XCHANOBIL 38
Epuk sbalil xkiltik li jkuxlejaltike
Ep kʼusi xuʼ jkʼupintik li ta jkuxlejaltike. Manchuk mi ep jvokoltik, oy onoʼox kʼusi xuʼ jkʼupintik. ¿Kʼuxi xuʼ jtojbetik ta vokol Jeova li jkuxlejaltike? ¿Kʼu yuʼun tsots skʼoplal ti jtojtik ta vokole?
1. ¿Kʼu yuʼun skʼan epuk sbalil xkiltik li jkuxlejaltike?
Skʼan epuk sbalil xkiltik li jkuxlejaltike, yuʼun jaʼ jmotontik yakʼojbutik li jkʼanvanej Totil Jeovae. Jech xtok, jaʼ ‹snioʼal kuxlejal›, yuʼun jaʼ la spas skotol li kʼusitik kuxajtike (Salmo 36:9). «Li stuke jaʼ chakʼbe xkuxlejal xchiʼuk jaʼ chakʼbe yichʼ ikʼ skotol li krixchanoetike xchiʼuk li yan kʼusitike» (Echos 17:25, 28). Kʼuchaʼal chkiltike, li Jeovae jaʼ chakʼbutik skotol li kʼusitik chtun kuʼuntik sventa xijkuxie. Jech xtok, ep kʼusi yakʼojbutik sventa jkʼupin li jkuxlejaltike (kʼelo Echos 14:17).
2. ¿Kʼuxi xuʼ jtojbetik ta vokol Jeova li jkuxlejaltike?
Kʼalal naka toʼox lanapʼ ta xchʼut ameʼe, laj xa onoʼox yakʼ talel sat ta atojolal li Jeovae. Jun vinik ta voʼne ti David sbie xi laj yalbe ta orasion li Diose: «Laj avilun ta asat kʼalal naka toʼox linapʼ tale» (Salmo 139:16). Toj ep sbalil chil Jeova li akuxlejale (kʼelo Mateo 10:29-31). Toj kʼux chaʼi Jeova mi oy buchʼu la smil yan krixchanoe o mi oy buchʼu la smil sbae (Eksodo 20:13).a Jech xtok, chopol me chaʼi mi yolbaj xa chkakʼ ta vokol jkuxlejaltik o li xkuxlejal yantike. Mi ta jchabi jbatik xchiʼuk mi ep sbalil chkilbetik xkuxlejal li yantike, jaʼ jech chkakʼtik ta ilel ti ep sbalil chkiltik li kuxlejale.
JCHANTIK TO BATEL MAS
Jkʼeltik batel junantik kʼuxi xuʼ jtojtik ta vokol li jkuxlejaltik ti jaʼ jun matanale.
3. Chabio me aba
Li buchʼutik chtunik xa ta stojolal Jeovae tstunes xkuxlejalik sventa spasbeik li yabtele. Taje xkoʼolaj ti chakʼbeik ta xchʼul moton Dios li sbekʼtalike, jaʼ yuʼun skʼan xchabiik lek. Kʼelik Romanos 12:1, 2 xchiʼuk albeik skʼoplal li sjakʼobiltak liʼe:
¿Kʼu yuʼun skʼan xachabi aba?
¿Kʼuxi van xuʼ xachabi aba?
4. Ichʼo apʼijil yoʼ mu kʼusi xanuptan xchiʼuk li yantike
Li Vivliae chal ti skʼan jchabi jbatik sventa mu xkakʼ ta vokol li jkuxlejaltike. Sventa xanaʼik kʼuxi xuʼ xachabi abaike, kʼelik li VIDEOE.
Kʼelik Proverbios 22:3 xchiʼuk albeik skʼoplal kʼuxi xuʼ xachabi abaik...
... ta anaik.
... ta avabtelik.
... kʼalal chatajinike.
... k’alal chatsʼotik o tikʼiloxuk batel ta jkotuk karro, moto o yan kʼusitike.
5. Mu kʼusi jpasbetik li uni neneʼ ti muʼyuk to vokʼeme
Li Davide laj yal jun nichimal kʼop ti chakʼ ta ilel ti toj kʼupil sba chil Jeova kʼu yelan chchʼi talel jun olol li ta yut xchʼut smeʼe. Kʼelik Salmo 139:13-17 xchiʼuk albeik skʼoplal li sjakʼobil liʼe:
¿Mi kuxlejal xa chil Jeova kʼalal naka to chnapʼ ta xchʼut smeʼ li jun olole o mi jaʼ to kʼalal chvokʼe?
Li mantaletik laj yakʼ Jeova sventa li j˗israeletik ta voʼnee chchabi li antsetik ti xchiʼuk yolike xchiʼuk li uni neneʼetik ti muʼyuk to vokʼemike. Kʼelik Eksodo 21:22, 23 xchiʼuk albeik skʼoplal li sjakʼobiltak liʼe:
¿Kʼu yelan chil Jeova mi oy buchʼu mu yolbajuk tsmil jun olol ti muʼyuk to vokʼeme?
Vaʼun chaʼa, ¿kʼu yelan chil li buchʼu yolbaj xa tsmil li jun olole?b
¿Kʼu yelan chavil li kʼusi tsnop Jeova ta sventa li uni neneʼetike?
Akʼo mi ep sbalil chil kuxlejal li jun antse, xuʼ van tsnop ti jaʼ mas lek ti syales li yole. Kʼelik Isaias 41:10 xchiʼuk albeik skʼoplal li sjakʼobiltak liʼe:
Mi chichʼ sujel jun ants sventa syales yole, ¿bu xuʼ sta koltael? ¿Kʼu yuʼun?
JUNANTIKE XI CHALIKE: «Jaʼ tsnop stuk mi tsyales yol li jun antse, yuʼun jaʼ yuʼun stuk».
¿Kʼuxi anaʼoj ti ep sbalil chil Jeova li xkuxlejal jun ants ti xchiʼuk yole xchiʼuk li uni neneʼ ti chiʼinbil toe?
¿KʼUSI LA ACHAN?
Li Vivliae chchanubtasvan ti skʼan jchabitik li jkuxlejaltike xchiʼuk li xkuxlejal yantike, ti jkʼuxubintike xchiʼuk ti jtsaktik ta ventae, yuʼun jaʼ jun matanal yakʼojbutik li Jeovae.
Svulesobil ta joltik
¿Kʼuxi jnaʼojtik ti ep sbalil chil Jeova li jkuxlejaltike?
¿Kʼu yelan chil Jeova li buchʼu yolbaj xa tsmil sba o tsmil yan krixchanoe?
¿Kʼu yuʼun ep sbalil chavil ti kuxulote?
XUʼ TO XAKʼEL LIʼE
¿Kʼuxi xuʼ jtojbetik ta vokol Jeova ti yakʼoj jkuxlejaltike?
Li Diose, ¿mi xuʼ xakʼ ta perton li buchʼu syalesoj yole?
«¿Kʼusi chal Vivlia ta sventa li syalesel olole?» (Xuʼ te xata ta jw.org)
Kʼelavil kʼu yelan chil Dios li tajimoletik ti xuʼ xakʼ ta vokol jkuxlejaltike.
Kʼelavil kʼusi tojobtasel chal Vivlia ta sventa li buchʼu tskʼan tsmil sbae.
«¿Mi xuʼ skoltaun Vivlia mi oy jnopoj ta jmil jbae?» (Xuʼ te xata ta jw.org)
a Li Jeovae oy ta yoʼonton li buchʼutik muʼyuk xa te tsakal chaʼi li yoʼontonike (Salmo 34:18). Li Jeovae xaʼibe smelolal kʼu yelan chaʼi sbaik li buchʼutik tskʼan tsmil sbaike xchiʼuk oy ta yoʼonton tskolta. Li ta xchanobil liʼe ti bu chal «Xuʼ to xakʼel liʼe», xuʼ xachan li mantal ti xi sbie: «¿Mi xuʼ skoltaun Vivlia mi oy jnopoj ta jmil jbae?».
b Skʼan mu chopoluk xaʼi sbaik li buchʼutik laj toʼox syales yolike, yuʼun ch˗akʼvan ta perton li Jeovae. Li ta xchanobil liʼe ti bu chal «Xuʼ to xakʼel liʼe», xuʼ xakʼel li mantal ti xi sbie: «¿Kʼusi chal Vivlia ta sventa li syalesel olole?».