Meleluk xijkʼopoj ta skotol ora

Jkotoltik ta jkʼantik ti meleluk xkʼopoj li kamigotaktike xchiʼuk jaʼ jech tskʼanbe yamigotak li Jeova eke. Pe mu toj kʼunuk ta pasel ta skoj ti lek xloʼlavanik li krixchanoetike. ¿Kʼusitik sbalil ta jtabetik mi melel chijkʼopoj ta skotol orae?

1. ¿Kʼu yuʼun toj tsots skʼoplal ti meleluk xijkʼopoje?

Kʼalal melel jnaʼ xijkʼopoje, jaʼ jech chkakʼbetik yil Jeova ti jkʼanojtik xchiʼuk ti chkichʼtik ta mukʼe. Teuk ta joltik ti chajal ta sat Jeova skotol li kʼusi ta jpastik xchiʼuk ta jnoptike (Ebreos 4:13). Yiloj xtok ti oy ta koʼontontik ti meleluk xijkʼopoje xchiʼuk chmuyubaj-o kuʼuntik. Xi chal li Vivliae: «Toj chopol chil Jeova li buchʼu muʼyuk stukʼil kʼusi tspase, yan li buchʼu tukʼe lek tajek xil sba xchiʼuk» (Proverbios 3:32).

2. ¿Butik xuʼ xkakʼtik ta ilel ti melel jnaʼ xijkʼopoje?

Li Jeovae tskʼan ti melel kʼusi xkalbe jbatik ta jujuntale (Sakarias 8:16, 17). ¿Kʼusi smakoj taje? Jaʼ ti mu jutik kʼope o ti mu jloʼla kutsʼ kalaltik, jchiʼiltaktik ta abtel, li ermanoetik ta tsobobbaile mi jaʼuk li yaj˗abteltak ajvalile. Li buchʼutik melel snaʼ xkʼopojike mu snaʼ x-elkʼajik mi jaʼuk chloʼlavanik ta skoj ti tskʼan tspasik kanal takʼine (kʼelo Proverbios 24:28 xchiʼuk Efesios 4:28). Jech xtok, tstoj spatanik (Romanos 13:5-7). Pe oy to bu yan ti xuʼ xkakʼtik ta ilel ti «sakuk jtalelalkutik ta skotole [o ti meleluk xijkʼopoje]» (Ebreos 13:18).

3. ¿Kʼusi sbalil ta jtabetik mi melel jnaʼ xijkʼopoje?

Kʼalal snaʼojik ti melel jnaʼ xijkʼopoje, tspat yoʼonton ta jtojolaltik li yantike. Jech xtok, jun yoʼonton li ermanoetike xchiʼuk tspat yoʼontonik ta jtojolaltik, yuʼun xkoʼolaj ta kutsʼ kalal jbatik. Maʼuk noʼox, yuʼun muʼyuk chloʼilaj koʼontontik. Kʼalal melel jnaʼ xijkʼopoje, toj kʼupil sba chkʼot kuʼuntik li chanubtasel yuʼun li Jkoltavanej kuʼuntike, li Diose. Jech xtok, xuʼ van oy buchʼu jaʼ chtijbat-o yoʼonton sventa xtun ta stojolal Jeova (Tito 2:10).

JCHANTIK TO BATEL MAS

4. Lek chil Jeova li buchʼu melel snaʼ xkʼopoje

Kʼelik Salmo 44:21 xchiʼuk Malakias 3:16 xchiʼuk albeik skʼoplal li sjakʼobiltak liʼe:

• ¿Mi lek van ti oyuk kʼusi jmukbetik li Jeovae? ¿Kʼu yuʼun ti jech chavale?

• Bakʼintike, vokol chkaʼitik ti melel xijkʼopoje. Pe ¿kʼu van yelan chaʼi sba Jeova kʼalal chkakʼtik persa jamal chijkʼopoje?

5. Meleluk xijkʼopoj ta skotol ora

VIDEO: ¿Kʼusi ti chakʼ jmuyubajeltike?: Sakuk noʼox li jol koʼontontike (2:32)

Kʼelik Ebreos 13:18 xchiʼuk albeik skʼoplal kʼuxi xuʼ sakuk jtalelaltik o ti meleluk jnaʼ xijkʼopoj...

• ... ta kutsʼ kalaltik.

• ... ta kabteltik o ta chanob vun.

• ... ta buyuk noʼox.

6. Oy sbalil kʼalal melel jnaʼ xijkʼopoje

Xuʼ van xkil-o jvokoltik kʼalal melel jnaʼ xijkʼopoje, pe chkakʼtik venta ta tsʼakal ti oy sbalile. Kʼelik Salmo 34:12-16 xchiʼuk albeik skʼoplal li sjakʼobil liʼe:

• ¿Kʼuxi ta jtabetik sbalil mi melel jnaʼ xijkʼopoje?

1. Kʼalal jamal kʼusi chalbe sbaik li malalil xchiʼuk li ajnilale, tstsatsub li snupunelike.

2. Kʼalal melel snaʼ xkʼopojik li buchʼutik ch˗abtejike, lek ch˗ilatik yuʼun li spatronike.

3. Kʼalal melel snaʼ xkʼopojik li jnaklejetike, lek skʼoplal chkomik ta stojolal li j-abteletik yuʼun ajvalile.

¿KʼUSI LA ACHAN?

Li Jeovae oy ta yoʼonton ti meleluk snaʼ xkʼopoj li yamigotake xchiʼuk ti lekuk kʼusi spasike.

Svulesobil ta joltik

• ¿Butik xuʼ xkakʼtik ta ilel ti melel jnaʼ xijkʼopoje?

• ¿Kʼu yuʼun muʼyuk lek ti oyuk kʼusi jmukbetik li Jeovae?

• ¿Kʼu yuʼun chakʼan ti meleluk xakʼopoj ta skotol orae?

XUʼ TO XAKʼEL LIʼE

Li totil meʼiletike, ¿kʼuxi xuʼ xchanubtas yalab xnichʼnabik sventa meleluk xkʼopojike?

Melel xijkʼopoj (1:44)

¿Kʼusi bendision tstaik li buchʼutik tspasik li kʼusi chalike?

Mi chapas li kʼusi avaloje, chata bendision (9:09)

Kʼelavil mi skʼan jtoj jpatantik akʼo mi muʼyuk lek chichʼ tunesel li takʼine.

«¿Mi skʼan xatoj li apatane?» (Li Jkʼel-osil ta toyole, xchanobil)

¿Kʼusi tijbat-o yoʼonton jun vinik sventa sjel xkuxlejal ti chloʼlavan toʼoxe?

«Laj kakʼ venta ti lek yoʼonton li Jeovae xchiʼuk ti chakʼutik ta pertone» (Li Jkʼel-osil ta toyole, 1 yuʼun mayo ta 2015)