbalil mi labat ta junuk j-asambleakutike?

Kʼalal jutuk xa ox skʼan xcham li Jesuse, xi laj yale: «Li lekil aʼyejetik ta sventa li Ajvalilale ta xichʼ cholel ta spʼejel balumil sventa xaʼi skotol li jteklumetike, vaʼun ta xtal li slajebe» (Mateo 24:14). ¿Kʼu van yelan chichʼ pasel li cholmantal ta spʼejel balumile? Jaʼ jech chichʼ pasel kʼuchaʼal la spas Jesus kʼalal ay ta balumile (Lukas 8:1).

Ta jvulaʼankutik ta snaik li krixchanoetike. Li Jesuse la xchanubtas ta xcholel lekil aʼyejetik ta jujupʼej na li yajtsʼaklomtake (Mateo 10:11-13; Echos 5:42; 20:20). Li baʼyel jcholmantaletik taje laj yichʼik lek albel bu kʼalal xuʼ xcholik mantal (Mateo 10:5, 6; 2 Korintios 10:13). Jaʼ jech lek chapanbil ta jcholkutik mantal li avi eke, li ta jujun tsobobbaile oy noʼox bu kʼalal xuʼ jcholkutik mantal. Jaʼ jech ta jchʼunkutik li mantal laj yal komel Jesus ti skʼan jcholbekutik mantal li krixchanoetike xchiʼuk ti «lek tsʼakal xkalbekutik [skʼoplale]» (Echos 10:42).

Ta jcholbekutik mantal skotol krixchanoetik ta buyuk noʼox. Li Jesuse laj yakʼ ta ilel kʼu yelan ta cholel li mantale, yuʼun li stuke la xchol mantal ta tiʼ nab o ti bu chkʼot slup yaʼal li krixchanoetike (Markos 4:1; Juan 4:5-15). Jaʼ jech li voʼonkutik eke ta buyuk noʼox ta jchiʼinkutik ta loʼil li krixchanoetik ta sventa Vivliae: ta kayeetik, ta pʼolmajebaletike, ta parke o ta telefono. Jech xtok, kʼalal xuʼ chkilkutike, ta jcholbekutik mantal jlakʼnakutik, jchiʼilkutik ta abtel o ta chanun xchiʼuk li kutsʼ kalalkutike. Taje jaʼ jech yabinojbeik batel skʼoplal epal miyon krixchanoetik ta spʼejel balumil «li lekil aʼyejetik sventa [kolebale]» (Salmo 96:2).

Nopo buchʼu chakʼan chavalbe skʼoplal li lekil aʼyej ta sventa li Ajvalilal yuʼun Diose xchiʼuk ti kʼuxi xuʼ stabe sbalil ta mas jelavele. Mu teuk noʼox xanakʼ ta avoʼonton li lekil aʼyej ti tspat oʼontonale. Kʼalal xuʼ chavile, akʼo noʼox ta ojtikinel.

• ¿Kʼusi jaʼ «li lekil aʼyejetik» skʼan xichʼ albel batel skʼoplale?

• ¿Kʼuxi jchanojbekutik ti kʼu yelan la xchol mantal Jesus li stestigounkutik Jeovae?

Li jpʼel kʼop prekursor xie jaʼ jmoj skʼan xal xchiʼuk jun jbabe, taje jaʼ skʼoplal li buchʼu tsjam batel be yoʼ bu muʼyuk to buchʼu jelavem sventa xjelav li buchʼutik te tijilik talel ta spate. Li Jesuse xuʼ xkaltik ti echʼ kʼuchaʼal jun prekursore, yuʼun laj yichʼ takel tal ta balumil sventa chalbe skʼoplal jun aʼyej ti chakʼ kuxlejale xchiʼuk ti tsjam li sbelel kolebale (Mateo 20:28). Li avie, ta jchanbekutik li Jesuse; ti bu kʼalal xuʼ kuʼunkutike ta jchʼakbekutik yorail sventa jkoltakutik krixchanoetik yoʼ xkʼotik ta yajtsʼaklom Kristoe (Mateo 28:19, 20). Oy jlom xtoke chtunik ta jtos abtelal ti prekursor sbi kuʼunkutike.

Jcholmantal ta tsʼakal ora. Jkotolkutik li stestigounkutik Jeovae ta jcholbekutik skʼoplal lekil aʼyej. Pe jlome oy kʼusitik sjeloj ta xkuxlejalik sventa chtunik ta prekursor regular. Li buchʼutik taje 70 ora ta u chcholik mantal. Ta skoj taje, oʼlol noʼox kʼakʼal ch-abtej ta yabtelik. Yantik xtoke chtʼujatik sventa chtunik ta prekursor espesial xchiʼuk chtakatik batel ti bu mas chtun jcholmantaletike. Li buchʼutik taje 130 ora o mas chcholik mantal ta u. Li prekursoretike muʼyuk kʼusi mas x-ayan yuʼunik, jech oxal spatoj yoʼontonik ta stojolal Jeova ti ch-akʼbat li kʼusitik chtun yuʼunike (Mateo 6:31-33; 1 Timoteo 6:6-8). Li buchʼutik mu xuʼ yuʼun chtunik ta prekursor regular o prekursor espesiale xuʼ x-ochik ta prekursor auksiliar. Taje jaʼ noʼox 30 o 50 ora ta u chcholik mantal.

Li kʼusi chtijbat-o yoʼonton li jun prekursore jaʼ ti skʼanoj Dios xchiʼuk li krixchanoetike. Jech kʼuchaʼal li Jesuse chkakʼkutik venta ti oy svokolik ta mantal li krixchanoetike (Markos 6:34). Ta skoj li kʼusi jchanojkutike, xuʼ xpatbat-o yoʼontonik li krixchanoetik avie, yuʼun chaʼiik ti oy kʼusi lek chtal ta jelavele. Ta skoj ti skʼanoj tajek krixchanoetik li jun prekursore, jaʼ chtijbat-o yoʼonton sventa chchʼak skʼakʼal xchiʼuk chakʼ yip sventa tskoltaan ta mantal (Mateo 22:39; 1 Tesalonisenses 2:8). Ta skoj taje, li prekursore chkoltaat sventa x-epaj xchʼunel yoʼonton ek xchiʼuk ti mas lek xil sba xchiʼuk li Diose, jaʼ yuʼun xmuyubaj noʼox tajek (Echos 20:35).

• ¿Kʼusi tspas li jun prekursore?

• ¿Kʼusi chtijbat-o yoʼonton jlom sventa chcholik mantal ta tsʼakal ora?

Li stestigotak Jeovae tsots skʼoplal chilik li xchanbel skʼoplal Vivliae. Jaʼ yuʼun, chichʼik chanubtasel li buchʼutik chtunik ta tsʼakal orae. Taje jaʼ sventa mas lek spas li yabtelik ta cholmantale (2 Timoteo 4:5).

Chanob vun sventa Prekursor. Taje jaʼ jun chanun ti chjalij vakib kʼakʼal ti xuʼ te xichʼ pasel ta jun Salon sventa Tsobobbail ti nopol noʼoxe. Sventa xuʼ xbatik li ta chanun taje, skʼan jun jabil tunemik xa ox ta prekursor. Ti jech chichʼik chanubtasele, jaʼ sventa mas xnopajik ta stojolal Jeova, sventa xlekub ti kʼu yelan chcholik mantale xchiʼuk ti stsatsubtasbat yoʼontonik yoʼ tukʼ xakʼ sbaike.

Chanob vun sventa j-al lekil aʼyejetik yuʼun Ajvalilal yuʼun Dios. Jaʼ jun chanun ti chjalij chib u sventa tojol kerem tsebetik xchiʼuk nupultsʼakaletike. Skʼan 23 xa sjabilalik o mu echʼemuk ta 65, ti jaʼik prekursoretik ti lek xtojobike xchiʼuk ti oyuk ta yoʼontonik chbat tunikuk ti bu tskʼanik mas koltaele. Sventa xchanbeik stalelal li Jesukristo ti jaʼ li Bankilal j-al lekil aʼyej echʼem ta balumile, xi chalike: «¡Liʼ oyun voʼone! ¡Takun batel!» (Isaias 6:8; Juan 7:29). Kʼalal chbat nakiikuk ta yan lume, skʼan xikta li kʼusi nopem toʼox xaʼiike xchiʼuk skʼan xnop xaʼiik ti jelel xkuxlejal li krixchanoetik tee, li sikil xkʼixnal osile xchiʼuk ti mas xa jelel chveʼike. Yikʼaluk van skʼan xchanik yan kʼop. Li ta chanun taje chkoltaatik sventa oyuk yuʼunik talelaletik ti jtunel yuʼunik ti bu chtakatik batele. Chchanubtasatik sventa xuʼ skoltaik mas li Jeovae xchiʼuk li s-organisasione.

Chanob vun sventa Vivlia ta Galaad yuʼun Watchtower. Ta ebreo kʼop li Galaade jaʼ skʼan xal «jtsop ton ti jaʼ jkʼopojele». Li chanun taje lik ta sjabilal 1943. Ti kʼu sjalil likem talele, ayemik mas ta vaxak mil ti tunemik ta misioneroetik xchiʼuk ti lek kʼusi kʼotem ta pasel yuʼunik li ta cholmantal ta spʼejel balumile (Echos 13:47). Jun skʼelobile, kʼalaluk kʼotik ta Perú li baʼyel misioneroetike, muʼyuk toʼox tsobobbailetik. Pe li avie, oy xa mas ta mil. Kʼalaluk kʼotik ta Japone, mu sta lajunvoʼ stestigotak Jeova. Li avie, oy xa mas ta 200 mil. Voʼob u chchanbeik lek skʼoplal Vivlia li ta chanune, taje jaʼ sventa lek chapalik li jchanunetik sventa chkoltavanik yoʼ lekuk xichʼ cholel li mantale. Chichʼik takel ta ikʼel prekursor espesialetik, misioneroetik, jkʼelvanejetik ta sirkuito o li buchʼutik chtunik ta Betele.

• ¿Kʼusi sventa li Chanob vun sventa Prekursore?

• ¿Buchʼutik xuʼ xbatik li ta Chanob vun sventa j-al lekil aʼyejetik yuʼun Ajvalilal yuʼun Diose?